|
樓主 |
發表於 17-10-2008 01:41:00
|
顯示全部樓層
101: 採珠: 夾開紅藍樽裝 pental塗改液, 取出裡面的鐵珠。
102: 角色扮演: 細個果時,真係咩都爭一餐... 四大天王,美少女戰士,五星戰隊... 大家要選定一個歌星or角色屬於自己,而其他人唔可以同人重複選擇... 所以,每逄有新卡通片,都會盯實個電視... 因為唔想俾人揀左自己鍾意既人。
103: 繩網: 一個用兩層樓咁高既繩做金字塔。細個同啲村童鬥快喺繩網走一個圈,最快都係4-5秒到...又係繩網上面玩捉,d細路個個身手都好似d猴子咁敏捷非常, 係繩與繩之間穿插跳躍。
104: 駕輕就熟: 細過坐巴士一定會叫呀爸呀媽坐上層既車頭窗口位,因為可以扮司機開車,仲會自己扮埋開車果d 聲。
105: 麻雀骨牌: 用麻雀一隻隻咁砌骨牌。
106: 麻雀起屋: 用麻雀係麻雀台上面砌一d 平面既牆整屋,砌床砌台又砌梳化。間格好事正,三房一廳,白板做電視機,一筒做馬桶,二筒做廚房煤氣爐,八筒做HI-FI對大喇叭,六索做廚房星盆...等等等等。之後每人拉隻麻雀做自己,就係間平面既屋入面生活。
107: 彈指神功: 將M記飲管捲捲捲捲捲到勁短...跟住谷恆中指....一野彈落去~ "BARK 一聲",無堅不催!
108: 遠距離痾尿:只限男仔,對準尿兜or馬桶, 開始發射後向後行,尿尿要準確落在尿兜,但最後要行番前,如果唔係會整濕個地。可以同朋友一齊比賽。
109: 過尿兜: 只限男仔,地點一定要係有一排尿兜既廁所。對準是但一邊最邊既果個尿兜, 開始發射後向左向右行,尿尿要準確落在尿兜,要練到收放自如,好講求控制力。一樣可以同朋友一齊比賽。
110: 二手煙: 凍天呵d煙扮食煙!
111: 鐳射死光: 係屋企用紅外線射街d人。
112: 一飛沖天: 用任何糖紙捲成一枝小火箭,火箭前端是尖的,末端是下陷。玩法是輕含著小火箭末端, 然後用力吹。距離因人力度異議 ~ (因為亂飛關係, 小心打中眼部)
113: 陪去廁所: 特別係女仔,成日都會搵人陪去廁所!仲要係入埋同一個廁格入面.....但係大家唔如廁時,另一個又唔可以望....要拎轉面。
114: 廁所潑水節: 小息去toilet方便完洗手個陣,如果見到後面既廁格有人既話,就用手裝d水,然後凌空由上面潑入去個廁格度,跟住極速跑返課室....
115: 萬字夾青蛙: 讀書時候用萬字夾屈出有四隻腳形狀類似青蛙外型既動物,一按後半部份會跳好遠...仲可以自由發揮外型。
116: 萬字夾心心: 用萬字夾屈心型用黎夾喺書上做bookmark。
117: 銀紙心心: 用紙幣摺心心放銀包(好多人用100蚊黎摺)。
118: 香筆盒: 將香珠放筆盒(但係會搞到d香珠好污穢)。
119: 反目驚魂: 將眼皮反出來。
120: 猜跳: 一個猜一個跳仲加埋一個人肉電子版(舉起雙手顯示俾跳o個個人要行幾多步),分兩組比賽猜既, 猜得勁快, 跳既根本唔駛睇.....因為人肉電子版 唔理跳既 跳左未,都繼續舉......所以跳既就不停咁衝, 演變成鬥快跑=________=
121: 掂線捉人: 以操場上籃球d線/唔格仔地唔同色既階磚為線,捉o個個要踩住d線捉(掂)人,仲可以同被捉既拖手形成人鏈,o係線以外捉人,但其中一人一定要掂住線......玩到要擘一字馬捉人,好刺激!
122:超級無敵飛輪海: 先用鎚仔揼扁汽水蓋,除左維他奶蓋,因為維他奶蓋中間有粒木塞,比較麻煩,跟住用釘係中間釘兩個窿,再用一條幼麻繩(約兩呎),係中間串埋兩個窿打結,最後用兩手,兩邊套於掌心於兩邊繩頭串起,向外而內一伸一縮,中間的汽水蓋便會轉動,這時便可以於地上(石屎地表面)擦出無數風火輪式的火花,細蚊仔時候玩得好開心丫。
123: 彈弓火箭: 用d 彈弓原子筆, 倒轉佢鬥彈得高。
124: 枕頭武士: 用枕頭做盾牌,攬枕做劍,同人比武, 仲會有晒招式!
125: 輪住黎困: 細個時住公屋,鐵閘同木門中間有條"乸",最鐘意將阿妹困係中間,數五下開返度門,跟住輪到困我...跟住比阿媽鬧!
126: 自制雞毛筆: 偷偷地將呀媽條雞毛掃d雞毛掃逐條逐條咁"蚊",得閒"蚊"一條,得閒"蚊"一條,最尾"蚊"到無哂。之後扮以前電視見到個d洋人咁,用蚊出o既雞毛個頭,點d寫毛筆用o既墨水,當筆用,但最後係唔得o既,因為個頭跟本吸唔到墨水。
127: 呵呵呵: 係玻璃窗上面呵氣寫字。
128: 收集雨水: 下大雨時,拎個器皿係屋企伸手出窗外載雨水,載得愈多愈開心,但唔知載黎仲乜。
129: 小小工程師: 拆爛屋企o既小電器,如鬧鐘或者玩具,諗住研究下佢個結,以為可以做個發明家。之後嘗試自己砌番佢,但通常都係失敗。
130: 點穴神功: 細個睇完啲武俠片,就會學人哋咁"點穴",係咁用手指去點其他人,諗住被點個個人真係會停咗唔郁得,最抵死既係,真係會有朋友仔配合自己唔郁....
131: 紙碎起舞: 小學時候,好鍾意搣D紙碎,跟住張把膠間尺夾係胳肋底到前後磨擦,再放D紙碎上面,整到D紙碎gut起哂好似跳舞咁呢!果時覺得好得意,因為仲未知咩野叫做靜電....
132: 痴牆: 小息果陣必玩!一大班人玩 ,會有1個人捉人,邊個冇dim住牆就可以捉,但係唔可以長期dim住牆!會有傳電,某一隻腳仲痴住牆等等既奸招出現!
133: 打豹虎: 即係鬥金絲貓。有甚麼孫悟空,牛魔王既「品種」(其實都係d生意佬自己改既名),唔同「品種」基於體型既分別會有唔同既戰鬥力。隻金絲貓平時放係個竹葉摺成既筒狀竹籠入面,會用d金絲貓仔放入去比佢食養佢,到咁上下認為夠fit就會拎去同人打。果時係小學門口會有人賣,冇錢買既就會自己上山捉。最傷心係儲左好耐錢買左隻金絲貓返黎同人打時一野比人食左or打開個竹籠時比佢跳走左.....
134: 一網打盡: 用膠袋捉烏蠅,捉成袋唔知做乜。
135: 迴轉細佬仔: 在公園係咁轉個「沊沊轉」睇吓邊個飛出嚟!
136: 登梯: 在公園的滑梯逆行而上。
137: 連體鞋: 把同學的鞋帶縛埋一齊。
138: 火燒連環柴: 玩火柴,一次過燒晒成盒雙喜火柴。
139: 始創電話: 用兩個紙杯中間加條線做通話器。
140: 另類糖果: 無糖食果時,食阿媽的片糖或冰糖。
141: 拍卡: 用張卡放係地下,可以係YES 卡或其他公仔卡。用手係卡邊大力一拍,造成既風會令卡翻轉,翻到就贏,如果人地翻到你果張,你果張就會變左人地既卡喇。拍卡都好有技巧,例如雙手拍果時要輕輕”谷”起,咁樣易拍出風;其次會將d卡微微向下屈曲,令卡既兩邊唔會趬起,冇咁易被吹反。
142: 造假幣: 硬幣仲有一種玩法,將白膠漿倒上面,之後風乾佢幾日,一係就拎去吹下冷氣等佢快dd乾,乾晒之後佢會變透明,meet落黎又變左一個個晶瑩剔透既錢。
143: 揸lift人: 搭lift既時候, 趁無人, 自己出lift之前按所有層樓既制。
144: 織女: 女仔好鍾意買d繡花線, 織手繩比心儀既男仔. 以前d女仔好鍾意上堂貼左手繩頭, 係咁織, 比d男仔話間課室變左庇護工場。
145: 朝夕相對: 將d偶像海報, 夾響課本同包書膠之間。
146: 眾裡眾他: 寄同學仔d相上yes 既「眾裡眾他」或者選校花校草。
147: 畫鬼臉: 上堂唔留心, 將教科書入面d公仔, 頭上畫兩隻角, 加d長犬齒。
148: 三分射手: 坐響自己位, 隔遠將搓埋一舊既紙, 當射三分咁射入課室垃圾桶。
149: 小心扒手: 小學排隊上課室, 放學, 最鍾意趁前面既同學唔為意, 拉開佢地既書包拉鍊,拎入面d 野出黎。
150: 人多擠迫: 排隊時扮晒迫推黎推去。 |
|