玩具雜影，乜都有少少~~~~（已完成，留意，超多圖）

Garycharm

（請留意，P 2 追加了 SR 宇宙大帝、 SHF 電腦奇俠01 最新討論）

SR合金---帝皇萬能俠 SKL

千呼萬喚， SR 骷髏頭帝皇終於再次推出，
更可喜的是，並不是舊物再版，而係改善活動能力加大尺碼再度推出。
叫玩迷感激涕泠。

SKL帝王 構造和早前同系列的舊帝皇萬能俠十分相似，
不過因為SKL 更多尖角，把玩時並不會十分順快.....

有時更會問你自己：如果要揀「拮親你隻手」定係「跌斷佢D 角」，你會點揀？








Metal 雪崩高達

本品最大花生，當然係今次香港訂不了那全武裝特別版，
至駛那「多個扣、幾把劍、幾粒"的"、一個盾」o既特別版貴了近倍。

記得最初訂購時，要訂還是有地方可以訂到的，
不過價錢仍是貴很多，我放棄。選了普通版。
反正雪崩的魅力在雙肩雙足，不在背上多兩支劍。


至於評價....我早已認定，Metal Build 是近年日系玩具界的巔峰。
你可能未必喜歡它的玩法，但很難否定它的美。






貓神路過.......






Arcadia VF-0D

對於菜系，我只算半途出家，
除了兩隻 VF-1 外，無論 B記 Y記，我都沒玩過舊版，無從比較。
所以當有師兄大讚這隻新 VF-0D ，我只有唯唯諾諾。
然後和家裡其他近年新品比較。


菜系玩具的魅力在於 Fighter Mode ，
精緻而纖薄的機身，配上幾組導彈配件，本身已是一件精品。
而這東東竟然隱藏了極複雜（麻煩）的變形機關，兼具觀賞與玩味。

.....這方面，新VF-0D 是交足貨的。
以菜系標準，結構亦算穩固。不過小腿翼有個缺點。
變形位置會互相干涉，變形時，要跟足部驟、把機關拉盡、摺好........
很難用文字描述，總之如果你依家有心入，小腳果幾個位就要小心點玩，
避免把膠件壓傷。

超合金魂 GX-68 勇者王 GaoGaiGar

變形幾妤玩，幾乎可以完全重現劇中合體過程。
Bandai 嚮機械人玩具的確可以稱王。
例如頭盔、手臂o既變形方法，
已經唔係其他公司可以輕易做到...有D 公司例如半眼可以做到，不過你會唔放心玩；
如果俾千值鍊做成咁，我直頭唔敢買；如果俾孩記用變形金剛方法搞，又唔會係果回事。

但係比較番 Bandai 自己水準、如大王者、G 7 、Gunbuster 之類，
今次 GGG 的確係做足本份、跟足設定，惟談不上突破......
當然，會有玩家求神拜佛，唔想佢亂搞突破。

要彈o既係外形....睇番套戲，合金魂做得算似。

不過以依家玩家眼光，會嫌唔夠美形。又，肩膀列車太長、中空，亦係一大缺點。

雖然上面彈o左幾句，但整體o黎講，
超合金魂 GGG 係合金玩具中o既佳作！

超合金 芬奇

這東西已推出了幾年，價錢略給炒起。
卻無意中給我在澳門遇到好價。就買來玩玩。

這是一隻讓人開心的合金玩意，
那些變髮型、隱藏可樂的機關的確有趣。
那對合金腳有足夠的力量承托粗壯的上身，
縱然芬奇的身形古怪，很多 pose 都可以應付。

本品另有一套限定配件，但訂價太高，
現在的價錢，幾乎比我這套本體貴了一倍！
我看了幾次，放棄~~~








Arcadia 金剛飛天鑽

這是幾年前 CMS 的再版品，當年錯過了，
現在襯機入手。（近日高迪安也開訂了，我訂了"初期型"，你呢？）


本品頗受玩迷稱讚。
我玩過以後，覺得作為一套童年回憶補完物，的確是合格的。
雖然本品不能變形、但配件豐富，「你換呢個換果個」咁玩，都有足夠玩味。

惟和Bandai 早年的合金魂一樣，髖部磁石不夠力----- Arcadia 會比 Bandai 好一點點，但仍不夠力。
不能隨意擺 pose 。
我早幾年已經講過，只要本品多附一組「附有普通關節相連的髖部大腿」部件，
問題已經可以解決了。本品亦真正可成為經典。
可惜。

很多玩家 disdplay 時都用人馬形態算了，還好，馬腳不是磁石做的...







