Robotech VR 52T: Beagle 1/10 vs 千值練 1/12 呢隻VR-52T係小弟第一次入手的千值練,純粹因宣傳圖外形吸引,加上情意結衝動下落訂。攞上手未變形前,純玩電單車和人,已經好訝異:點解和2009年出品嘅Beagle 1/10拍埋一齊比較時,9年前嘅1/10技術上係完全冇輸俾呢隻2018年最新出品嘅1/12嘅呢?甚至1/10可能好少少:1/12千值練左邊肩甲和雙腳MB字樣䕶甲不斷甩ball joint,而1/10係完全冇呢個問題。另外1/10藍色半透明頭盔,電單車見到引擎,都稍勝1/12,當然1/10都有缺點:用錯物料以致件衫甩色係死症,而後腳跟太細易向後跌也是事實。而且外型上呢隻千值練重新設計係型啲現代感啲細節刻畫亦多啲(但電單車冇引擎囉⋯)。我同自己講,唔好咁快落定論,合埋體先⋯⋯ 1/12合體過程,胸甲由下向上穿過頭扣落背脊度(VS 1/10由上向下),有唔同但不算很特別。而全個過程,人形左肩甲、左右兩邊MB字樣小腿甲、電單車右肩甲、右裙甲、右前臂連接條,係輪住甩一至三次,一次變形合體共十多次甩件,令全個合體過程很充實/很忙,甚至我係懷疑呢個係千值練故意創造,獨有的防止玩爛方法! 另外胸甲穿過頭盔嗰個位算小弟手殘,頂到實一實,而由於胸甲由下向上,可以就位的空間已經被下面限死咗,所以我索性拔走頭盔穿過就算,費事划花。合體後企唔穩就預咗亦都理解,但雙手臂卻因為臂甲的連接伸縮條太緊而影響活動能力,手臂活動時要先除下臂甲,調較伸縮長度再合返上臂甲。同樣的設計在9年前的1/10卻沒有問題,因為1/10中呢組連接部件係刻意地非常鬆,連接條伸縮自如,完全唔會阻礙雙臂活動!我在變1/10時,在合體過程中都甩過一次左裙甲和兩次右白色扣身甲,但也僅止於此。1/10合體時頭盔穿過胸甲要就位但仍是順利的。全個合體比較係完全體現到「大師一出手,就知有沒有」。 合體後外形上的確1/12較細緻和現代感,雖然我個人有少少介意腹部連接胸甲和裙甲的連接條。但1/10又不是明顯被比了下去而只是風格唔同, old school啲。但合體後把玩上卻是1/10完勝,因為1/10唔駛驚一邊玩一邊甩甲,而且雙臂活動自如冇阻礙。另外當我望住1/12電單車肩甲連結位和電單車 handle時,我第一個感覺係:咁幼,幾時會斷⋯⋯ 不過1/12也有優勝的地方,就是站屍襟擺,1/10白色的地方1/12都是淺灰色,避免了往後的黃化情況(我嗰隻1/10不少白色已黃化,甚至藍色件中泛起綠色⋯⋯),而且相信1/12的衣物部分不會像1/10般甩色。 總括呢隻1/12完全是千值練風格:只宜遠觀(很靚),不宜褻玩。入手站屍一流。 相信呢隻將會係我入手唯一一隻千值練産品。好坦白,如果係老變玩具,貴過$500而變形過程不同地方共甩十多次件,可能已經被各師兄大駡評為垃圾QC,何況呢隻要$1200-$1300!?而實際上我認為呢間叫做唯一可與B記匹敵的廠商,產品外型雖然又型又靚,但其技術上只有老變第三方的X社水平。正所謂:蜀中無大將⋯⋯ 如果有機會的話,我強烈建議各位後追隻Beagle 1/10,去體會吓一隻原來當年技術上係領先了至少9年的2009年產品。
|