我的高達站立於大地上（歡迎分享與高達故事。）P.8新增收山作，首部MG

原罪

GUNDAM高達…


我出世既年份，應該同佢既播出年份差唔夠一年。（講緊日本）
我認識佢，應該係三歲，唔知阿媽買定係親戚送，得到一隻金色合金既高達。
只有手有少許關節，對於幾歲既我…呢件接近全合金既野…根本就係殺人武器。

我當然有唔少陰影，係黎自呢件野，又重，又硬又三尖八角。對於只識玩「銀牙」既我黎講…
我自作孽既第一滴血好可能係佢…
我當時真係唔知咩係高達，仲要呢隻野唔知點解成隻金色…我連佢原本咩色都唔知。反而我家姐見到仲興奮。
「嘩！係高達~」

點解高達要「嘩！」？？？當年既我只識宇宙大帝同巨靈神。

到後黎電視播，首播個日…唔知去左邊個屋企，我都嘈住話睇電視，話播高達。
一路睇…一路覺得好悶…無機械人既？高達呢？成集差唔多影都無…
結果我應該睇左陣就走左去…

當時年少無知既我…又點知為左呢套作品…之後會好似欠左佢咁，負出咁多…

真正對高達產生興趣，應該係屋企附近間文具舖。
話說，當年小弟落去睇玩具，記得第一盒買既，係「以為」係六神合體既模型，係以為…因為封面有六神個樣。
（當年電視又係未播，知道既原因，一係就因為超合金，一係就因為貼紙。）
當然我一開想喊咁濟…入面係六神第一集既雜魚。（而我知佢係雜魚…已經係多年後電視播既事…乜你原來第一集就打柴？）

點解要提呢隻唔關事既野？
因為當日文具舖，雖然我無買高達，但周圍已經被高達模型包圍…其他野已經係小眾。（當然，當年雙星既軍事模型仲好勁…但我識佢老鼠咩？）對高達有咁多產品…係好有好奇心。

第一隻砌既高達，係1:144…全盒野都用青綠色既膠製…對於得幾歲既我。係覺得佢好醜樣。仲要無核戰機。
但條腰就唔知做乜鬼，可以打開…
入面當然乜都無…

好唔滿意…

後黎去d大哥哥屋企，見識過1:100既高達，終於知咩係正野。
有核戰機架！
後面兩把激光劍可以全把插入去架…係全把…即係後面睇，你會見到兩把激光劍，插穿個背包，交叉咁係度…
但當年黎講，d武器可以放哂上身，係一件好利害既事。仲有無彈弓既大炮，同埋原作無出，但有彈弓既大炮。
俾d大哥哥射到我嘩嘩聲！一路叫痛…一路覺得呢盒野好正。

當然後黎有自己砌過啦，第一次見到模型，係連腳版底都有雕刻。開心！
雖然接近不可動…但核戰機實在好玩。

呢個時候…我仲未知自己已經中毒…

買入當年所謂已塗裝既「老虎」…高達貴，無錢買。小弟家境一直清貧…
之前講既野…係因為小弟呢個死小孩無視家貧去扭返黎既…
敗家？我幾歲已經脫唔到呢個名啦！

當年所謂既已塗裝…其實都幾失望，為左可以有色…結果就係結構簡單。
當年有隻日本既模型油好低玩，一盒好多隻色…
我就油到隻高達獨創顏色…（鬼油得掂咩？幾歲。）

跟著…無啦…

無接觸高達啦。
最後都係去人地屋企玩過隻陸戰重裝MSV高達模型，自己就跟住買左隻黑色高達（MSV系列RX-78-1《定係3號？？唔記得啦…》，唔係後黎既MK II），
你老板！一打開，又係全白色既？點解封面係黑色架？


直至小學，跟屋企人去深水涉，買d過期書（平，幾蚊有交易。）
見到幾本「模型狂四郎」…咁就大獲啦！

入面個主角「京田四郎」，接近剩砌高達，仲改裝高達。係部1:100入面加隻迷你高達。
嘩！我立即返屋企爆豬仔錢箱，去買過隻1:100。

但家貧…後黎入既模型…全部係「褔x」模型既特價入手。2蚊隻1:144轉地鼠，同當年既大扭蛋同價。而且當年既扭蛋，
入面部機係有其它雜蛋…即係你未必買到你想要既野…可能出個魔法少女頭飾俾你架…