EX 合金   黑真三一

真三一是以佐滕拓先生的遺搞為藍本製作，
外型是好的、但很多細節位置就給省略了。
於是，形似而神未足。
及至後來的三一 G ，情況更為明顯。

這隻黑三一，是以舊黑三一為藍本，東施效顰之作。
不過本身真三一已經很有形很惡，
雖然「佐滕血裔」少了，
但以同一個成功模式轉化之後，效果仍算不錯。

對於本品，
有不負責任的的花邊傳言一則，話說當時我已落訂，知道後已經太遲：

據說生產商為了減省成本，
要廠方起用了更廉價的材料去製作。
（上次真三一已經大出事，你仲敢換料？！）
結果廠方拒絕，
而生產商就換了另一間肯接的廠去了。

結果呢？
幾位網友都說髖部關節出事，
有的說極緊，玩家不敢把它扭動，只能屍站。（包括 TD 德兄）
有玩家說把髖部扭過一次以後，
變得極鬆，想找代理換（我是在FB 見到，忘了是那位師兄，已不知後來如何）

我那隻暫時未有事，雙足仍完好，但我是極小心去玩。
尤其那對翼，每次裝拆，我簡直比玩模型更小心，
除了這幾張相，我已不敢去摺合那雙翼了。

我一直對EX 算頗支持，
不過經此一役，
我唔敢訂巨靈神！









Evolution Toy  鐵金剛

話說，這間公司已成為香港玩具迷心中的「亞洲電視」，
每次他有新作品公佈---尤其一些冷門但具人氣的機體，
大家一見到心中都會彈出一句：「 __ 街！ Evolution Toy   o黎o既？！！」


鬧歸鬧，對於一些角色，
我又很難避開，例如百變龍、鐵金剛。
不過，由於這些傢伙本身設定都呆呆笨笨，
你不會期待替他大擺 pose ，磁石關節缺點不算明顯。

平心而論，
我手上幾隻Evolution Toy ：百勝龍、百變龍、鐵金剛，
外形、色澤都具水準，如果只是要拿上自high 自high、換換配件、拍拍照片、然後櫃內屍站，
他算應付有餘。

作為少眾產品，以數百元的價錢、還你一個童年角色，我仍算推薦。

Garycharm

MP-24皇者之劍史達


可能因為史達夠「勇者系」，設計本身可玩性好高。今次MP正正經咁跟原著加關節已經好好玩。以玩具o黎講，我玩得好開心。質素方面，一般玩具水口尿印之類我一向已經無視，但今次玩迷最大吐糟係膠質，我深有同感，竟有種玩老翻o既感覺，相當不滿。不過，我對呢隻唔算大愛，打算丟盒粗玩罷就。


作為玩具迷，我玩變形金剛的日子很淺，所以我以前直情唔識呢套o野。
後o黎買o左一套 Robot Master (簡稱RM，質素你可以想像係變形金剛o既 robot魂) 的獅王•史達。玩具製作相當簡陋的，不過算係可以重現到大部份獅王史達o既型態，亦叫我認識到呢套「勇者始祖」變形金剛喇。
（詳情可參考 TD另一位師兄o既正 post：
http://www.toysdaily.com/discuz/forum.php?mod=viewthread&tid=112634&extra=page%3D1&page=1  ）

Transformerscombiner wars megatron Leader Class

官方忽然推出兩隻 L級麥加登，
一隻係傳統銀色版、一隻係 armada綠色版。
一開始我已決定要二揀一、只買一隻。
儘管有老變前輩不斷向我介紹/解釋，
今次呢個模係專為 Armada而設，
叫我「識玩o既一定係玩綠色」，
但係當我見到銀色麥 sir個奸樣，結果都係買銀色。

雖然話係Leader Class、坦克車，
但係如果你想將佢同 Movie o既 Brawl比較，只會徒增傷心。
但係以近年變形金剛玩意o黎講（加上街價相對優惠價錢），
呢隻麥 sir算係好交到貨：夠大隻、色澤靚；
變形唔算複雜，如果唔睇說明書都算有得俾你估下扭下。
坦克車形四平八穩，人形除了雙足稍稍瘦了一點外，已十分有型。

一般麥 sir玩具都死死o地（除o左 Movie 2leader class），各位狂派兄弟，支持下啦！

Transformers combiner wars合體派

變形金剛忽然推出一系列合體派玩意，宣傳甚至以「自由組合」作招萊。
所謂自由組合，大概是一堆 Voyager class作身軀、另有一堆Deluxe Class作四肢、並有幾隻 legend (scout ?) Class作武器的方式去組合。

