魔術師的玩具 2018

Garycharm

新年新希望，祝 TD 各位大大有獎有賞、有女有水、玩具長玩長有又唔憂地方擺、性功能日日向上兼有用武之地！


2017中小弟已經開始戒玩具...起碼少買無謂o野，
經過一年多，2018年總計買的不多，錯過了一些好東西，而中伏也大大減少了。






SHF 星爵

一堆Marvel 之中，我對GOG的興趣最少，
若不是為了人齊，本來不打算入這傢伙。
但玩上手，無論造型、面相、設計造功都是 SHF 上上之選。
意外喜歡。



Siege War for Cybertron Optimus Prime
孩記最新 V class 文哥，走 Classic 路線。
人型車型都有點不足，變形斧頭又有點點畫蛇添足。不過勝在變形流暢（實在受夠Movie系列的折騰）而設計夠G 1。
我現常放在檯頭，手痕就扭兩扭，玩得開心。





Robot Spirits Pacific Rim -- Obsidian Fury

三個字----
型！型！型！




超合金魂 Pacific Rim Gipsy Danger

合金夠重就是皇道，小小身軀拿上手卻沉甸甸的，那種感覺非好此道者所能明白。
缺點是部份關節過緊，而手部換件麻煩，
不過電影裡他本來就不是身手靈活。
真正可惜的是沒有製作頭部合體機關......人家美國佬都識得向你日系機械人致敬，
你反而唔認真回應，可惜。
惟優點多過缺點。玩上手，越玩越覺得造型很耐看，很有當年的 Big O 的優點。
加上推出之日剛好是Movie 2 上映之時。
我邊重溫第一集影碟邊把玩，感受至福~~




Hasbro Leader Class Grimlock

變形金剛電影後幾集有幾爛就唔駛我講，
出動我最愛o既Grimlock 都救唔番。
而第一隻電影Grimlock 玩具更加係開玩笑。
今年忽然推出一隻全新 Grimlock，外型高度還原之外，
變形乃繼承上一隻鋼鎖與及 Beast war 麥 sir 而成，步驟簡潔清脆又不會太單調，
加上孩記少用的銀灰色，絕對是精品。

後來有KO廠改件放大推出，我有買，
就是撇開道德爭議，我覺得原版已經夠好。




SHF Ironman MK VII

SHF Ironman 頭兩隻（mk6、war machine）出事之後，
隻隻都保持水準，應瘦就瘦、應壯就壯，關節適中，擺pose一步到位，
加上有 1/12 hall of armor，好好玩。

年尾出呢隻mk7 同之前幾隻分別唔大，
為重現炮火全開要大量換件，不過換得都算暢順，
加上活動背翼，讓這傢伙在同系中再高一籌。




超合金魂 FA V型電磁俠

早兩年 TD 經常有人討論大型合體合金成本高風險高回報低，所以合金魂會被 cut line ，
Bandai 忽然公佈合金魂有新產品百獸王，而且合金魂更一浪接一浪，我輩玩具迷都大感安慰。

不過看真點，百獸王以後，合金魂合體玩具只有一隻新不如舊的大獸神，聊勝於無的 Zambo Ace、
斬件上食水深的巨靈神飛碟，戰艦非我杯茶，其他都是單體機械人與及再版。
理智告訴我，合金魂不一等如大型合體，
但始終這是我們真正需要的....
講白 D ，我想要十五雞呀！
就算唔係佢，仲有大鐵人呢？機戰呢？太保郎呢？
我好L厭萬能俠呀！ DLGH ！

說遠了。
回說今年又有一個新名目「超合金魂 FA」，
我不知大大家怎樣看，我就真的沒甚麼興趣。
不過見他第一彈竟然唔係萬能俠，先加少少好感，
買了，拆盒，見V型手腳俱全整整齊齊的躺在發泡膠盒內，
唔駛我又要拆一輪吸塑盒裝配件，好感又加一點。
然後玩上手，大小適中、手感得易，
關節處理大路而豐富，能輕鬆擺出許多細膩動作。
然後配上那成本低但算花過心思的陀螺帶，
再承認一下我輩七十代中坑情意結。
我竟然.......玩得好開心！




Marvel Select World War Hulk

「Hulk 都要著盔甲？」你唔好理，總之佢著得好睇~~
我本來就鍾意 Hulk ，World War Hulk 亦特別鍾意。
o8年一堆電影WWH --- Marvel Legends、Marvel Unverise、Marvel Select、SHF 、Hottoys 玩具我全收，
結果最喜歡還是這一隻 MS ，夠大夠霸，又有自己的詮釋，有型有神，不像其他系列般要儲件、交行貨，絕對是寶物！

p.s. 寫文之時才發現找不到之前所拍的照片，惟有借用網圖。下次再影過。




Action Toys Mini 合金太保郎


太保郎！太保郎！太保郎！
Action Toys 繼去年的大鐵人之後，再為我輩七十代帶來安慰，
推出怨物太保郎。惟看清楚合體後也只得135mm，好細，有點失望。

實物到手，合體前後都保持最最基本的活動能力，
複雜動作是擺不出了，但大開大合耍耍帥就仍可應付。
合體用全換件方式進行，換得乾淨清脆，最重要是夠穩固，不會甩甩離離。
產品另供幾粒「造形先決」的頭部組件供玩家選擇替換。
算變得方便。（作為玩家，我覺得如果廠方直接提供多一個替換頭就更方便更好。亦可以還一號機一隻完整屍身。）
缺點是武器之中有些裝不牢、有些就太緊，要玩家自行維修調節。

