|
If there's something strange in your neighborhood, Who ya gonna call?…….
GHOSTBUSTERS!!!!
;近日聽到一首好令人懷念o既主題曲，旋即挑起條捉鬼癮，上網 search 下先知原來 Mattel 之前出齊 4 款 12” Ghostbusters 主角可以在 mattycollector 訂購。既然錯過了唯有上網 Bid，好好彩有人放，亦以比原價略貴少少就投得呢隻 Egon Spengler (博士通) 返來。原本想一口氣收四隻的，不過 Mattel 公司出的 12” 我始終有少少保留，所以都係先玩試下呢隻博士通先。
先來睇睇包裝，係典型美式玩具包裝，Mattel 出始終滲透住一種孩子氣。
旁邊有個 Locker 可以拉出黎。
其實係個配件盒，入面放了收鬼器、對講機，仲有一對手。
再來睇睇 Mattel Body o既穩固度，玩慣 HT 靚 Body，真係對呢隻無咩期望。
第一下拎上手感覺好重手，成個 Body 好似金屬製咁 (當然唔係啦)，上身關節夠硬淨合格，而且胸口仲比 HT Body 多左個關節，膊頭可以向前推 (各位可幻想下夾波隙個動作)，呢個關節對於要拎大槍炮o既 Figure 黎講真係唔錯，可以更自然。下面借圖解說一下:
不過下身就比較弱，可能配件太多太重，好難企得穩，而且對膠鞋太硬，令到站立時唔太自然，鞋底唔能夠緊貼地面始終好難企得穩。
頭雕就唔好太認真挑剔喇，唔好深究似真人定係卡通，反正呢隻重點唔係頭雕。
衣服 Detail 位都有跟到足。
呢套 Mattel 12” Ghostbusters 真正重點就係套捉鬼裝備，未開盒就咁睇以為好膠，開出黎玩先知原來質感好好，塗裝仲有適量舊化，而且裝備都有少機關，雖然都係 d 小兒科機關，不過都好好玩o架。
捉鬼 Backpack
Backpack 底部有粒制，按下之後四粒燈會順次序閃爍。
捉鬼槍，唔記得咩粒子原理，可以 Hold 住靈體，如果太強力靈體 (如棉花靈精)就可能要幾槍齊發去對付。
測鬼雷達，4 隻 Figure 都各自都有一款特別配件附送，呢款博士通就附送測鬼雷達。雷達背部有個制，按下後兩邊金屬棒會彈出。
收鬼器，劇中隊員用捉鬼槍Hold 住靈體後，要將收鬼器掟去靈體下方，踩腳制打開Trap 門，將靈體吸入去。呢個玩具雖然唔能夠忠實呈現「踩腳制 >打開Trap 門」，不過 Trap 有粒紅色制，按下都會有彈弓打開門，至少唔駛自己用手打開。我覺得呢個收鬼器係全套 Figure 最精緻的裝備配件。
對講機無咩特別，可以勾o係腰帶上，對講機 & 機套可以分開的。
總括黎講，呢套 Mattel 出o既 Figure 我個人覺得唔錯o既，都有少少令我喜出望外，市場上官方推出o既 12” GHOSTBUSRERS 僅此一套，如果你對 GHOSTBUSRERS 係有情意結，價錢不太高的話就值得收藏 (我係以之前網購價貴一魚內o既價錢 Bid 返黎)，但如果要用太高價追回就要考慮清楚，雖然我都係中晒配件毒，不過始終缺點都唔少。
期待 2012 上映的 GHOSTBUSTER III，更期待 HOT TOYS 可以推出 GHOSTBUSTERS 系列，將 Mattel 的不完美變成完美。
 | 
發表於 6-9-2011 15:12:51
樓主
