|
|
|
(麻帆良市時報記者キズナアイ報導)
はい、ども! キズナアイです~♥
一提到九巴嘅 "薛頓" Seddon 巴士,
有啲人可能會即時諗起喺 1970 年代嘅英國 Seddon Pennine 4 型單層巴士,
其實早喺 1957 年, 九巴已經有引入 Seddon 車廠嘅出品。
呢間位於英國曼徹斯特東北部 Oldham 嘅車廠,
一向係以生產貨車底盤聞名, 直到二次大戰後開始研發巴士底盤,
今次嘅介紹嘅主角正係 Seddon 嘅 MK17 型單層巴士,
喺 1957 - 1958 年間, 九巴分兩批訂購合共 100 架 Seddon MK17 型單層巴士,
佢地使用由 Perkins 提供嘅 P6 4.7 公升六汽缸柴油引擎,
有 86 匹馬力輸出, 連接四前速非同步嚙合式手動波箱,
而車身方面, 佢地放棄當時九巴常用嘅木框支架車身,
改用由英國 Metal Section 提供嘅金屬支架車身, 而且車窗框使用圓角設計,
令車身外型更覺美觀, 加上佢地獨特嘅車頭鬼面罩設計,
喺當時嘅九巴車隊入面, 的確比人有鶴立雞群之感。
由於佢地係純為巴士用途而設計,
所以底盤高度亦相對比當時嘅其他巴士為矮。
車上設有 37 個座位同 13 個企位, 合共可載 50人。
而當時九巴引入呢款巴士嘅目的, 係為九龍中部,
特別係九龍塘一帶嘅乘客提供較好嘅服務,
而呢一帶地區一向以來都標籤為高尚住宅區,
所以呢批巴士更裝設軟墊座椅, 而唔係當時一般巴士常見嘅標準籐製座椅,
喺當年實屬九巴嘅創舉。
雖然佢地早期主要原本係用作行走市區嘅路線,
但係由於早前行走新界嘅單層巴士相繼退役,
於是九巴將佢地調往新界行走, 並且一直到 1969 - 70 年間陸續退役,
最後喺九巴服役嘅 Seddon MK17 型巴士, 亦於 1971 年 3 月退出載客行列。
今日, 麻帆良市正式歡迎九巴 Seddon MK17 型巴士登場!!
Seddon 呢款巴士喺九巴車隊中嘅名堂,
始終唔及喺六十年代開始喺九巴大展拳腳嘅 "亞比安" Albion 巴士咁響噹噹,
皆因 Albion 巴士喺九巴車隊中最高峰時期總數有超過四百架之多,
係自六十年代起九巴單層巴士嘅主力,
當中喺 1975 年引入嘅 100 架 "維京' Viking EVK55CL 型單層巴士,
更配上豪華巴士車身, 作為當時九巴豪華巴士嘅成員,
整個 Albion 巴士車隊一直去到九十年代初先至正式功成身退,
服務九巴超過三十年! 相比之下, 呢款 Seddon MK17 巴士,
喺九巴服役左只有十四個年頭, 平均每架巴士只係行走左大約十二、三年,
加上九巴喺 1970 年引入嘅同廠出品 --
100 架 Seddon Pennine 4 型巴士, 喺服役期間更遭逢頻頻自焚燒車嘅悲慘遭遇,
以至全批車喺九巴服務只有短短十年嘅時間就要全數退役,
都比人覺得 Seddon 嘅出品有唔可靠、華而不實同短壽嘅壞印象,
話雖如此, 但係市長 Super Bus 依然覺得, Seddon 係一款好特別嘅巴士,
佢話雖然五、六十年代佢果陣仲未出世,
更遑論有冇坐過 Seddon MK17 呢款車,
但係佢睇過一啲巴士歷史相片,
加上以前粵語長片, 張瑛演出嘅電影 <<第七號司機>> 入面,
一架同款巴士出場嘅片段, 都令 Super Bus 留下深刻嘅印象,
特別係佢獨特嘅車頭鬼面罩設計, 同中間大大嘅 "Seddon Diesel" 圓形廠徽,
都係呢款巴士嘅最大特色, 今日登場嘅呢架九巴 Seddon MK17 型巴士,
加埋紅色嘅人力車, 有如帶大家將時光帶回五、六十年代,
香港嘅一段流金歲月, 帶大家去懷愐一下佢地以前嘅豐采!!
