|
|
發表於 1-11-2014 15:18:10
|
顯示全部樓層
|
本帖最後由 shiufon 於 1-11-2014 04:43 PM 編輯
＞＞<你其中一段既原話係「學生憑住良心同信念，我好認同,」喎 又變左嗱?究竞同一番說詞你重要兜幾多次? 唔通你講緊既「站出嚟」係喺學校罰企既學生 而唔係所謂「佔中」嗰班? 原來「站出黎」唔係指佢地既行為 奇怪 咁點解跟住又話:「但反佔中者憑住對保衛家人生計而反對」呢?唔通係反對佢地既良心同信念? 嘩 咁飄移法 真係好難追囉 可能其他地方你個說法又唔同而我miss左la: 你知啦 你成日都要就自己講過既野加加減減改改然後再重覆ga ma (補充 你大部份同其他人既對話我都無睇的)
其實討論咗幾日，我開始有啲懷疑自己係咪能夠適當以文字表達自己意思，已經咁清楚表明立場，唔明點解Tachikoma兄會兜兜轉轉去斟酌返同一件事？
佔中一事上，我已經講過好多次，我係支持嘅，支持學生嘅信念，同願意企出嚟嘅勇氣，但佢地行為上明顯係錯嘅，如果唔係周永康阿戴生佢地都唔會話事後會去自首，首先呢一點，我相信係無爭論餘地。
咁一件連做緊嘅人都承認係錯嘅事，警察去制止，甚至其他市民去制止，都係好合理。但正因為呢一件事喺理念上係好嘅，所以即使好多人受到影響，都唔去計較，而採用包容嘅心去任由學生佔領街道，我個人嘅理解係咁樣。
就「包容」兩個字，上次師兄同我爭論咗一輪，但在我而言，犯法就係犯法，無論你理念有幾崇高，無論你為大家帶嚟幾好嘅未來，都係唔可以改變嘅事實。大家（即係冇反佔中果啲）容許佢地咁做，我覺得用包容嚟形容係好合理。
咁反佔中果班覺得自己嘅人權被侵害，行出嚟反對，我覺得都係有佢地嘅道理，所以我先不斷重覆又重覆地講，呢一次運動係可圈可點，無話邊一個係絕對嘅衰人。
但而家產生嘅問題係，部份朋友將今次嘅事劃清界線，變成敵我分明，唔係企我呢邊，你就係敵人，連中立嘅空間都唔俾人，唔發言果啲係喺度助紂為虐，做離地派。要贏就一定要贏全部，唔可以受到質疑，連解釋都唔會聽，你解釋完，佢又會從你解釋嘅說話中質疑另一樣嘢。
就好似我今次話支持，其實係一樣好簡單嘅事，但就被質疑好多嘢，抱住乜嘢心態，口話支持，點解又講啲單打說話，又話認同警察用暴力等等。我只想講，支持一件事，唔係盲目讚同當中所有人做嘅任何嘢。理解大家立場，明白事情可行性，諗諗對家點解會咁做，聽多啲唔同聲音係好緊要。而唔係無視實際狀況，總之擋我者就係唔啱，我係為人民爭取民主自由，唔同意、懷疑、甚至有其他想法嘅都係敵人。
請唔好誤會，Tachikoma兄我唔係想挑釁你，直到而家，縱使大家言語上係有針鋒相對，但我都認為同你嘅討論係友善嘅，係有意思嘅，如果唔係我唔會花咁多時間去打字，shiufon只係一個帳號，重係註冊冇幾耐嘅新帳號，我唔需要為咗保住呢個帳號嘅面子，一定要講贏某位朋友而大發謬論，登出，再註冊另一個名係輕而易舉嘅事。
討論有火花係好正常，有時為咗證實自己論點，講啲過火位嘅話一啲唔出奇，大家唔服我講失敗者果段話我可以理解，因為連自己都覺得過火咗。但對呢一個話題，其實我係有啲唔明白，一個咁簡單嘅表態，點解會變成一個咁複雜嘅質疑？一個支持，係咪真係要義無反顧地支持到底，先算係支持？
今次運動，大環境話俾我地知，成功機會係非常非常渺茫，我地暫時睇唔到有任何理據支持人大係會改變主意，甚至用「其實已經失敗咗」嚟形容也不為過。但無論如何，「雨傘運動」嘅信念已經植入大部份香港人嘅心係無可否定嘅事實，亦會間接同直接影響今後香港喺民主發展上嘅路。
身為香港人，我好自豪有咁多年青人願意企出嚟，佢地行為上係錯，但理念上值得尊敬，我唔係喺度兜，呢段話我唔係今日第一次寫。我可以再一次理直氣壯咁講，我嘅立場無動搖過，從9月28號嘅留言開始，我就一直未動搖過，亦自覺唔需要轉軚。
|
|
樓主: what
IP卡
狗仔卡
顯身卡