本品最大貢獻當然一解變迷多年的怨念，而且價錢相宜，的確滿足到不少玩家。
缺點還是有的。合體以後，關節稍稍勉強（無論外觀及力度）。
此外，因為要「手和腳」可以互換的特性，手腳幾乎同長，看慣日系的玩迷會覺得不夠順眼。

現有的幾隻角色之中，我首推保衛派，一來主幹 Hot spot的變形十分有趣，二來合體後，無論面相、髖部設計都是幾隻合體之冠。

其次推薦衝鋒派，主要是因為合體後的面相夠惡夠衰，抵消了四肢的違和感。

G-1 Seacons 海怪

變形金剛 G1的復刻玩意，已是幾年前的產品了，
當時網上評論，由於品質不佳（尤其出廠時已經替你貼上貼紙，但係貼得非常之衰），叫玩迷大為掃興。

在玩過幾隻新 C W以後，我早前忽然興起入手這傢伙，
玩了幾晚，質素又沒有想像中差…應該說，保持 G 1復刻水準。

我手上幾套G 1復刻合體，建造派、戰鬥派、霹靂星、還有這只海怪。
我會認認真真的講你知：
其實全部一鬼樣咁衰！

我覺得如果要玩G -1復刻就要有所覺悟---
一係你就隻隻唔好玩，如果要玩，都唔好剩係鬧海怪。
如果只係因為佢幫你貼o左貼紙，你就咁憎佢，
你就放棄o左一隻價平好玩o既G1經典角色，
（許文彪mode）咁樣公平咩！！！！

係，我認！
玩o左幾日，扭下變下佢分體果D古怪造形。
有少少鍾意o左佢……












Robot 魂 Gundam MK II  、Nu Gundam

.......一直好少玩 Robot 魂（對我o黎講，高達要 1/100 先係皇道）
某日行經玩具店，見 Nu 大跳樓，想了想，試試買回家輕輕鬆鬆上線舊化甚麼的去玩玩，
然後又順手多買一隻 MK II 。

結果未有時間玩上色，
至於本品的賣點「好扭高可動」，的確交足貨，
尤其 MK II 。頗有當然山口的味道。

Garycharm

Megahouse  超時空世紀--奧加斯

本來奧加斯的變形並不複雜，但本品的變形結構卻麻煩得有點意料之外。
主要問題在於身軀內一組要推上推下的金屬骨格、
加上頭罩要收入身軀內，玩家為要保護表面塗漆，要相當小心。

本品外形不錯、金屬件多加上全身上色，的確讓人很有好感。
可是QC 甚差，我這件也有幾處少「花跡」，據知幾位老友情況也相若。
此外、本品身上有很多、變形定位用的「插樁」，頗礙眼。
不過總的而言，我仍相當喜歡這傢伙....畢竟，奧加斯產品實在太少了。

整體而言，本品表現屬於中平。
網上有很多玩家表示大愛（包括我），都只因為缺點能以愛補完。

說點花絮，由於本品由於訂價高，加上出品公司往蹟一般，
在推出前不被看好，據說訂的人不多、店鋪也不會入太多貨。

誰知產品質素比預期佳（其實也有點問題，不過在可接受範圍而已），
加上這30年來奧加斯的產品實在是少，立即炒起。

我沒有訂，也是靠人情牌在相熟店鋪預留購得。算幸運了。

據熟店鋪說，我購買當日竟然有代理的「行街」到來，以街價回收這套產品...如果屬實，就認真不得了。

列車合體

本體是戰隊系DX玩具，
被加強細節與及更換了部份合金件作為「超合金」重新推出。

雖然並未有增加任何關節，玩法和DX 玩具完全一樣，
不過因加人了合金獨有的重量感，合體時的爽快度似有所提升。

本品新設另購的活動關節，
當時我冇訂，反正戰隊系呆呆的會另有味道，
現在更不會高追。

可惜無論是「超合金」版還是DX 版，
J J 關節都不夠力保持，未能重現劇中經典場面（「食玩」系列倒可以做到）。
要拍攝J J 攻擊，你可以用他右手的銀劍托著（如下圖），又或是用大家熟識的「左青龍」技巧......

