Toysdaily 玩具日報

 找回密碼
 註冊
樓主: 魚旦

[趣味] 我引退 TD 前o既最後遊記 [第一彈]:埃及之旅 Part 6 已更新 (p.3)

[複製鏈接]
發表於 6-8-2011 00:09:33 | 顯示全部樓層
旦魚你好呀,無意中入黎見到你呢個post...我都好耐冇係td 出現過了,haha

好詳細呀...d 相影得好靚,冇記錯你之前好似去過神山的,haha,多謝你既分享呢~~
攪到我都好想去旅行呢~~期待你既第二彈,第三彈~:p
 樓主| 發表於 6-8-2011 10:59:24 | 顯示全部樓層
o係度計緊, 到底有幾多舊人可以俾呢個 Post 引返出o黎打個招呼呢??

真紅!! 虧你連我爬過神山都記得, 其實o個次半條人命攻頂之旅對我o既改變都幾大, 返o黎之後... 唔, 有o的似幾百年前o的道士 "上山學法" 之後o既感覺。你又點呀?? 次次都話 Plan 去旅行, 結果成o左事未?? 哈哈!!

廢話講完, Part 5 開始~

話說離開樂蜀o既古蹟之後, 就向東北進發, 目的地係紅海 (Red Sea) 西岸o既洪加達 (Hurghada)。o係o個邊會留兩晚就會返開羅玩多一日:



由樂蜀去洪加達要五個鐘車程, 抵達時已經天黑。今次入住o既酒店靚到不得了, 係希爾頓 Hilton Resort!!!



晨早起身, o係房門口迎接日出。





呢個早餐係全程最好啦...



酒店仲有個幾大o下o既私人沙灘....





你相信這是埃及嗎??







人工小島!?



當然, 總有人鐘意泳池o既....



五十二度!? 應該冇咁誇張, 但我諗三十五、六一定走唔甩。



酒店外街景。過少少就係商店街。




洪加達係一個新建成o既海邊城市, 上世紀初期佢同香港一樣只係條小漁村。呢度面臨紅海, 亦即係分隔開非洲大陸同西奈半島o個一片水域。呢個城市離歐洲主要國家只係四、五小時機程, 所以就成為歐洲人短線旅遊o既熱點, 唔... 情況有o的似香港人去泰國咁囉。

食完早餐、執好自己o的眼耳口鼻就直衝去碼頭出海。租完浮潛用具上遊艇, 埃及之旅原來船隻先係主角, 意想不到。



循例影o下架船啦...



水手們!! 海上的男人...

  
都算係海天一色o架。

  

海鷗!! 用枝 17 -55 去打雀, 係咁上下啦....



一個鐘左右o既船程, 去到目的地附近o既海域, 果然水質都唔同o的, 用某牌子冰涼漱口水去形容個顏色同透明度, 恐怕都絕不為過:



上岸啦。無錯, 係一個海島, 娘到叫做 "Paradise Island"。但實在有o的唔妥… 點解成個島一棵植物都無o架!? 實在要承認我見識唔夠多, 呢度竟然係一個荒島!! 我從未想像過一個島上面可以只有粗沙…。


  
不過, 水真係好清....



跳落去啦~~~!!!!



但落水之後又一個估佢唔到, o的水鹹到你死, 十足落o左四倍鹽o既泡菜。兩年之後有一次我去外地潛水, 偶然同一個一齊出船o既英國仔閒談, 佢亦覺得紅海係世上最鹹o既海域之一....。

睇上面o個幾幅相, 係咪覺得我做o左無人島島主呢?? 查實o係鏡頭後面, 個情況是咁的:



呢o的仲唔係漱口水!?





回程了....



又係字數太多, Part 5 要分上下兩半....
 樓主| 發表於 6-8-2011 11:28:45 | 顯示全部樓層
Part 5 下半

上岸之後, 匆匆趕去酒店沖身, 因為接住又要仆出去啦。今次輪到勇闖沙漠!!