這是見前為止最好的原祖太保郎玩具，沒有之一，
加上價錢宜人，各位七十代玩具迷不庸錯過！




Arcadia 無限地帶 23 格拉度

十年前 Y記已經出過完全變型的格拉度，
外型不錯，變形亦順暢，我當年入手不過4舊水，真正價廉物美。
不過問題係用料不佳，就是放在盒內關節都會自動分解。
心痛。

今次Arcadia 基本上繼承了 Yamato 設計，
縮小比例再加金屬關節，而且改善了活動能力，可喜可賀。
儘管變形仍有點複雜，但如果大家有玩菜系（Macross），
應該不難上手。

產品上油有點不均、變形也易刮花，
不過情意結加上產品心思，仍是我今年所愛。







以下係今年失望品：

Garycharm

之前個 post 出錯相，話說我想讚 Marvel Select Gladiator Hulk，
不過搵唔返自己o既相，於是上網搵圖出post，
原來我搵錯 Planet Hulk 張相。（現在已更正）


我睇清楚 Marvel Select 隻 Planet Hulk，真係驚為天人，
拿拿聲上網訂，超期待！

p.s. Marvel Select Gladiator Hulk 係最好的 Movie 同角色產品 的評價，維持不變。





以下介紹，說不上甚麼全部年十大，
有些甚至未必是好玩具，不過情意結補夠，
是自己喜歡的玩具，也可以介紹一下。



Evolution Toys 鐵人28

十九幾年前隻 popy 鐵人28 已經成為神物。
磁石廠竟然夠膽挑戰，真係勇氣可嘉。

磁石廠往蹟有變好大家心中有數，
不過這裡頭有個計較---有傳說話磁石廠前身就係 CMS ，
CMS 的評價和今日的磁石廠可謂難兄難弟、難分軒輊。
不過 CMS 如果認真抄考舊合金所推出的產品：
例如逆轉王、三冠王、戰國魔神等，又通常不會太差。
所以我竟然....竟然....竟然去訂這隻鐵人 28！

這個價錢這個級數，
當然會拿來和 Bandai 的 DX 超合金魂的鐵甲萬能俠比較，
老實說也當然會給比下去。
外型太梗直、活動能力不怎麼樣、插樁式裝甲拆甲有點煩，

不過玩上手，又意外的順手。
只要不經常拆甲，只玩開合（如圖），問題又不太大。
小腿收納倉、下盤駕駛席不夠細緻、但也有點意思意思。

整體不算佳作，但絕對可入口。
....可能因為自己不敢期望，仲竟然幾滿意。
尤其我輩合金迷，能擁有一隻拆甲鐵人 28 總算是還了心願。






Robot Spirit 原裝奧津

蘿蔔暈水平大家都知係甚麼一回事，
難得在肯出這傢伙，啞光金屬色又真係幾靚仔。
算是還一個心願。




Ultimate Luminous 系列

每次上「正義朋友」見到那些咸蛋超人雕像，
那種昭和貼身膠皮、老土得來又一表人才，
睇到心郁郁。但係諗到一入侯門後患無窮，只有望門嘆息。

Bandai 這兩年推出的這個貴價扭蛋系列就大合我胃口，
經典pose、發光眼、迷你情景，真係幾滿足。






孩記 Leader Class Blackout

Movie 1 的 Voyager Class Blackout 已經相當不錯，
不過坦克 Brawl 已經是 Leader Class ，Blackout 細了一個碼總不是味兒。
十年後忽然出一隻 Leader Class ，真係幾驚喜。
變形過程的還是繼續 Movie 系的鎖碎，喜歡與否見人見智。
而Robot mode 和 disguise mode 都有型有款有份量，好討好。
惟用色太冇誠意，和同期的鋼鎖放在一起就很輸蝕。








真骨雕舊一號、舊二號

真骨雕宣傳係以擬真骨架、高活動能力做招萊，
惟玩上手，活動能力和 SHF 根本沒有分別。
個別角色的活動範圍甚至不及 SHF。
不過真骨外型真係靚好多，如果不看關節的接合位，
身形體態比12"也毫不遜色。（除了響鬼，唉~）
古迦、Kabuto 都好靚，阿瑪遜就總有點點不夠味，
這套舊一舊二亦係系列精品。
昭和拉打迷必收！






