第二朝一大早, 開始o左半日o既金邊行程, 而呢半日, 我睇到人類史上非常可怕o既一幕。
柬埔寨除o左吳哥窟之外, o係近代史入面仲有一件好重要o既 "名物" ---- 赤柬。赤柬o既正式名稱係 "紅色高棉", 原本屬於印度共產黨o既支部, 到 1966 年先正式成為柬埔寨共產黨。而今日要去o既景點, 就係赤柬統治期間最可怕o既證據。平時我都算係一個冷血o既人, 但聽完、睇完之後都覺得不安...。
無獨有偶, 柬埔寨共產黨正式執政o既時間係三年零八個月。呢段期間全國有超過二百萬人失蹤、或者死亡, 而當時柬埔寨o既全國人口只有四百萬左右 ---- 即係每兩個人就有一個永遠消失。好誇張!!
第一站係有 Killing Field 之稱o既萬人塚, 碰上陰慘慘o既天氣, 上天似乎有心幫我 "配合主題" 咁....
上面o個座係紀念塔, 用以弔唁亡者。塔高十幾層, 走近一睇, 裡面所裝o既係 ----
白骨!! 全部係赤柬統治期間o既亡者。頭顱放晒o係低層, 方便各界去面對、致意, 其他部份例如胸骨、腿骨就o係高層。
一路行入去, 地上都有唔少大洞 ----
相信各位都估到, 呢o的當然係傳說中o既亂葬崗...。另外仲有一棵大樹, 傳說當囚犯當中有嬰孩要 "處決" o既時候, 劊子手會直接將嬰孩大力撞向樹身, 令佢變成一堆肉醬, 子彈都慳返。
當年o既大屠殺對象當然離不開知識份子、唔聽話o既人、"做錯事" o既人, 甚至肥人都被認為係懶惰/ 有錢o既象徵而遇害。但更多係無目的o既屠殺, 根本唔知點解就被人捉o左, 然後人間蒸發。
離開萬人塚, 下一站係 S-21 Tuol Sleng Genocide Museum, 通稱波布戰爭館, 要用上 Genocide 呢個字, 當年慘況可想而知。原本呢度係一間學校, 後來被徵用做集中營, 而 S-21 就係集中營o既編號。呢度係用作嚴刑拷問o既地方, 拷問後o既人大多會送去萬人塚處決。
建築物入面有好多死者o既遺照, 好驚訝十歲左右o既細路竟然佔o左三成, 實在唔明白點解會咁。
所有房間o既窗都上晒鐵枝, 感覺好絕望...
再行入去, 會有一o的當年酷刑o既黑白照, 剥皮、淋硫酸乜都有, 好彩全部都影得唔清唔楚, 否則再大膽都會嚇到嘔。下面呢副, 係其中一o的刑具...
某程度上, 我係一個贊同武力o既人, 雖然係咁, 但我非常厭惡不必要o既血腥 ---- 一個國家總唔可以冇軍隊, 但足夠打贏自保就夠, 冇必要再進一步。所以實在無法想像人類點解可以用盡酷刑去對待同類、甚至其他生物。
原來柬埔寨係全球唯一一個 "成功" 奉行完全共產主義o既地方。當年赤柬頭領波布 (Pol Pot, 又稱波爾布特) o個班人掌權後o既第一步, 並非好似其他地方o既共產黨咁, 將有錢人o既資產沒收, 而係索性將所有經濟活動取消 ---- 即係意味著資產雖然仍屬於個人, 但因為已經冇貿易, 財產再多都無處可用, 呢招又狠又絕。
跟住就係分化, 將所有人自城市撤走, 全數發配去鄉下務農, 離開時甚至刻意將工廠等等o既科技設施全部破壞。此後人民一切所需都由政府提供, 佢地只要每日完成被分派o既工作就不用擔心住屋吃飯。然而, 咁樣亦代表o左地獄o既開始。
仲記唔記得 o係 Part 1 o既遊記入面, 我問過金邊市中心點解會咁破落?? 原來就係因為當年大遷徙之後, 整個城市有三年冇人住過, 事後佢地亦未有錢去修補。
如果各位有返咁上下年紀, 應該會睇過 "殺戳戰場" 呢套關於柬埔寨o既西片, 而根據當地人所講, 戲入面o既劇情好多都真有其事。當年o既城市人好多都捱唔住鄉下勞動而死, 加上話就話政府會負責糧食, 但實際上跟本唔會夠食。佢地 "管理" 人o既方法不外於要人民互相揭發對方錯處、供出 "同黨", 再將 "有懷疑" o既人送去集中營。
由於經濟活動被取消, 金銀珠寶變得垃圾一樣, 要賄賂官員換取安全溫飽呢招亦行唔通, 因為能夠打動人o既, 就只剩返權力 ---- 而人一旦追求權力, 就會變得更可怕。
而赤柬o既滅亡, 就要由波布o係 1977 年 9月o既大清洗行動開始。呢次大清洗澈發o左好多流亡人仕o係越南打返轉頭, 最後o係越軍幫助下, 赤柬被打至向山區撤退成為游擊隊, 直到 1998 年波布o係深山中死亡, 赤柬o既影響先完全消失。
赤柬統治過後, 成個國家幾乎變成無政府狀態, 人民o既教育中斷o左二十八年, 整整一代o既人材都消失o左。不過好彩柬埔寨天然資源豐富, 回復速度算係好快。
Part 2 完。
發表於 3-9-2011 12:04:49
樓主
