Toysdaily 玩具日報

 找回密碼
 註冊
樓主: 魚旦

[趣味] 我引退 TD 前o既最後遊記 [第一彈]:埃及之旅 Part 6 已更新 (p.3)

[複製鏈接]
 樓主| 發表於 3-8-2011 15:36:19 | 顯示全部樓層
因為跟團驚會走馬看花...你覺得每個景點逗留既時間夠唔夠?
verywai 發表於 3-8-2011 01:09 PM


絕對唔會, 我起初都擔心呢個問題, 但基本上每次都 more than enough
發表於 3-8-2011 15:48:14 | 顯示全部樓層
哈哈,魚旦兄,唔怪得之D相咁熟口面啦,原來我地係同團架

我仲係你其中一張相發現到自己添:DD
發表於 3-8-2011 17:09:32 | 顯示全部樓層
人生總要流浪一次才不柱此生!!
有了家室另一半時就不能瀟洒啦∼
這種回憶可回味一生!!
非常讚的遊記!!讚!!
發表於 4-8-2011 14:03:15 | 顯示全部樓層
閒聊區好少有post會受精...魚旦兄你考慮下留番係度啦...哈哈:34:
頭像被屏蔽
發表於 4-8-2011 14:27:46 | 顯示全部樓層
發表於 4-8-2011 19:15:47 | 顯示全部樓層
哎呀哎呀.... 估唔到真係仲有一班舊人回覆, 多謝晒各位!!

  ...至於七國兄, 我記得你應該係o係我未做 cd- rom 之前已經加入 TD, 亦係少數會做玩具分享/ review o既版友
魚旦 發表於 3-8-2011 11:41


小弟out out哋,brother所指嘅cd-rom係乜嘢意思?
 樓主| 發表於 4-8-2011 19:16:27 | 顯示全部樓層
本帖最後由 魚旦 於 4-8-2011 07:22 PM 編輯

Chukithk 兄, 估唔到世界咁細小!! 我已經試過幾次旅行返港後o係網上同其他人相認, 估唔到走到去埃及都有機會, 失覺晒。

Dick Po. 兄, 今次唔算係流浪o既.... 但有另一半後的確未必可以再有類似o既機會, 所以我都想襯仲未結婚, 走埋去西藏、絲綢之路、以色列、約旦等地方睇睇。

話說回來, 到 Part 4 啦!!

郵輪繼續航行, 呢一日到o左樂蜀 (Luxor), 亦係船隻o既終站, 由於樂蜀景點多又比較熱, 所以會分開兩日玩 (否則會極度辛苦)。至於o既行走路線, 就可以用呢幅地圖去概括:



或者好多人都會對樂蜀呢個名稱冇乜印象, 但如果話佢即係以前o既底比斯 (Thebes), 應該或多或少都會聽過啦?? 夏季呢度會熱到地獄咁, 所以揀o左十月o黎實在太好彩啦。

樂蜀o既古蹟會以尼羅河東西兩岸去劃分, 以前o既埃及人最信太陽神, 一般都會認為日出東方係生命o既象徵、而日落個方向就代表死亡, 所以墳墓、金字塔等等有關死人o既遺跡都會集中o係西岸。o個個年代人口不多, 西岸地區幾乎只有建造皇家墓穴o既工匠先會住入去。o個一帶o既相關古蹟令整個地區有死人城 (Necropolis) 之稱。


船泊o左o係東岸, 先要轉乘小型駁艇 (佢地聲稱呢o的係水上的士...) 過對面:



而第一個景點就正正係名氣極盛o既帝王谷 (The Valley of the Kings)。帝王谷一帶都係荒蕪至極o既岩山, 後期o的法老王意識到金字塔太容易成為盜賊o既目標, 所以就選o左呢個地方做墓穴。但無獨有偶, 山谷上方o既山峰形狀活脫脫就係一座小金字塔。現時呢度大既已發現o左 120 個墓室, 其實應該仲有更多。


o拿o拿o拿, 睇真o的左邊o個座山, 形狀都成個金字塔咁款:



由於呢個古蹟太重要, 兼且有好多用顏料上色o既壁畫, 攝影機會都佢地有不良影響, 所以不單墓室之內, 就連谷中整個區域都嚴禁拍照。所以我只可以老蓮咁遠影到上面o個幅相咋...

