|
本帖最後由 魚旦 於 8-8-2011 07:06 PM 編輯
各位, 好耐冇見, 唔知仲有冇人記得我呢?? 未開始遊記之前, 都想講多少廢話。曾幾何時, 我係 TD o既活躍份子, 但竟然漸漸變成 CD- rom...。
呢兩年一來自己太忙, 二來好多舊人陸續離去, 加上當年俾幾位新加入網友激親, 總之當時有o的覺得 "此處不留人" 啦。而且自從 09 年之後, 玩具價格不斷上昇, 但無論質量、誠意、設計都愈來愈離譜 (我完全接受唔到 Robot 魂同 SHF 要賣成三百蚊!!), 到最近連非限定o既普通貨色都話唔訂就冇得買, 真係心灰意冷。
最後, 年紀真係大o左, 亦搵到一個好好o既女友, 愈來愈覺得留多一分錢去俾更好o既生活對方, 遠比亂買玩具值得。所以, 連字宙大帝都買埋o既今日, 似乎係時侯 Say Goodbye。或者有朝一日 Gunbuster 同金毛再販我都會後追, 但目前來講, 已經再冇動力買新o野啦。
講返失蹤o既呢兩年, 我去o左幾個古文明國度, 首先係 2009年 10月o既埃及之旅。我成日都會講一句說話：地球上唔只得日本可以去, 就算日本, 亦非只有中野秋葉原 den den town。所以呢, 真係希望各位唔好去到邊都問有冇得買玩具。告別 TD 之前, 我想o係度出晒幾篇遊記, 算係o係呢度留低最後幾條腳毛。
好啦好啦, 入正題。
其實埃及呢個國家, 我十年前o岩o岩出o黎做o野已經好想去, 可惜一直搵唔到伴。到 09年 10月, 當時同 EX 散o左, 又見旅費忽然減價, 於是就一條友去報名。報完先知道, 原來香港係冇直航機去埃及o既!! 如果貪平, 仲可以夠膽死要你去南韓轉機...。於是, 我o既 Flight Plan 就變成咁：
由香港座 3.5 小時去新加坡轉機, 途中o係杜拜停留 1 小時, 再飛開羅!!
下午出發, 仲要座當年新落地o既巨無霸 A 380：
四個引擎, 真係好大部。當時o黎講, 裡面o既屏幕真係好靚, 仲有 lan 線、各式插頭, 不過兩年後o既今日, 好多 777 客機都有呢o的配備。
凌晨一點, 抵達杜拜, 但唔准落機... 下面幅相做緊中途清潔。
由新加坡出發, 去開羅總共要 12 小時, 當地時間比香港慢 6 個鍾, 出到機場o岩o岩天光。
呢個係我人生中第一次見到o既非洲日出。其實因為天氣問題, 今次o的相唔係好靚, 實在可惜。經過一晚通宵飛機o既折磨, 幾乎訓唔到, 我當時已經成條人乾咁, 仲要一落機就開始o係沙漠地區玩, 實在非常辛苦。
沿路進入開羅市中心 ---- 好一個落後o既城市!! 我以為台北已經係現代破落o既經典, 原來一山還有一山高, 非洲有數o既大城首都竟然如斯風貌, 未親眼見過都不敢相信。
五十分鐘車程, 抵達埃及第一個景點：位於 Saqqara 區o既梯形金字塔 (Step Pyramid)。佢係最古老o既金字塔之一 (公元前 27 世紀), 建築者正正係電影 "The Mummy" 入面o既大法司 Imhotep。相比其他巨型金字塔, 呢個已經唔算高, 而且不能內進, 但作為 "前菜" 已經非常不錯啦。
梯形金字塔側邊付有神殿遺蹟, 以五千幾年歷史來講, 已經保存得好好。
好鐘意下面呢幅o的雲!!
跟住係一個保存得非常好o既古墓 (the tomb of Mere- ruka, 2340 B.C.), 主人應該係某位貴族, 整個墓穴、墓室、主人雕像、壁畫都保存得好好 ---- 可惜 No Photos Inside!! 牆上雕刻係高硬度黏土, 趁未硬化乾透之前就要雕刻完成, 好高難度。
當然唔少得象形文字啦!!