獸電獸隊強龍者 長頸龍


老實講，近年o黎我基本上一套戰隊都未睇過，
亦少有接觸戰隊系玩具，不過呢隻獸電戰隊實在太有型，
尤其黑色暴龍同長頸龍，o係玩具店見到幾次，都係心思思，
結果都係買o左...  -_-


玩具o黎講唔算特別好玩，
所謂變形，都係拆拆砌砌居多，
勝在「輕鬆爽快」而已。


不過隻o野真係好有氣勢，又夠大隻，
用o黎幫屋企 set 風水陣、驅邪鎮宅都幾好用。









太陽之勇者系列

前排見到有老友高追o左隻神物【勇者傳說】，
又大隻又好玩，我心思思又想網一睇，俾D 價錢嚇親。

於是就搵番自己D 舊勇者出o黎解毒。
呢套「太陽之勇者」係09年（有冇記錯？）忽然「韓版襲港」熱潮買入。
共有兩套，兩套分別可以變出三、四個形態，然後可以o黎個終極大合體，
當時已經覺得好好玩！

加上呢排o岩o岩孩之寶推出  MP 史達，
史達同樣流著勇者血脈，而兩者一比較之下，
更覺呢套【勇者傳說】抵玩正斗！

Dick.Po

讚！正！靚！

Garycharm

NECA 小魔怪

記得細個果陣睇小魔怪、ET、霹靂5號果D戲都有睇到喊，
幾隻之中，最靚仔當然小魔怪。亦都想有佢o既玩具。
不過小魔怪玩具有時又太大隻、有時唔夠可玩性、有時唔夠靚仔、
靚仔果D 又可能係毛公仔，唔o岩玩。

綜合o黎講，NECA 呢隻算係唔錯o既選擇。
手腳有關節，不過活動範圍好細，你唔好有任何期望。
亮點係對眼，以後腦一個小掣控制，單手可以控制佢四圍望。

見到佢隻眼郁，老婆唔知，都要大叫：
點解o既！！！！








小弟同名魔怪一隻，呢隻我捨得拆.........




King of Artist The Monkey D 路飛   15週年景品

我極少玩雕像，對上一次都係買 one piece，
仲要買到老翻，不堪回首，亦都唔想再玩。

不過呢隻路飛又實在吸睛，造形、尺寸、造功、甚至包裝全都是上上之選，
加上價錢實惠，絕對是抵王精品。

玩過後，又心思思去買了一隻「造形王頂上決戰」系列的索羅，質素差得遠了.......






SHF 佐助

之前見鳴門大跳樓、手多多入了一隻，
但有嗚門自然會想有佐助、於是就焗食呢一隻高價限定。

嗚門本身出得唔靚，
面相唔好、身裁都有D 怪（總覺得卡通面相，都係Figma 靚過 Bandai）。
佐助整體o黎講靚過嗚門好多。
不過缺點亦明顯，
最礙眼係頭頂分模線，
另外，左手沒有持刀手形，不能握刀、刀鞘......
我頂，Bandai 你算點先？！










海洋堂轉輪系列（山口式）


近日有很多山口式舊物再版推出，
每次見到，我都會諗起【大時代】入面，
陶大宇 串 曾光 果一句：「叱吒一時」

依家我仲有買山口，主要都係佛像系列。
山口佛像應該算係小眾玩意，如果玩過，好易上癮。
系列入面隻隻都好靚，
又因為造形本身夠怪、體積又細隻，QC 問題都唔會礙眼，
可以放心入手。
玩家通常都會買一D 較知名的角色，
而知名角色如阿修羅、觀音之類，一般來貨比較多。
反而唔難買。
最怕係忽然有一兩隻o黎貨少，
例如之隻仁王阿形，我第一個星期冇去買，之後要搵足半年！


說說這隻麒麟，
由公佈開始，我已很期待這隻麒麟，
亦決定選擇彩色版。

本品色澤（部份位置更有漸變色！）、造形都是上上之選。
活動能力充足，甚至有可動眼球。
不過山口特點係高可動、超難扭，
要擺一個好姿勢，要花點功夫。
說明書有教你玩和其他佛像結合，不妨試試。