查實o係埃及走o左咁多日, 睇到o既沙漠都唔係心中所想o個種。沙漠唔係應該有沙丘、沙上有被風吹成o既蛇仔紋、沙粒幼滑得可以舒舒服服訓o係上面o架咩?? 但連日來我踏足o既似乎係爛地咋喎。

終於, 到今天先有機會深入無道路o既沙漠地帶, 真真正正睇到佢o既真貌。



今次係座四驅車進入埃及東部o既努比亞沙漠 (Nubia Desert)。我座車頭、窗外風景愈走愈荒涼、車轆o係沙漠上捲起漫天飛沙、身邊o既司機係o個種戴著頭巾o既正宗阿拉伯人… 心中不其然響起 "奪寶奇兵" o既主題音樂同埋諗起 Doctor Jones 條鞭…。



風塵...



一望無際, 所以部車都開得好快...



到o左個大沙丘, 終於可以落車爬上去。

下面幅相本來用錯 Setting, 影到一片黑色, 事後夾硬執返光佢, 反而有o的特別....



開始日落...



人要如何在此生活?? 如果我o係呢度出世, 又會點??





向太陽怒吼~~!!



見到我地o既車痕嗎??



我的足印...



下面呢幅... o的 Friend 話似做緊巫術儀式...



落山啦!!



其實好鬼斜:





都仲係日落:





我們的車隊。





下面呢幾幅最後餘暉, 係o係極度車震o既情況下拍攝 ---- 司機開得好快, 而且沙漠路上不平, 十足座緊過山車。影o既時候根本冇可能知道自己影到o的乜, 只能夠調高快門、再用手動對焦至無限遠, 確保o的相清清楚楚....











我地繼續入到沙漠深處, 向貝都因人 (Bedouin) 村落進發。o個度係一條極窮困o既村落, 以前同外界完全隔絕 ---- 村民因對真神 (伊斯蘭教, 埃及係伊斯蘭國家) o既強烈信仰而自行居於荒漠地帶。

佢地雖然窮, 但o係佢地o既眼睛裡面, 我察覺唔到任何一點淒慘、亦無機心或者貪婪, 比起o係遊客區隨處遇到o個種死要小費貼士o既埃及人, 貝都因人實在有尊嚴得多。



佢地而家因為有遊客, 生活先變好, 以前就唯有靠織布之類...







晚餐就o係呢條連電都冇o既小村度食, 未到六點天已全黑, o係沙上席地而座、單憑蠟燭照明o既呢一餐非常特別。



都幾好伙食o架~!!



回程時架車o既巔坡之處有增無減, 而抵達其中一處沙漠平原時, 司機停落o黎俾我地睇星。老遠由香港帶o黎o既三腳架終於派上用場啦!!

用 B 快門去曝光十分鐘, 小小星軌照片就此誕生。





如果有三十分鐘就好啦, 可惜團體行動, 總無可能為我一個而留低 (再講, o個度係一望無際o既沙漠, 萬一被拋棄就只有等死…)。

晚上 8:30 左右終於返到酒店, 體力嚴重低下, 但仲要再撐半粒鐘, 因為我要去對面o既商店街買土產!! 滿載而歸地買o左一堆擺設, 總算可以休息啦…。

Part 5 完。
發表於 6-8-2011 11:49:43 | 顯示全部樓層
本帖最後由 Douglas.M.Saint 於 6-8-2011 11:51 AM 編輯

Honestly, I also wanna visit Egypt in 10/2011 to celebrate my marriage 5th year anniversary... Because of political issue, change the plan now.......... :79:

Anyway, wish u have a better live and see you here one day! :77:
發表於 6-8-2011 12:01:41 | 顯示全部樓層
埃及~~~~~我都想去 :handshake: 可惜~~~~no money no talk :help:

有時間再上下黎囉~~~~:DD
發表於 6-8-2011 12:28:58 | 顯示全部樓層
小弟覺得樓主這個未完遊記, 好過好多巿面的旅遊雜誌如, X假期, X magazine.....; 每次睇完樓主小部完結, 也令小弟追睇及期待的心情; 支持樓主! :77::71:
(點解每次D疑似令女相只有背面 / 小側面........ ) :63:
 樓主| 發表於 7-8-2011 00:45:52 | 顯示全部樓層
Honestly, I also wanna visit Egypt in 10/2011 to celebrate my marriage 5th year anniversary... Becau ...
Douglas.M.Saint 發表於 6-8-2011 11:49 AM


德哥, 都真係好耐冇o係度同你交流過啦。可能始終曾經去過埃及, 所以今年年頭o個陣我都好留意當地局勢, 只覺得革命該當如此。相比之下, 香港一班政棍同年輕人上街所 "要求" o既事情, 實在不值一提。

以我所知, o個邊而家已經冇晒事, 而且因為遊客仍然唔多, 大部份景點都可以俾你反轉o黎玩、影幾耐相都唔怕阻到其他人。

至於將來我會唔會仲o係 TD, 睇怕最多只會買樓後影埋個 Display 櫃出o黎, 其他都未必啦....


埃及~~~~~我都想去  可惜~~~~no money no talk

有時間再上下黎囉~~~~
黑色三連敗 發表於 6-8-2011 12:01 PM


連敗兄, 其實計返條數, 去埃及一o的都唔貴。以一般玩十日o既旅行團o黎講, $13000 - $17000 應該係全包價, 去五日東京買多少少o野都唔只啦。

反而假期先係最大問題呀。

小弟覺得樓主這個未完遊記, 好過好多巿面的旅遊雜誌如, X假期, X magazine.....; 每次睇完樓主小部完結, 也 ...
roystoy 發表於 6-8-2011 12:28 PM


首先多謝你支持先!!

又唔可以咁比較o既, 始終人地o的雜誌個個星期要出咁多稿, 又要顧及讀者口味嘛。

至於o的靚女相o既問題, 我唔想咁缺德去擺明影人地, 亦唔希望其他人將我同某o的龍友混為一談...。就例如金髮女郎 + 聖甲蟲o個一幅, 我都有向女主角打聲招呼、佢唔介意先去影。
發表於 8-8-2011 02:54:51 | 顯示全部樓層
d相真係好正:71::71: 大大用咩型號ge相機?.?
睇完呢個遊記 之後發現 去旅行真係唔係淨係得日本先可以去
見到d古蹟真係好宏偉 好想親身去睇下 體驗下:71:
發表於 8-8-2011 03:13:26 | 顯示全部樓層
waaaaaaaa! what a great post ~!! best of the best!
when I want to sleep , see this post ~!!!!!  cant stop~!!!!!
until finish all~!!!!!

thanks yours share~!!!!!!!! like your post, like your style, like your talking~!! thanks~!!

thank you so much, dear old member ~!! :79:
發表於 8-8-2011 16:06:25 | 顯示全部樓層
連敗兄, 其實計返條數, 去埃及一o的都唔貴。以一般玩十日o既旅行團o黎講, $13000 - $17000 應該係全包價, 去五日東京買多少少o野都唔只啦。

反而假期先係最大問題呀。

咁如果2個人去都ok喎~~~~:D
 樓主| 發表於 8-8-2011 19:05:55 | 顯示全部樓層
skbe 兄, 我到而家都係用緊 Canon 400D, 已經五年啦, 一日未壊都唔會換機住。至於鏡頭, 冇記錯o既話去埃及o個陣我帶得一枝 17 - 55mm f2.8 咋。

JoJoFans 兄, 多謝棒場。粗略估計, 我仲會出多兩篇古文明國家遊記同兩篇其他遊記先會同大家講再見o既, 不過可能冇呢一篇咁多o野睇啦。

酒店o既餐廳冇咁早開工, 佢地前一晚已經準備好打包早餐盒 ----



各位, 我可以好肯定咁同你地講, 呢兜o野係榮登 "最可怕早餐榜" 亞軍o既物體, 堂堂 Hilton 竟然夠膽用佢o黎見客, 我真係服得好緊要!! 畫面右手邊o個兩條o野, 我家o下見到都想嘔....。