老實說，拉打系列我只係睇到Wizard，而且是挨過去的。
那套橙我只能吃到一半，實在吃不下；然後，就沒有然後了。
往後的拉打玩具我只收SHF主角基本形態，買個意思而已。
而玩具造功成熟、色彩斑斕，又真係出得幾好。

講真，佢如果將隻 build 換過個盒，
話佢係真骨雕然後加價50%，你一樣會乖乖俾錢。






Marvel Legends Punk Spiderman

今年仍是美漫英雄的天下，不用懷疑，亦是這班傢伙搶去拉打的玩具市場。
美系玩具百花齊放，不同公司不同比例質材的產品如雨後春筍。
不過買新系列，遇上品質差就勞氣；買到高質、玩對了胃口就更大鑊。
所以我就只揀定目標，收三兩個老牌子算了。
尤其近年 Marvel Legends 、SHF （如果唔偷雞留力）的頭雕技術已經很成熟穩定，
通常都玩得滿足。

選這隻 Punk ，並非因為他特別出色，
而係夠抵死又算多o野玩，
配件結他可以穩穩的套在身上不會遺失，
加上前陣子打豬豬仔 PS4 大作，我一邊打機一邊把他放在身旁。
手痕扭幾扭，好開心。





ES 未來合體

我向來對Cute 版機械人沒甚麼興趣，
不過見他是金毛獅王又當別論。

本品外型很好.....其實這已經不容易，
之前很多cute版合金我也看不順眼，例如舊三一 。
玩上手，本品大致能維持本尊的變形合體系統，
另有一些外型先決的補品，十分不錯。

惟腳部合體那個小小 U 字插頭實在不夠牢固，
美中不足。




Diaclone Reboot Big Powered GV I.M.S.ver

2017年這傢伙推出原色版，有幾好就唔駛我讚，
我忍忍忍，終於等到他推出異色。
玩上手都幾開心，那種變形系統兼有傳統日系與變型金剛的特色，
既有前者的邏輯、又有美玩的順手。
不過....個人真的、真的是少了一份情意結，
又不能說特別鍾愛。





眼鏡廠 One Piece 景品

小弟年輕時候喜歡人像攝影，約約女孩子拍拍照打打....機。
噢，愉快的青春！
現在當然沒有這種玩法，影影囡囡 figure算是一種心靈補償，
可以把家裡搞得烏燈黑火然後躲進攝影棚滿足自己的黑暗面。
玩囡囡 figure 人人心態不同，有些人真的當佢o地係老婆，
我就剩係影幾張相就算。
眼鏡廠這些百元左右的玩意，影完相，
o岩就留、唔o岩就丟。

然後暗暗擔心唔好有報應.....








Bandai 搪膠怪獸 三式龍機

我玩玩具真係幾雜，怪獸我又o岩，頂~~~
之前一直有儲 SHM 和這些搪膠，後來發現，
以我對怪獸的豪邁玩法，玩搪膠會開心點。
於是慢慢放棄了 SHM ，
剩係乖乖地玩呢 D 搪膠已經好幸福。

大家又覺得這隻怎樣？

Garycharm

留位留位留位留位

lukyuet

千值真三一真是失敗，師兄2018收穫都不少喎！

S2000AP1

Metal build 萬能俠點解唔正？個人認為D連動好正，好似模型咁順

請繼續討論，看吧！看吧！..........

小人物

靚相，支持支持 :)

xterry

S2000AP1 發表於 5-1-2019 01:35 AM
Metal build 萬能俠點解唔正？個人認為D連動好正，好似模型咁順

請繼續討論，看吧！看吧！.......... ...

個人覺得，MB萬能俠主要係對唔起個價。 學你話齋，似模型……但同年出的模型唔會差得過MB好多，但價錢相宜好多。

xueyue2

good stuff!~~~~~

kagaloo

Nice to see your year end summary.
Would like to read your comments on the remaining pictures too.

Happy new year.  Cheers.

nela

精彩的回顧⋯⋯尤其V形FA

ygat2005

nice annual review{:1_377:} good to have comment for each best of the best.
but i mainly assemble model kits, your choices can't poison me.:78:

false ceiling storage {:1_203:} beware it collapse:36:

jeffyen83

Mb萬能俠質感幾好,我自己幾滿意

由水桶三一先開始儲下千值既我,
因為真三一決定唔再入千值,就算黎緊隻巨靈神係幾吸引。。。

Knightmare

樓主
SHF IM果到睇到我好混亂喔~{:1_201:}
MKVII=MK7
然後一句"年尾出呢隻MK6"
但貼圖又係MK7
零分重作
{:1_214:}

快快

「我好L厭萬能俠..」
{:1_377:}{:1_377:}{:1_377:}:DD

wwwkcc

「有用武之地」好緊要,唔係谷住谷住日日洗樓仲重皮過買玩具:DD