每張入場券可以進入任何三個有開放o既墓穴參觀, 如果要睇圖坦卡門o個個就要另外再俾錢, 但因為裡面o既文物已經全數放晒o係開羅博物館, 呢o的錢就無謂多使啦...。最後走o左去拉武西斯 (Ramesses) 一世、四世、同九世o既墓室。老實講, 裡面o既震撼程度絕對不高, 不過幾天以來都幾乎冇見過真正畫o係牆上o既壁畫, 呢度就可以睇返夠本。有o的顏色鮮艷o既恐怕有收復過, 至於其他文物早就唔o係度, 一係放o左去世界各地o既博物館、再唔係就已經俾人偷晒, 所以絕對比較失望。

下一站輪到女王神殿 (Deir el-Bahri), 亦即係埃及唯一女法老 Hatshepsut o既神殿。唔知各位仲記唔記得約十幾年前埃及發生過一宗恐怖襲擊, 死o左好幾十個遊客?? 地點就係呢度。



神殿本身o係七十年代經過大幅翻修, 所以可觀性真係削減o左。佢o既建築風格跟過往幾天所見到o既大有不同, 好工整, 與其話佢係古埃及產物, 不如話係希臘式遺跡仲貼切。不過女王神殿o既最大特色始終都係在於佢o既位置, 從入口處到主建築需要經過一望無際o既廣場, 無遮無擋十級曝曬!!

我o係主殿外面影返轉頭, 真係曬到黐筋o架....



一整排o既雕像, 明顯比之前見到o個o的整齊, 不愧曾經大幅修建----





呢個應該就係女法老o既雕像:



呢一日o既太陽... 真係好恐怖...



今日最後一個景點係沒太多人會去o既孟農神像 (The Colossi of Memnon), 原本係一座大神殿, 但經過多次地震之後就只剩下兩座幾近毀容o既巨型雕像。冇錯丫, 應該係一個反正順路就去睇睇o既景點....



如果係黃昏, 應該更加可以凸出o個種滄涼o既感覺…。



下晝冇安排節目, 但由於剩返o個o的值得去o既景點聽朝都會去, 所以我決定留o係船上好好休息。

過去幾日都要六點幾起身、日日揹著十九幾斤重o既攝影裝備四圍行、加上天氣實在熱到可以整粟一燒... 都係回一回氣穩陣。好彩後尾聽其他人講, 附近都係得一個博物館可以去行o下, 損失不大。

日落前我再挑戰多一次船上面o既冰凍泳池、再同o的歐洲遊客吹吹水、曬o下太陽、泡o下按摩池, 爽死。呢種悠閒o既生活好難o係香港享受到, 間中折墮折墮總比想折都冇機會折強得多, Right??

晚餐之後, 仲有旋轉舞同肚皮舞表演:



字數太多, Part 4 要斬開兩截出....
 樓主| 發表於 4-8-2011 19:20:07 | 顯示全部樓層
翌日, 終於食到太陽蛋做早餐!!



"I would like to have two eggs... AH!! Don't stir them man!! Yeah, right, now fry them nice and slow. When I say okay, just hand them on my plate. Thank you." 幾乎要我逐個步驟教廚師煮先有得食, 事關o係佢地o既概念入面, 蛋可以用水白煮、可以炒、可以整奄列, 但就完全唔知乜o野係荷包蛋或者太陽蛋....。

今早要離開郵輪, 向樂蜀o既東岸地區進發。好, 埃及神殿、古跡將會o係今日上午全部睇完, 打後全部都係截然不同o既景點。

首站係埃及現存最大o既遺跡 ---- 卡納神殿 (The Karnak Temple), 官方資料話佢係除開羅三大金字塔之外, 第二個最多人去o既地方。整座神殿分為四部份, 但只有中間最大o既部份有開放, 神殿佔地極廣, 據了解差不多有半個曼克頓咁大。

o係門口迎接遊客o既, 係幾十個排在門前走廊o既 "羊身人面像" 石雕, 而o係裡面不遠處, 就是全世界最大o既石柱廟堂。




石柱總共有 134 條, 每條高逾廿米, 每條柱頂o既平面處竟然可以容納百人上座, 又一個建築奇蹟。從 "柱林" 上面o既牆身殘骸可以知道, o個陣已經有近乎窗口o既通風設計。

果然有陽光先有靚相:



方尖碑 (詳情請見 Part 2):



哈哈, 送個金髮美女俾大家先~~



阿靚女o係度做緊乜?? 原來右手邊個石台上係一個最大、保存得最好o既聖甲蟲雕像, 好多歐洲人會繞著它走圈, 傳說o係佢身邊繞七圈就可以願望成真云云 ---- 但其實原來係當地導遊們開o既玩笑, 不過睇著成班傻佬走個樂此不疲, 都是一件趣事。

輪到卡納神殿後門, 相入面全部都係神殿範圍 ----



下面呢幅偷拍我都幾鐘意...



再補多一幅 "柱林" 先~~



我認我無聊, 但一個人四圍走、又費事成日叫人幫自己影相, 咪唯有影自己個影囉...



