MIA MS-06R-1A/3S 黑色三連星專用高機動型渣古 [小改造]

siegheil

MIA MS-06R-1A/3S 黑色三連星專用高機動型渣古



日本人做產品，真係有樣好，就係對極緻嘅追求！就睇玩具為例，玩具廠經常都會返出一啲同款嘅產品，MG系列有Ver.2、MIA都有2nd ver.之後仲有EMIA，而新模型系列RG亦出廠在即...睇人地講玩具，好多時都話係間廠呃錢，出完又出，只係改少少...但我又有唔同睇法，我覺得係日本人傳統追求極緻嘅一種表現方式，出透明件或者限定版，你可以話佢呃錢，但出2nd ver(MIA)、EMIA就肯定唔係，人地真係重新設計過啲關節，出過個模，配件都會有唔同，睇唔出係呃錢之作...不過MIA / EMIA都已作古啦~隨住ROBOT魂嘅出現，連HCM Pro系列都結束埋...

借題發揮完...拿！拿！拿！你地唔好「誤會」呀...我唔係講香港同大陸啲人淨係識抄呀！你可以咁理解，但我唔係咁Present架！講返隻MS-06R-1A~今次隻MIA，係2nd ver，比起初代MIA，關節方便活動性有好大改善，遲啲可以影吓隻初代MIA嘅MS-06R-2A專尼•萊登專用高機動型渣古改良型俾你地比較吓~(唉~都唔知啲名改咁長做乜...再講多次都驚自己嗌錯...)，而後期EMIA大致上都係採用返MIA 2nd ver.嘅關節設計，改良部份不大，所以，MIA 2nd ver已經可以算得上係一個成熟嘅系列。


(左) MIA 2nd ver 原裝版本；(右) 改造後之03•蓋亞專用機


(上) MIA 2nd ver 原裝附屬之火箭砲；(下)MIA 初代大魔之大魔砲

話明係黑色三連星，我梗係買3隻返嚟啦~黑色三連星嘅MIA產品，之前出過MS-05B，呢度唔詳細講啦~有興趣嘅，自己喺我堆玩具相度搵啦~果3隻MS-05B，特別之訖係有3款唔同編號，當然係跟返設定嘅「02•奧爾廸加」機、「03•蓋亞」機、「06•馬殊」機啦~不過可惜嘅係到咗出MS-06R-1A果時，只係有「03」一款編號，曾經有人講過話有出過其他編號同埋有金色邊嘅特別版本，不過我連影都未見過...於是，我只好買3隻「03」返嚟擺住先...咩叫擺住先呢？就係因為遲早佢地都會變返做02、03同06三部機...當然，所謂遲早，即係可以遲，又可以早啦~至於遲到幾時？梗係遲到整好果時啦~哈哈~！

今次放得上嚟，當然唔會只係將3隻野拆盒影相咁簡單，到今日為止，三連星呢套野，總算完成咗第一階段改造，就係將03蓋亞機嘅頭部加返隻角，而第二階段，就係將另外兩部機嘅編號改埋做02同06。



(上) MIA 2nd ver 原裝頭部；( 下) 改造後之頭部，因為用咗半光澤油，顏色質感明顯唔同，隻角係TV版款式，三連星我都係喜歡用返TV版隻角，白狼同萊登我就會用較新設定版本嘅角~

所謂「加返隻角」，聽落去就似係「改造」，不過事實上，我只係將MIA 2nd ver隻MS-06S/CA個頭噴咗黑色，而且仲係用罐裝噴油...貪佢事後拍拍羅柚走得，唔駛洗野...換咗落去就搞掂，既冇「改」，亦冇「造」過...最大工程就係兩邊氣喉阻住噴色，最後都要剪佢落嚟，噴好色再黐返上去...哈哈~之前試過將MIA 2nd ver支大魔砲放落去用，發覺完全唔啱位，就算用手揸得住，個姿勢都怪怪咁...不過，意外收獲就係我最近買咗隻MIA初代嘅MS-09沙漠版大魔(US版)，順手就將果支大魔砲換埋落去俾MS-06R-1A用，於是，就變成相裡面果隻啦~呢個設計，係參照MG模型說明書裡面嘅設定資料而得嚟~



至於第二階段，遲早都會開工整埋佢...所謂「遲早」之前已經解釋過...




後話一：
其實黑色三連星，算唔上係我喜愛嘅角色之一，包括人物同機體都係，不過佢地夠大堆頭，一套3件，擺響庶比較有睇頭，於是，三連星系列係我儲得最齊嘅產品之一，計有MIA：MS-05B(02、03、06)、MS-06R-1A(03 x3)、MS-09( x3)、MS-14S(無錯！係MS-14S！貴到爆嘅限定版！我最後只係買咗一隻，不過諗住收埋佢，唔放出嚟，另外買多3隻MS-14B專尼•萊登版，改色加工改造囉嚟擺~)；HCM Pro都有MS-09黑色三連星套裝~其實我仲有打算玩少少改造，整埋MS-06C同MS-06S，至於有關設定，有機會先再寫啦~料我就有架啦~只係懶得寫啫...

後話二：
點解咁捨得將隻MIA 2nd ver MS-06S/CA拆咗個頭俾蓋亞機用？因為我完本已經將佢跟嚟個Mine Player背包拆咗俾另外一隻MS-06F、S型個背包又拆咗俾另外一隻EMIA MS-06F改造成MS-06S型，用嚟擺渣古小隊，心水清嘅大可以又去堆相度摷摷~不過講明先，相裡面個背包仲未改架~至於其他武器？支MMP90俾咗隻大魔用，因為果隻大魔支砲俾咗第個用，個機身都冇嘥~將另外一隻拆散咗嘅MS-06R-1A個頭改返落去，噴埋色就可以變成MS-06C/CA 魯姆戰役版！環保呢！真係冇嘥架！我都話俾我算過...死草都無條架啦！

後話三：
點解我又會有一隻MS-06R-1A可以拆散咗淨返個頭？其實好簡單，我拆咗佢對腳俾另外一隻EMIA MS-06F，用嚟改造賈圖專用MS-06R-1A，而支鎗，就俾咗果隻可憐俾人囉咗支砲嘅初代MIA沙漠色大魔，可能大家都仲會問，計計吓，究竟我有幾多隻MS-06F...根據粗略計算，單以EMIA計，我都有一打...朕駕崩果時應該可以有渣古俑陪葬，等朕可以落去玩基力之野望~哈哈~

Last update嘅MIA系列相簿，有咩冇咩自己睇啦~

http://hk.myblog.yahoo.com/siegheil.leoyeung/gallery?fid=164&page=1

siegheil

其實就係因為懶，所以先冇砌模型，但又想整啲自己獨有嘅作品，於是就用MIA搞吓小改造，只要少少心思，即使簡簡單單嘅改造，效果亦不俗~反而比較沉醉喺搵資料，搵設定嘅樂趣~

影武者

我對於不同 ver. 推出，不認為是呃錢，我覺得有多d ver. 給愛好者選擇是好事，出品商無強迫人要出什麼買什麼，相反只是消費者的選擇。
另作為一間出品商，產品應該是要有進步及要求，在於出品商本身，要有不斷的出品來營運獲利也是好正常哩。

最後一提，在機動戰士眾多機體中，渣古一定能列入我喜愛之一。

ROGERHUIHK

多謝分享

ZEONIC

多謝分享 !