隆重歡迎! 九巴 Seddon MK17 型巴士, どうぞ!!
(Super Bus 按: 入左咁多九巴模型,
越來越覺得依家佢地嘅外盒包裝設計好 Hea, 冇左以前咁精美,
呢三幾年入手個人覺得外盒包裝設計得最好嘅, 只有 E500 Hbus 同亞比安豪華巴士...
襯埋人力車更添老香港 Feel
證書編號 0064, 限量 1000 架
64, 登時令人想起 1989 年那一天...
正式落地!!
巴士嘅上落車門使用鋼管拉閘設計, 係當時九巴巴士嘅標準配備,
車上亦設有售票員負責售票同拉閘嘅工作。雖然九巴喺 1964 年起為旗下車隊換上電閘,
但係呢款 Seddon MK17 並未有列入更換之列, 一直保留拉閘規格直至退役
與 Seddon Pennine 4 型巴士相會
歷來只有兩款 Seddon 嘅岀品喺九巴車隊中出現過,
而且不約而同地佢地嘅服役年期並唔長,
喺 1970 年代初引入嘅 100 架 Seddon Pennine 4 型巴士,
更連番遭逢祝融之劫, 令九巴喺短短三年內損失三十多架同款巴士,
喺九巴只有十年光景最後喺 1980 年全數退役,
雖然 Seddon MK17 睇落算好少少, 但係相比起 Albion 巴士,
佢地嘅壽命亦略嫌太短, 亦不禁令人咁諗:
Seddon 嘅出品唔通真係天生短命種...?
當 8 號 Seddon 遇上 8 號勝利二型,
未坐過 8 號 Seddon, 但係 8 號勝利二型在下就坐過唔少
本文主角
雖然唔係行 8 號,
但係呢架 Seddon MK17 喺張瑛演出嘅電影 <<第七號司機>> 入面同樣咁上鏡!
九巴肯借出呢款當時新落地僅僅一年, 甚至落地冇耐嘅新巴士拍戲, 真係非常比面!
當然九巴亦可以籍此晒新車以提高企業形象, 的確可收宣傳之效
(網上相片, 來源: http://asdf001997.blogspot.com/2013/11/blog-post_7.html)
留意原來呢款巴士早期新落地果陣係有頭軸車輪軨蓋,
同埋最值得留意佢地新落地果陣車頭係冇左右兩側指揮燈,
而係靠一支 "旗桿" 彈出嚟向其他道路使用者示意巴士轉左或轉右,
指揮燈係後來先至裝上, 呢對 "旗桿" 亦隨之消失。
留意圖中司機位門後紅圈嘅地方, 就係 "旗桿" 彈出嘅位置所在,
如果有留意中巴 HK104 "白水箱" 巴士其實都係用類似設計
(YouTube 截圖)
留意 1:48
別傳 -- 退役後的九巴 Seddon MK17
雖然九巴 Seddon MK17 型巴士退役後大都被落得肢解收場,
但係其中一部車牌 HK4390 嘅 Seddon MK17 卻有幸地被保存下來,
原來佢被某公司購入, 停放喺洪水橋作貨倉之用,
並且一直渡過千禧年代, 呢架有超過半個世紀嘅過 Seddon MK17,
直至 2008 年先至消聲匿跡...
http://www.chinamotorbus.com/retire/retire-seddon-hk4390/
Thanks for reading~ |
|
發表於 20-5-2018 15:05:15