|
|
|
(麻帆良市時報記者鹿目まどか報導)
早於 1970 年代發展屯門新市鎮之時, 當時嘅港英政府已經預留空間以興建貫通屯門及元朗嘅西北鐵路系統,
即係現在嘅輕便鐵路, 經過多番研究同波折, 於 1984 年中, 由當時啱啱成立嘅九廣鐵路公司接納同研究建造整個鐵路系統嘅細節,
最後九鐵批出輕便鐵路第1期系統合約予澳洲禮頓城市運輸集團 (Leighton Holdings), 並且於 1985 年 7 月正式動工,
於 1988 年 9 月 18 日正式通車, 服務屯門及元朗區嘅市民。為左方便屯門東北部及南部嘅居民,
又興建 3 段支線 (屯門支線), 分別連接屯門碼頭至友愛、友愛至三聖、 同市中心至屯門東北,
於 1989 年11 月動工, 並且喺 1992 年 2 月全線通車。
隨住天水圍新市鎮嘅發展, 特別係當時新落成大型私人屋苑嘉湖山莊入伙,
當地居民對於進出天水圍交通需求亦隨之增加, 輕鐵於是決定喺青山公路主線塘坊村站附近嘅灰沙圍,
興建一條新支線通往天水圍, 是為天水圍支線, 喺 1993年 1 月通車,
並且喺後來再作擴建工程, 以連接喺 2003 年通車嘅西鐵線。
用車方面, 早期嘅輕鐵使用由澳洲 Comeng 提供嘅輕鐵列車行走, 全數 70 架 (1001 - 1070), 亦被稱為第 1 期列車,
其中編號 1004 同 1070 嘅輕鐵車輛，分別被冠名為「輕鐵先鋒」同「史禮賢」,
因為 1004 係最早抵達香港並送上岸嘅輕鐵車輛 (1987 年末抵港) 而 1070 就係紀念史禮賢先生對建造輕鐵系統嘅貢獻,
不過上述兩部列車分別喺 2011年進行翻新工程之後, 再冇印上「輕鐵先鋒」和「史禮賢」嘅字樣。
到 1992 年再引入 30 架日本川崎輕鐵列車 (第 2、2T 期列車), 編號 1071-1090, 另外 1201-1210 係拖卡列車, 不設駕駛室。
跟住到 1996 年再向澳洲 Goninan 引入 20 架輕鐵列車 (第 3 期列車, 1091 - 1110), 喺 1997 年投入服務。
踏入二十一世紀, 為應付九龍南綫啟用後嘅客量增長, 九鐵喺 2007 年中決定增購 22 架新輕鐵車廂, 亦即係第 4 期列車,
並且由中國南車南京浦鎮公司同澳洲 United Group Rail Service Limited 共同取得九廣鐵路公司嘅輕鐵車輛合約,
United Group 負責車體嘅總體設計, 而南京浦鎮就負責整裝同調整測試,
呢批第 4 期列車亦係第一批喺中國大陸生產嘅輕鐵列車, 新車喺 2009 至 2010 年間陸續付運到港,
令輕鐵車隊數目增至 141 卡。隨住九廣鐵路同地下鐵路喺 2007 年正式合併並且更名為香港鐵路 (港鐵),
輕鐵亦順理成章地由港鐵擁有該部門嘅車輛、路線等嘅管理同營運權。
今日, 麻帆良市正式歡迎輕鐵第 4 期列車登陸!!
市長 Super Bus 話, 佢入巴士同消防車就入得多,
鐵路列車就反而冇乜點入, 因為始終佢對鐵路車輛認識實在太少,
話雖如此, 但係佢對鐵路車輛始終都有少少興趣,
佢話多年前某廠商推出橙色車身嘅第 1 期輕鐵列車模型,
本來好有興趣入番架, 奈何缺乏資金結果眼白白睇住模型售罄,
到依家想入番卻亳無機會, 心感不甘,
始終佢以前入屯門元朗都坐過呢尐 1 期列車好幾次, 點都有感情,
今次呢架四期輕鐵列車, Super Bus 其實都曾經作過內心掙扎,
原因係因為呢批四期列車, 真車係中國大陸製造,
而 Super Bus 一向以來對中國大陸製造嘅車輛同鐵路列車亦存在一尐偏見,
認為質素始終唔及外國製造嘅來得好同比到人信心,
不過 Super Bus 亦話, 今次呢批四期列車, 其實外型都唔係差,
始終都係由澳洲公司負責車體設計, 而且如果放低對國產車嘅成見,
玩模型樂趣點都會多尐, 再者已經錯過左一期列車,
難得佢再出輕鐵, 唔把握機會入番架到佢又售罄果陣就後悔莫及,
不過 Super Bus 最後亦表示, 希望喺未來嘅日子有機會再推出一期列車模型,
等佢同其他同 Super Bus 一樣錯過左嘅朋友可以還一個心願。
隆重歡迎! 港鐵 MTR 輕鐵第 4 期列車, 見參!!
證書編號 0945, 全球限量 1600 架
正式落地!!
因為佢係輕鐵, 一架行路軌嘅車輛,
都係放喺路軌台座上面影先至有 Feel~
附有車卡連結器
車頭嘅一對望後鏡亦可收放
集電弓亦可收放, 呢架輕鐵其實真係落足心思,
個人唔係玩開鐵路模型, 呢架輕鐵模型都已經令在下心動,
拎上手更加愛不釋手!
升番起個集電弓, 成架車都好睇尐,
不過好似爭咁尐野...冇錯, 係架空電纜,
不過我唔玩情景嘅, 都係算啦~
在下玩巴士比較多, 對於鐵路呢方面在下認識非常淺,
如有錯漏或者挑書包之嫌, 請各位看官多多包容。
Thanks for reading~ |
|
發表於 11-5-2014 08:13:09
樓主