講起幫人影相, 我就發現近年香港人用單反o既比例幾乎係世界之冠。外國人用大機當然唔少, 但比例上, 每十個可能都冇一個。由此亦可見, 我地其實已經俾消費文化洗晒腦, 捫心自問, 有單反o既人當中, 有幾多真係有需要、有興趣、又或者識影相??

我都知有錢亂 Fing 係吹你唔脹, 有好多人 Fing 到件件名牌、周身 Digital Gadgets... 不過一開口就知你書都冇過, 內涵見識都近乎零就太悲哀啦。再睇o下呢個世界其他地方o既人之後, 如果仲唔醒覺到要改變、充實多o的自己的話, 咁就真係無藥可救。

好, 下一站就係今次旅程o既最後一座古蹟 ---- 樂蜀神殿 (Luxor Temple)。呢度更加可以睇到埃及被外族侵略過的痕跡, 事關其中一幅壁畫竟然係文藝復興時期o既天主教畫像。



其實樂蜀神殿同剛才o既卡納神殿幾乎係兄弟, 但特別之處則在於樂蜀神殿 被黃沙埋住o左好幾百年, 期間咁o岩有一座清真寺不知就裡地起o左o係上面, 於是就出現o左 "新清真寺夾在古神殿中間" o既奇怪情況。下面呢幅相就係o個座清真寺啦:






大家又估唔估到呢幅壁畫係乜呢??



冇錯!! 長長o既性器官, 此乃古埃及之 Jer~~~~ 神~~~~ 是也!!! 傳說佢係法老王座下一個戰功赫赫o既大將軍, 可惜臨老被敵人打殘o左要退休, 法老就賜o左o的美女過佢.... 結果將軍先生殘而不廢, 生o左 N 咁多個仔。於是就被奉為生育之神。
佢o既 JJ 已經被人摸到發黑, 好似話摸完之後容易生仔咁話喎....

o黎多幅遺跡照先...



哈哈, 送多個靚女俾大家~~



告別古代埃及後, 走去神殿另一邊o既樂蜀市集睇睇 (唔係叫 Market, 要叫 Bazzar) ~~





中東/ 非洲地區必定見到o既香料店~~



下面呢一幅係蘆葦畫 (Papyrus),  古埃及人用蘆葦去做紙張o既原料, 當然佢們並無中國紙咁好用, 但照發明o既年份看睇已經係一個非常了不起o既方法。

我自己都買o左幾幅送禮自用, 但最想要o既, 當然係相入面呢幅死者之書 (Book of the Dead) 畫像, 但實在太貴了啦...。



午餐之後, 就要座六個鐘頭車向洪加達 (Hurghada) 出發。



Part 4 完。
 樓主| 發表於 4-8-2011 19:22:09 | 顯示全部樓層
回復 21# 七國咁亂

即係只看帖、不回帖不發帖....
發表於 4-8-2011 19:55:23 | 顯示全部樓層
回復  七國咁亂

即係只看帖、不回帖不發帖....
魚旦 發表於 4-8-2011 19:22


明白晒,thank you:77:
發表於 4-8-2011 20:33:58 | 顯示全部樓層
...日落前我再挑戰多一次船上面o既冰凍泳池、再同o的歐洲遊客吹吹水、曬o下太陽、泡o下按摩池, 爽死。呢種悠閒o既生活好難o係香港享受到, 間中折墮折墮總比想折都冇機會折強得多, Right??

魚旦 發表於 4-8-2011 19:16


咁都叫折墮?唔係呀…我都想折墮吓喎…:58:
發表於 5-8-2011 00:32:03 | 顯示全部樓層
睇到d旅行post個人特別醒神:shiny:
發表於 5-8-2011 10:17:10 | 顯示全部樓層
非常非常正嘅遊記,令我見識多咗,多謝魚旦師兄冇私分享!!!!!!
發表於 5-8-2011 20:26:46 | 顯示全部樓層
我都岩 岩自己一個去左英國廿日,見到師兄既分享,我都好想寫下我既見聞,
一個人最辛苦係搬行李,不過最開心係去邊都得
發表於 6-8-2011 00:09:11 | 顯示全部樓層
旦魚你好呀,無意中入黎見到你呢個post...我都好耐冇係td 出現過了,haha

好詳細呀...d 相影得好靚,冇記錯你之前好似去過神山的,haha,多謝你既分享呢~~
攪到我都好想去旅行呢~~期待你既第二彈,第三彈~:p
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 28-3-2024 10:48 PM , Processed in 0.032004 second(s), 13 queries .

Powered by Discuz! X3.4

Copyright © 2001-2021, Tencent Cloud.

快速回復 返回頂部 返回列表