Pixar 25周年 來港辦展覽

ajc188

隔牆有耳： Pixar 25周年　來港辦展覽
2010年10月21日
西九文化藝術區落成在即，康文署係時候要做多啲嘢，以免西九徒具外形毫無內涵。康文署計劃從市民生活入手，將全港公園大翻身，明年會先以鰂魚涌公園做試點，搵藝術家設計公園內嘅座椅同告示牌，市民遊公園時就已經可以享受藝術。首個裝身行動約需 1,500萬，會透過康文署內部資源調撥，唔使額外撥款。


明年兩重頭展覽
康文署亦打博物館內嘅餐廳同禮品店主意，明年初開始唔再採取價低者得嘅投標形式，改為以意向書選拔，評分標準係配唔配合到博物館形象，屆時營辦者未必要交租，但會同政府利潤分賬，鼓勵更多創意。
動畫版《清明上河圖》喺香港引起搶飛熱潮，明年亦有兩個重頭展覽，第一個係香港藝術館嘅羅浮宮雕塑教育展，屆時會有著名嘅複製品畀市民任摸任掂；第二個 Pixar動畫 25周年展覽，康文署會同 Pixar公司傾展覽內容，雖然未定展品，但睇怕香港人好鍾意嘅巴斯光年、三眼仔同超人特攻隊，有望一會 fans啩。
另外，民政事務局為公共博物館成立三個諮詢委員會，分掌藝術、歷史同科學範疇，就博物館嘅發展、推廣同管理策略提意見，科學嗰瓣更由港大首席副校長錢大康做主席。

(李八方)

kaijinx1

只希望康文署攪得好好睇睇 :o

Lau

Pixar 來港當然是好事，真係希望辦得好好睇睇。