|
|
|
本帖最後由 catcat 於 9-5-2014 03:33 PM 編輯
12"人偶 "平有平玩" 攝影教學
好多帥兄買左FIGURE有心分享, 但家中空間及器材所限, 怕左唔敢嘗試, 實屬可惜.
其實貴有貴玩, 平有平影, 善用家裡的物資, 一樣影到靚相分享.
甚麼黑底白底鏡底要一定器材, 小弟不打算深入研究, 主要係想睇下點用最少器材影到最佳效果. 而以下主要係以FIGURE主體影得清為大前題嘅介紹, 背景則暫時無視了.
INDEX
1. 總訣
2. 露台擺陣
3. 窗邊側影
4. 餐枱快影
5. 深夜閒影
6. 電視做背景
7. 電視畫面做背景
8. 簡易"開棚作法"
9. 大陣象棚拍
10. 終極外拍
1. 總訣
要分享得靚, 先有幾個總訣, 首先, 不要用廣角, 建議最起碼要用50mm以上焦距. 錯誤例子:
一用廣角, figure立即變形, 好難清晰分享. 但當然, 有心玩角度, 玩style例外.
其次, 請勿用機頂閃光燈, 不用多說, 影女友都唔會咁影啦.
再其次, 影相角度最好同figure齊平. 一般日常生活照好少高抄低抄(龍友例外), 想figure似真人, 就要好似影真人咁, 儘可能放低d部相機,大約figure腰平位就ok.
如果相機有微距功能的話, 盡可能開啟微距, 可以有更好對焦表現.
光圈勿開盡, 最少都要F5-F8, 太大光圈好易失焦, 而且對焦點外嘅部份根本睇唔清. 但當然, 偶然玩一兩張, 製造特別效果是合理的.
勿用暖色光源, 一般家庭用的黃光燈絕不合適用作影figure之用, 除非您特別要溫馨效果:
用左暖光靠後期PS係無可能執番自然嘅, 柒me! 反而用冷光/白光影完就可以加少少味精等佢暖番少少.
講完總訣, 跟住要分享一下小弟用嘅偷雞方法:
2. 露台擺陣
小弟早年都係日間係露台影相, 自然光夠晒正. 想影得差都幾有難度.:
好簡單, 一張椅子, 一塊背景布(小弟用$10單車套), 兩三個衣夾set場, 影得!
3. 窗邊側影
小弟搬屋後試過呢個方法, 係窗邊放張椅子, 兩塊紙板(小弟呢兩塊CARD板係seven買, $5):
不過窗邊光源對比太強, 可能要係另一邊用白色物件做反光板或者細燈補一補光.
4. 餐枱快影
要快, 當然係於屋企最常用嘅餐枱上搞掂, 呢堆相仍然係用自然光, 不過開大左光圈, 都叫做見得下人.
5. 深夜閒影
可能睇到呢度已經有帥兄想掟番茄, 喂大佬, 個個咁得閒日光日白用自然光影相架?
其實一支枱燈已經幫到您, 仍然係個張餐枱, 用一支白光枱燈45度角打落主體.
當然, 深夜影相, 落支腳架還是必需的.
6. 電視做背景
好多帥兄都想試下黑底, 其實家家都必定有一塊黑底背景: lcd電視.
只要係電視前set一個平台, 放塊黑膠片(廣告箱鋪, 膠片鋪有得界, 60 x 60 cm約$60, 黑白同價).
膠片不一定要貼近電視, 環境所限, 分開半尺左右亦ok.
以下呢set相係用led 燈膽仔做光源的.
led 燈膽仔:
7. 電視畫面做背景
用得電視做黑底, 自然可以用電視畫面做背景, 但有點兒難度.
主要仍然係色溫, 所以要事先set好自訂色溫, 方法係首先搵出最適合您現有光源嘅白平衡(唔計電視畫面發嘅光), 再set死佢, 唔再用auto mode.
而呢個方式就要用到比較強嘅光源, 因為電視畫面發出強光, 影主體嘅光源不足的話, 背景便一片死白.
而要影到背景的話f8-f11光圈走唔甩, 亦一定要用腳架.
sample:
8. 簡易"開棚作法"
一張布掛起, 由背景直落枱面, 再加光源, 就係最簡易嘅棚拍.
開棚用燈會比較好, 白光枱燈兩支已OK. 左右各45度打燈, 兩邊燈光不要太平衡, 角度有少少高低遠近嘅落差最能突出figure輪廓.
sample:
9. 大陣象棚拍
一張圖更勝千言萬語:
小弟平時用兩支環形燈, 一件led補光燈, 60cm圓棚, 紅外線remote, 玻璃倒影板, 簡易腳架. 黑白背景布, 係咁多.
詳情請參考小龍大大精華教學帖, 豬肉在前, 小弟不重複了:
http://toysdaily.com/discuz/thread-161039-1-1.html
10. 終極外拍
講左咁多, 係屋企影相唔多唔少都要用少少設備.
所以終極嘅偷雞人偶拍攝大法係: 外拍!
材料: figure stand(影半身時用), 相機, blu-tack泥膠(回幫忙固定配件及figure), 小攝子(用嚟幫figure執外型).
外拍最大困難係風, 所以figure一定要擺得穩陣, 影半身時要借助stand.
小弟自己盡可能唔會放地面影, 因為用DSLR, 所以要影低角度時有好大難度, 一般會搵舊大石等等嘅物體做平台.
一般用f5.6-f8計, iso 200, 快門可以用1/100-1/400s , 相對不需要腳架, 影相角度可以更自由.
不過要避免陽光直射拍攝, 影過您就知, 晒住陽光嘅相其實好怪. 最好陰天拍, 或者係陰影下, 咁會自然好多.
反光板不需使用, 一般日常我地係自然光下無嘅野, 唔使夾硬加上去, 否則不太自然:
白平衡最好SET死, 用陰天/陽光/陰影, 試過OK就SET死佢.
另外, 外拍前最好減省不必要的配件, 尤其是小型易甩的配件, 可免則免. 係草叢上大海撈針的痛苦, 不足為外人道也...
外拍時搵景係最重要嘅, 但其實12" figure比真人細六分一, 所以我地要嘅景並不需要好大, 而且前面講過, 影12"不需用廣角, 所以只要搵到一小個角落方便拍攝便可:
小水池:
公園長椅:
矮樹迷宮:
涼亭:
以上全都是身邊樓下街頭街尾都有嘅事物, 只要您夠膽, 就影到靚相!
期待見到帥兄們嘅分享!!
各位帥兄, 請請~
 |
|
[複製鏈接]
發表於 12-12-2012 23:46:39
樓主