順帶一提, 我本人覺得最最最最難食o既早餐榜冠軍, 竟然係日本傳統早飯喎。

回歸開羅o既車程大約需要六個鐘, 正好用o黎繼續訓覺。期間當然有休息站, 呢個時候望見對面有一條河面, 一問之下原來佢就係大名鼎鼎o既蘇伊士運河!! 下面張相影得唔清楚, o架貨車後面就係啦。呢條運河打通o左地中海同紅海、可以直出波斯灣同印度洋, 冇o左佢, o的船就要經直布陀羅海峽出地中海, 再老遠兜去南非好望角先可以向東行....。



捱完六個鐘車, 終於返到開羅, 食最後一餐 Buffet Lunch~~



途經市中心, 當然會遇到.... 塞車... 呢個係所有發展中城市o既問題....



下面呢座清真寺設計非常獨特, 成個電單車頭盔咁!!



開羅老城區, 真係好舊....



下一個景點係撒拉丁大城堡 (The Citadel of Salah Al- din), 佢可能係開羅唯一一座可以公開俾非回教徙參觀影相o既清真寺。原本係一座貨真價實o既城堡, 約一千年前撒拉丁將軍就o係呢度防御十字軍攻擊。撒拉丁, 何許人也?? 佢係一位回教史上備受推崇o既大將軍, 多次成功擊退意圖滅絕異教徙o既十字軍。當年就算係天主教o既敵人, 都要讚佢係一個真正騎士。





城內建築唔算好華麗, 但個拱頂就俾人宏偉o既感覺。



裡面大堂有 365 個#燈, 代表著一年 365 日, 排列同構圖都好靚。





中庭, 主要係回教徙入寺前清潔自己o既地方, 地板係全雲石。





我非常鐘意下面呢幅:





前院廣場可以遠望開羅舊城區, 你唔會相信一個城市原來可以破落到咁樣, 睇o黎佢地真係冇諗過重建。











輪到市集啦!! 開羅o既哈利市集 (Khan el-Khalili Bazzar) 自古已經非常有名, 係非洲同地中海南部一帶o既貨物集散地。又大又亂, 而且唔好用一般常識去衡量, 佢o既面積橫跨幾個區, 內裡o既直街小巷亂過迷宮, 我只o係賣遊客貨色o既區域行o下咋。其他本地人會去o既區域誌蛇混雜, 非必要都唔好走入去....。





最後晚餐係阿拉伯式燒雞....



酒店太靚啦, 係位於開羅市郊o既喜來登 Sheraton~~!!!



好大的房。



順便影o下當地o既硬幣, 都幾靚o架...



早餐餐廳....



往機場途中, 最後影相o既機會~~~!!!



Long & winding road...





上機啦, 埃及再見。



臨走前發生o左o的小意外, 開羅機場電腦系統全 Down!!! 結果要人手 Check- in、人手安排飛機升降, 原本 12 小時o既機程變成 14 小時.... 原本想o係新加坡轉機時慢慢歎碗叻沙做早餐, 結果... 冇啦, 冇啦, 全部都冇啦.....。

最後送上新加坡的天空。



屋企趕住開飯, 旅遊後記同感想今晚夜少少再補上。
發表於 8-8-2011 20:35:34 | 顯示全部樓層
又膚淺問一問先 ~ 用左幾錢 ?  :61:
發表於 9-8-2011 11:51:28 | 顯示全部樓層
:handshake:大大o既相同介紹真係好吸引, 令人好想去下
 樓主| 發表於 9-8-2011 18:28:02 | 顯示全部樓層
呢排 TD 晚晚都慢, 所以谷鬼氣今日先打埋個尾佢。

先回返 Jojofans 兄, 我o個陣加加埋埋大約用o左 $15000, 十日入面又住郵輪又五星級酒店, 絕對唔係貴。不過去到樂蜀就有一樣好出名o既玩意我冇機會玩 ---- 熱氣球。我去o個陣因為有太多熱氣球而令航空安全出問題, 當地政府下令暫停相關活動, 要整頓好業界先至可以重開。如果玩埋呢個, 要預多 $1000 - $1500 港幣。