所以我2蚊買轉地鼠…係終於無咁敗家啦。
但上色…一樽油重貴過買模型，而且小弟根本無技術…
所以以後砌模型，都係素組。

如果當年「褔X」唔係咁平…我都無錢買…我都唔會中毒咁深…
唔係「模型狂四郎」…我唔會再砌模型…

屋企窮，結果要靠食少d黎儲錢買模型。直到中學…
當然發育得唔靚仔啦…（ORZ…係我既錯？定係高達既錯？）

當年中學時期，出左一合叫HG既高達。
多色成型，內關節，仲要有球形關節。加上首次1:144都有核戰機。
我再次砌RX 78。呢次，就係我砌過無數既RX 78既最後一次……

以後出既HG…都唔明點解可以叫HG？無多色成形，又無內關節？HG?

後黎…知道自己技術唔會進步，但玩具既技術就不停進步…
就無再砌模型，轉玩其他野…
例如媾女…但同樣無技術…:31:

……隔左廿幾年…
有位版友介紹我玩RG…

下？又係RX78？我砌過幾多隻啦？都未計SD，我望到其中一past都知係佢邊忽啦。有咩好玩？
版友：「你買黎見証下時代既進步啦！」

結果，係朋友既教導之下（車仔親自示範滲線，其他朋友教我心得。連細我好多既外甥都識畫線…我結果人生第一次畫線…第一次又係你Rx 78。）
成果如下，剩滲線，加少許貼紙，水口都無咩處理過。




















成世人第一次滲線…我心足啦。（呢度高手太多…要笑就笑啦。撐都無謂~）













連動外甲既關節…我真係感動！







一路唱住「元祖高達」既主題曲，一路哼住「哀戰士」~~
以為呢世都唔會掂模型既小弟…
唔識油油既小弟…
竟然可以完成一隻，個樣咁靚仔既模型。
「笨大」…我真係好感動。我真係想講多謝~
更加感激叫我砌既版友~
我真係覺得好似遇返老朋友咁。
RX -78你好嗎？我還好~

「飛翔啦~~我既高達~~~」
『亞bu 羅~衣key媽~~~~~~~~~~~~~~』:$



最後補多張圖，係後黎加上銀油干掃內骨架同武器既效果，成隻生猛哂。（DC仔，影得唔係咁清楚，見諒~）

0din

由0可動到超可動
恍如隔世

拍嘉

細個見哥哥的一比一四四要用膠水，到我中學玩hg之後到笨大出RG，感覺上睇到玩具的進化:79:

Squall

死曬圖啦大大, BANDWIDTH EXCEEDED :49:

X-JAPAN

GOOD~!!!老友見係你我上一下水~
不過呢隻野真係唔錯~但係老友你D圖~死曬~XD

S2010

你所講當年有部核戰機既高達, 小弟都有部,  我細佬幫我每隔幾日攪爛1件部件, 我都係嘩嘩聲:64:

音波

d回憶論好好笑:DD

S.White

有多少玩具迷还不都是被这白色恶魔给直接或间接推落坑的... :56:

hayadomaru

人生第一副模型就係高達, 大大所講的1:144, 記得當年在荃灣的玩具店見到賣12.5雞, 儲咗好耐錢先買到, 都係買咗先知無顏色, 但只係素組都好開心, 仲要玩咗好多年:$
相信唔係70後嘅大大係唔會明:74:

toycoffe

圖呢:63:

mkyfk

oh...no photo:44:

Arx-7

D圖...死曬...:70:

原罪

圖已修復，多謝各位支持，抱歉抱歉:64:

gnx2

依篇系我難得咁有心機睇ge文...

大大ge見証真系令我感動  

都依家先發現我中意gundam ge時候已經有HG版真系好幸福

ygat2005

too long.
sorry, not interested to read it.