據玩具店說，麒麟本來銷情並不理想，
不過葉劉事件之後，的確又幫到手賣多三兩隻，成為玩具界小花生。











Marvel Select  科學怪人

之前 MS 推出的幾隻西方怪物質素都不太好，
不是造形欠佳、就係關節簡陋。
我看了幾次都放棄。

這隻科學怪人倒是突破之作，一來已用上 MS 新關節，
二來造形十分夠味 。

如果你覺得家裡的SHF 拉打缺少對手，不妨買隻科學怪人回家和他們對壘吧！







SHM  加美拉

飛龜加美拉是怪獸系列中極受歡迎的角色，
有自己的獨立作品，並不是哥斯拉的附屬品，身份不同。
今次推出玩具當然會引人注目。

玩具可以透過換件變成飛行及陸戰形態，
更可以打開腹甲，展露必殺技「究極火球」，
可玩性算是 SHM 頂尖之作。







機械王者基多拉

王者基多拉的改件產品，
外型、人氣當然及不上基多拉。
於是 Bandai 就以配件去提升可玩性。

不過真正吸引我的，是那種機械設計----很有七十代特攝味，
如果你年紀夠老，你會發覺這家伙十分耐看。










順手一貼，近日收的幾隻膠膠怪獸~~~








Star Ace 佛地魔

造形、造功都有相當水準、
因為魔哥沒有頭髮，今次頭部選擇「頭頸一體」，
避免了礙眼的分件關節，以一般12" 玩家口味，算是明智選擇。
我常說，手部是 Figure 的第二表情；今次所附有手形都符合魔哥劇內表現，玩時味道十足。
惟面相上色稍嫌偏淡（整個系列都有此問題），略顯不足。

整體係一隻好 Figure ，哈利迷不要錯過！







Hottoys Ironman Igor

因為體積夠大、造型獨特（出trailer 時，玩迷更誤會為 Hulk Buster），
加上樣辦的造形、舊化功夫都甚好，本來是一隻很受期待之作。
可是實物卻出事：
舊化完全不是那回事，也還罷了，可以事後補夠；
但連體形也大幅變更，就不為玩家接受。
更致命的是，出貨的同一時期，
A2 公佈了會有真正的 Hulk Buster，
真命天子出現，
可憐的 Igor 就慘遭拋棄，
單、貨立即充斥市場，成為 HT 當時最大花生。


論玩具，
本品訂價不低、除了燈光外不設任何機關，
這些減低了產品的玩味。
但這龐大的軀幹卻相當好扭，關節鬆緊適中、
擺 pose 通常一步到位。相當好玩。

高可動大型玩具產品向來不算多，
大我隨手和家裡幾隻同尺寸的大玩具比較。
論活動性這傢伙肯定是最好扭的一隻。

據朋友說正正就是因為要處理關節而影響了造形，
我看實物......如果不和HT 那隻試辦比較，其實造形真心不差。
是我相當喜歡的一隻 Ironman。











7-11 便利店  叮噹

.........懷念林保全先生。

Garycharm

SHF 電腦奇俠

產品關節算足夠，沒有忽然 ball-join 之類的偷工減料。
不過無論外形、色澤，以近年 SHF 的水準來說都只屬中下之作。
電腦奇俠是我最喜歡的特攝人物，可能是期望過大，失望啊。

近日剛公佈會推出新版電腦奇俠的 SIC ，
老實說，新電影劇情悶出鳥來，不過打鬥場面就相當不錯。
如果比較多年前相同路線的作品The First 、The Next ，明顯有飛躍進步。
而新電腦奇俠造形非常有型（女主角卻非常失色，可入平成最"素人"特攝女之列），對新產品，我是很期待的。


SHF 黑魔

相比電腦奇俠，黑魔就有型討好得多，
褲管長槍的設計雖然簡單，但型到不行。
電單車白鴉兼承 SHF 車隊傳統----訂價貴貴、質素cheap cheap的，
不過車身銀灰色相對討喜，如果有時間玩玩舊化也不會困難，
配上黑魔，我科水科得心甘情願。





Ultra Act 超人 A

舊世代超人系列之中，我覺得早唔靚係佢，
（呀，sorry ，後尾仲有隻超人 80 ，不過呢隻直情係醜！
當年我真心以為超人 80 係日本 D 搞笑節目角色！）
不過儲儲下舊超人兄弟，見佢又平，又冇理由冇o左佢o家。

產品其實幾工整靚仔，關節係系列一貫作風，冇太大問題，
鏡頭下，更覺得超人 A 特別威武，我開始鍾意佢。





超人老母

入手理由同上，不過價錢乘二，
要狠一狠心先買得落手。





一直納悶，超人太郎怎麼看都不像父母、倒和鄰家的七星俠叔叔似了個十足十....





