亂之……大罵炒風千人帖

七國咁亂

今日，又係一年一度嘅香港動漫節開幕日子，亦係一眾炒家出動嘅日子，亦都係一眾TD會員開post大罵嘅日子。

小弟，今日無去，因為要開工，就算今日唔駛開工，小弟只會帶齊架生去……睇女同影相，因為我實在無可能同嗰班大把空閒時間嘅人一齊為件玩具而日以繼夜咁排隊。

今次開帖目的，唔係鬧炒家，係想講吓自己一D睇法。
- 小弟唔知點解咁多brother/sister係咁喺度鬧，咁鬧法真係有用咩？同之前隻金毛獅王、今日嘅宇宙大帝一樣，把口係咁鬧，隻手比錢買，就好似精神分裂咁……:80:

- 叫大家團結唔好買，其實都係無用，小弟今日出現喺煙屎，就見到咁多位brother/sister所講嗰位炒家歡天喜地咁以接近三條金魚賣緊佢D貨，買家仲絡繹不絕，買家包括港人、內地人、南亞裔，並目擊有南亞裔買家DRAW幾皮野去買，真係你唔買…大把人買:56:

- 同有部份brother/sister睇法一樣，供求失衡，根本你呼籲罷買都無用，香港大把有錢無時間嘅人。

- 鬧HT亦都係不切實際，在商言商，佢D貨一直炒緊，再出一D限定攪吓氣氛做吓宣傳，個價set高D都一定去得晒，但D玩家就為咗限定二字而瘋狂到唔記得HT嘅貨常有嘅問題…:42:

再數落去，就好似鬧緊D玩家。其實大家諗吓，而家個玩具市場同玩玩具心態已變質……若果大家仍然認為「點解我買唔到又唔可以鬧炒家」嘅話，小弟建議，無謂再喺度贏口數，因為炒家啋你都傻。

嚟緊其實大把還拖嘅機會，你哋喺度講到咁團結，夠薑就同炒家宣戰，嚟緊D乜鬼會場限定，自己組人做團購，預早組成幾十人同炒家鬥排，你排一兩日佢排一兩日，到開賣嗰日就全組出動，呢個方法最好係大家互相係認識嘅 (呢點唔難，因為小弟知你哋攪過好多聚會)，但最難係大家都要唔怕蝕底先得。當然呢個只係其中一個方法，可能有其他更好嘅方法，等大家私底吓去傾嘞，無謂再喺度花時間鬧呢個鬧嗰個:36:

對上述言論，各位brother/sister鍾唔鍾意都好，切勿回應！多謝