埃及的狗。全個埃及o既貓貓狗狗都超瘦...
好好好!! 跟住落o黎就係重點!! 世界奇跡之：吉薩金字塔 (Giza Pyramids)!!
上面呢個就係最大o既胡夫金字塔 (the great Giza Pyramid of Khufu)。跟住我o係正下方望上去, 簡直....
隔住旅遊車塊玻璃窗影出去, 又有另一風味：
親眼睇過之後, 我完全唔認為佢地係出自人類手筆o既東西, 而且佢地o既位置、方向都同天上星晨吻合, 再加上內部o既斜道/ 密室… 五千年前可以做得到嗎?? 跟住去o左金字塔後面騎駱駝, 唔驚, 但原來佢地企o左起身之後離地非常高...
The 2nd and 3rd pyramids 遠景...
沙漠旅人...
既然一場來到, 當然要爬入去金字塔內部。最大o既 Khufu Pyramid 就唔使諗, 因為每日只限三百張門票 (唔知而家仲係唔係), 於是唯有去第二大的 Khafre。全塔只有一條通道, 先斜下向地底、再斜上到中央墓室, 全程大概百幾米長。裡面通風極差, 但既來之, 我當然要做個創舉：跳入石棺跑兩圈!! 哇哈哈哈~~~~!! 可惜埃及古蹟內部好多都唔可以影相啦...。
跟住出返去, 就o黎到獅身人面像 (Sphnix)。各位如果想睇就真係要快手快腳, 事關佢個鼻o既情況比米高積遜更惡劣, 我怕十年後連頭都會爆埋...。
睇到呢度, 已經係中午, 陽光超猛, 係時候去餐廳避暑...
餐廳裝修好好, 湯亦好飲, 係油o左少少咁啦...
中伏!! 奉勸各位, 地中海/ 中東地區o既沙律/ 冷盤唔好亂試... 你未必習慣o個陣味...
Main Course 係炸魚, 唔錯。
下午o既唯一行程, 就係舉世知名o既開羅博物館!! 當然, 內部一張相都唔可以影啦。
裡面o既展品多不勝數, 認真要睇的話, 兩日都唔夠, 而重點, 當然係圖坦卡門o既展品。終於親眼見到佢個金棺、金面罩、戰車、皇椅, 老老實實, 經超出震撼o既範疇。其他較深刻o既就有木乃貓、木乃鱷魚、木乃狗、同埋幾座超巨型石雕, 加上導遊o既精彩解釋, 好滿足。
門外有o的雕像, 隨便一個都係幾千年o既古董。
終於到休息時間啦, 先去酒店~~ 今晚就o係度訓?? 非也, 只係租佢間房一粒鐘去沖涼梳洗咋!! 醃o左三十幾個鐘鹹魚, 超辛苦!!
今晚要座通宵火車。開羅位於埃及北部, 而今晚就要去最南方大城市o既亞斯旺 (Aswan, 台譯亞斯文)。
開羅車站好殘舊, 一般平民乘坐o既火車更加連燈光都冇, 對我來講好不可思義。經過兩日勞累之後, 等火車o既時間簡直想死。
8:20 將行李搬入車內o既房間之後, 感覺尤如皇恩大赦。晚飯係車上解決, 係一兜有如飛機餐o既物體, 兩塊牛肉勉強可以入口, 但睇在黃薑飯同炸魚都唔錯o既份上, 我都冇精力再整杯麵啦。房間燈光不足, 一個人o係裡面實在有o的淒慘o既感覺, 忽然o係度諗：我到底點解會一條冷o黎到呢個地方??
但已經無法子諗落去, 9:15, 我成條死屍咁訓著o左...。
Part 1 打住咁多先, 工作關係, 可能兩三日先有更新, 敬請耐心等待.... |
發表於 1-8-2011 22:29:31
樓主