SHF Ironman MK 43

Hot Toys 新推出的 MK 43 人人話正，
不過我已經狠下心腸唔買！......................等45。
但不妨入隻 SHF 玩玩。

上次的 MK 42 身上有大量金色，玩具出來，感覺很啞很膠，頗出事。
今次 MK 43 用的金色和 MK42 的差不多，不過本身43 以紅色為主，
又再回復當日 MK 6 水平。

以退燒藥來說，如果能以正價買到，會是不錯選擇。







SHF 幪面超人 The Beast

作為拉打迷，加上我本身是魔術師，播映前對 Wizard 不能不期待。
及至劇集推出，Wizard 的所謂魔法原素不多
（不論是魔術還是魔法，用得呢類題材我會期待有黑原素、神秘感），
也還罷了，最大問題是悶！
直到 Beast 出場才算好一點點。

Beast 的設定是很好的----要依靠 Phantom 為生，
如果能夠充份發揮這個特性，絕對夠格成為最後敵人，
.....至少比現在的囡囡控大怪好得多了。


講返玩具，
一直以o黎 SHF 的產品都在持續進步，
就算偶有偷功減料，質素都仍算係穩步提高。
不過咁多年o黎有兩次大出事，成個系列都衰晒，買唔落手。
一次係忽然肥仔 555 ，另一次就係大頭仔 Wizard。
兩個系列，我都幾乎全放棄！


Beast 係Wizard 配角，
玩具質素比 Wizard 更差。
各位如果依家未買，都唔好再諗。






影月 ver 2

........冇乜特別，唔似得 Black ver1/ ver2 咁大分別，
影月如果你已有ver 1 ，呢隻唔算必入。  





電單車幾架

阿瑪遜同 V3 架車.....七十代情意結，邊走得甩。
鎧武架車...因為平。









SIC Wizard 火龍形態

造形靚、大大隻、結構亦穩陣，加上價錢不高，
可以放心入手。
（上次 OOO 隻爬蟲龍，我玩到一肚氣，呢隻 Wizard 比爬蟲龍更大隻，我都係睇定先入手。）







SIC 尼高

色澤造形都是上乘之作，只因之前人人睇好，
依家貨源充足，價錢有少少跳跳地。如果大家仍未入手，不妨留意。






真骨雕    古迦

不用多介紹了吧，
我個人評價，除了紅色太鮮（仲有少少偏瘀）之外，
以 SHF 級數來說，是巔峰之作。







最後給大家看看我那些美玩。

近年因著年影之助，
6" 幾是 Marvel 的天下。

這十年來 DC 的6"，除了蝙蝠俠外，給人的印像是人氣低造形悶。
但 2014年開始，DC 全力發功，從新開發新的系列，
玩具的造形結構都更講究了（終於放棄 DCU那個萬用大隻佬身體），
轉戰電視劇集又叫好叫座、產品乘勢推出，
總之兩大公司再次開戰，玩具迷有福了（可能也是有禍了....）


今次隨拍一些 DC 玩意給大家看看，
可有挑動你的神經？

































最後分享慘事一則

話說過年前去旺角某店買 Oliver Queen ，
一開盒，由吸塑拎出o黎已經斷手。
因為知道已經係果間鋪最後一隻、
加上o岩o岩過年，都懶得拎番去講。
於是就下位影兩張相就算。

第二日出銅鑼灣做o野，見另一間鋪有得賣（當時呢隻來貨唔多），
但係貴多一舊水。算數，過年前想買個開心，科水。

返到屋企，開盒，拎上手，
見同一隻手同一個位緊緊地，於是好小心好小心咁輕輕一郁，
佢老版，又斷！

依家隻o野週街都係，但係我都唔敢買，
我頂你個掣...........






這篇玩評算是我上半年玩具一個總結，
終於完成。

希望大家喜歡。

Lau

無錯，將受到支持或反對的 post 推高到第一位，真係會令到訊息好混亂，希望可以正視下...

denniskwong

勇者王都仲係好貴呢................

warxv

鐵金剛好有興趣的說.

mfleo2010

不少好物。
拍攝不錯，多謝分享。{:1_226:}

tolete

very nice review, thanks!

安魂曲

VF0D我都好有興趣...因為LIKE MACROSS ZERO...
不過高定價真係令我卻步...
而且今次ARCADIA冇附送支架...覺得好似差咁D野咁...

超港人

全部都係好嘢嚟, 真係正相!

Raybladeleo

太陽勇者實在不錯，當年小弟都有一套，仲有一套勇者傳說既泰單+泰安，又係神物{:1_377:}

城市獵人

超好睇既包膠，3Q樓主:64: