|
|
|
(麻帆良市心跳巴士迷俱樂部會長 Monika 報導)
總部位於北愛爾蘭嘅 Wrightbus, 喺 1946 年由 Robert Wright 創立,
原名為 Robert Wright & Son Coachbuilders，以重建貨車車身起家,
喺 1978 年開始推出比單層巴士使用嘅鋁材車身, 至 2001 年推出雙層巴士車身,
現時香港有唔少雙層巴士都配用由 Wrightbus 提供嘅車身,
主要以 Volvo 出品嘅 B9TL, 同後來嘅 B8L 底盤為基礎。
2014 年, Wrightbus 打破以往只提供巴士車身嘅框架,
推出首款由佢地自行製作, 採用一體化車身設計嘅雙層巴士,
並且命名為 StreetDeck, 佢係一款兩軸設計嘅雙層巴士,
使用由平治提供, 只有 5.1 公升容積嘅 Euro 6 標準 OM934,
四汽缸柴油引擎作為動力來源, 有 228 匹嘅馬力輸出,
車身外觀同九巴、新巴同城巴使用中嘅 Volvo B8L, 佢地所配用嘅 Gemini 3 型車身如出一轍。
Wright StreetDeck 至今喺英國本土廣為 FirstGroup、Stagecoach、
Go-Ahead Group 旗下各分公司使用。Wright StreetDeck 推出至今,
除左傳統柴油動力之外, 亦發展出 StreetDeck Micro Hybrid、
混能版本嘅 StreetDeck HEV、氫燃料電池版本嘅 StreetDeck Hydroliner FCEV,
同純電動版本嘅 StreetDeck Electroliner BEV,
而柴油動力版本嘅 StreetDeck, 則於 2021 年 6 月更名為 Streetdeck Ultroliner。
九巴喺 2018 年引入 Wright StreetDeck 樣辦車試用,
由於呢架巴士係為香港嘅運作環境而設計, 附有空調系統,
有別於英國使用嘅同款巴士,
如果以英國本土版本使用嘅引擎要同時驅動空調系統運作,
以佢嘅容積同馬力顯然力不從心, 因此呢架 StreetDeck 改配同樣由平治提供,
7.7 公升嘅 OM936LA 295 匹六氣缸引擎以配合車輛嘅運作要求,
由於改用左容積較大嘅引擎, 巴士嘅尾跨亦較英國版為長。
但係由於驗車期間嘅種種波折,
結果延至 2019 年 9 月先至成功出牌, 車隊編號為 W6S1, 並且 正式服務 5 號及 81C 線,
但係後來因為 Wrightbus 破產而被迫暫時停牌。W6S1 喺 2020 年2 月上旬除牌退役,
並且被運回英國, 而且封閉左落車中門, 改為單門規格。
此外喺呢架樣辦車尚未掟投入行走之前,
九巴原本亦已向 Wrightbus 訂購 50 架 Wright StreetDeck 10.65m 兩軸雙層巴士,
用以替換當時車隊内行將退役嘅 Dennis Trident 10.6m,
同Volvo Super Olympian 10.6m 三軸巴士,
但係亦由於上述理由, 喺 2020年 1 月底取消該訂單，
並加訂第二批 25 架 ADL Enviro500 MMC 11.3m 巴士代替。
另外與九巴同屬載通國際旗下嘅陽光巴士,
喺 2020 年 7 月, 訂購 5 部 Wright StreetDeck 巴士,
並且於 2021 年3 月下旬起陸續投入服務,
用以行走旗下居民巴士及巴士租賃服務, 同時取代前九巴嘅 Neoplan Centroliner,
及行駛 NR331／NR331S 線嘅 Dennis Trident 巴士。
呢批新巴士原本係 Wrightbus 喺破產獲得新投資者入股,
重新恢愎正常運作同生產前已經量產嘅車型,
雖然機械規格同車身外觀與九巴原本試用嘅樣辦車 W6S1 大同小異,
但係載客量則比 W6S1 嘅 91 人稍高, 逹 98 人,
紅色嘅車身塗裝, 亦寓意呢批巴士嘅車主 -- 原九巴新車。
今日, 心跳巴士迷俱樂部隆重歡迎九巴 Wrightbus StreetDeck 登場!
配喺 Volvo B8L 底盤上嘅 Wrightbus Gemini 3 車身相信大家都已經見慣啦,
咁兩軸設計嘅 StreetDeck 大家又點睇呢?
呢款被戲稱 "三尖八角" 嘅車身輪廓, 市長 Super Bus 話起初睇到佢個樣,
真係完全睇唔慣, 完全唔係以往 Wrightbus 果種 "圓碌碌" 嘅風格,
果種視覺衝擊非常強烈, 實在令人難以一時間接受得到,
直到九巴引入配上呢款車身嘅 Volvo B8L 新巴士, 再慢慢經過一段時間,
先至接受到呢款車身嘅線條設計, 正如佢經常講,
Wrightbus 車身嘅設計特色, 就係要比人一種強烈嘅視覺衝擊,
令人一時間接受唔到, 但係慢慢你就會接受到佢,
正如同廠出品嘅新倫敦巴士 "Borismaster", Super Bus 更曾經戲稱佢為 "Boris Monster" 添!
不過佢亦補充話, 呢款車身都要睇下配乜野車身拉花先至好睇,
今日到埗嘅呢架九巴 StreetDeck, 同上次到埗嘅陽光 StreetDeck 相比,
配上銀色襯托嘅紅色九巴塗裝, 加上其兩軸嘅設計,
比起依家滿街都係三軸設計嘅紅色九巴感覺更加獨特,
可惜佢投入載客服務只有短短五個月嘅時間,
就要被召回返祖家, 喺香港嘅出現可謂曇花一現,
不過佢嘅離開. 卻為陽光巴士帶來一批非一般嘅新巴士,
亦可以算係特別嘅驚喜啦! 講到呢度,
我地不如去一睹呢架九巴 StreetDeck 嘅風采啦!
隆重歡迎! 九巴 Wrightbus StreetDeck, W6S1, 見參!!
證書編號 0689, 限量推出 900 架
(做乜竟然好中唔中中呢個 Number? 汗...)
正式落地!! 心跳巴士迷俱樂部歡迎您!!
 雖然 W6S1 新落地首航行 5 號,
不過 Super Bus 話佢個人喜好都係鍾意 88, 貪佢 "靚 Number"咁話喎!
 咁講真, 呢架車行乜路線我又冇乜所謂嘅~
與陽光巴士 Wright StreetDeck 相會
樣辦車與量產版, 到底有乜分別?
來一個對比先~~
九龍陽光的威巴
最後借本文向 William Wright 作最後致敬
Thanks for reading~ |
|
發表於 23-8-2022 10:58:01