好啦好啦, 講多幾句就可以正式完結呢篇遊記。

呢個旅行, 對我來講都非常特別, 係我第一次衝出亞洲。以前成日都覺得自己會去o左歐洲先, 但多年以來, 身邊o既朋友唔係話冇錢、就係冇假, 再唔係就要陪另一半去, 甚至連我o既前度、前前度女友都講講o下就冇o左回事, 總之拖o左幾年都係得鑊無米粥。最後, 我決定唔再等其他人, 自己出發。我好肯定將來要搵伴去歐洲絕對比去非洲容易得多, 所以就揀o左埃及。

一聽到去呢o的地方, 首先要擔心o既, 好自然係安全問題, 始終係非洲喎!! 落後喎!! 回教國家喎!! 近住中東喎!! 乜乜乜喎!! 但其實絕對唔需要咁擔心, 一般旅遊區、大街大巷, 其實治安好好。當然我唔肯定o的橫街係咩光景, 但既然自己身為遊客, 似乎亦要負責自己o既安全, 避免走去o的覺得有問題o既地方。

天氣方面, 可能我十月中出發啦, 所以並冇想像中咁難捱, 但據了解七、八月真係熱得死人o架。衣著就睇個人體質, 我自己就全程短褲拖鞋。

出發前要主意o個段期間是否回教齋戒月, 因為齋戒期間, 各方面都會有些許唔方便。冇錯, 佢係一個回教國家, 但就唔同伊朗一帶o既什葉派, 所以寬鬆好多。人最緊要係互相尊重, 冇人有權利去對他人o既信仰置喙, 你可以唔認同, 但因為一o的新聞報導而存在偏見、又或者覺得自己高人一等, 就萬萬要不得。

食物真係要留意一下, 當地o既食物並唔係咁差 (但, 總有o的你會好很難忘....), 之不過食三、四餐之後你一定會好厭悶。就算每餐有唔同o既菜色, 但都會覺得食落去冇乜分別, 所以杯麵、乾糧、零食一定要有所準備, 而且最緊要帶埋個旅行型o既電水煲去煮麵, 否則要叫 Room Service 就笨實啦...。總之, 我o既忠告係小心沙律.... o個o的香料o既味我敬而遠之....。

另外就係水, 大部份中東/ 沙漠國家都要收錢, 去到餐廳佢地係唔會有水免費供應, 所以一係就叫飲品, 一係就同佢地買樽裝水。而尼羅河o既水比恆河乾淨 N 倍, 當地o既餐廳料理就算係用河水處理, 都唔需要太過擔心。

埃及人大致上係熱情友善o既, 而且好鐘意同遊客打招呼。另一類人就係所謂o既 "店鋪 One Dollar 黨", 佢地永遠都話所有貨品只賣 One Dollar (美金), 都幾煩o架。

最後就係攝影器材o既保養, 如果各位會去沙漠的話, 就記得小心相機會入沙。沙漠o既沙粒比海灘o個o的幼細得多, 而且因為有風、無水, 沙粒好易被吹起, 咁就機會走入相機/ 鏡頭零件之間o既罅隙 ---- 我就係咁奶o左o野, 返到香港先發現鏡頭個 Focusing Ring 卡卡聲。好彩拎到返廠, 佢一拆開枝鏡o的沙就倒返晒出o黎, 只係收我 $100 檢查費...。

唔... 應該係咁多啦, 遊記第一彈就此結束。o黎緊第二彈會暫別重口味古文明, 去o的 Hea 一 Hea o既地方, 多謝捧場。
發表於 10-8-2011 10:48:16 | 顯示全部樓層
埃及真係好正, 希望我有生之年都可以去走一轉la :42:

期待魚旦兄黎既遊記 :64:
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 29-3-2024 09:05 PM , Processed in 0.037489 second(s), 13 queries .

Powered by Discuz! X3.4

Copyright © 2001-2021, Tencent Cloud.

快速回復 返回頂部 返回列表