太 陽 報 鱔 稿 : 生 化 戰 神 喪 屍 粉 絲 連 環 劏

Gretzky99

一個好普通嘅電影題材，只要賣座賺錢，一定拍完再拍直至拍到爛為止，《恐懼鬥室》如是，《生化危機》亦如是，後者嘅女主角愛麗絲更加一集好打過一集，第四集仲嚟個「戰神再生」，加埋3D，堪稱女裝版「宇宙最強」！嫌3D電影都未夠立體，Hot Toys最近就將愛麗絲化身為1/6 Action Figure，仲有兩個造型及大量武器，配合其貧乳特徵，賣點多多，實行殺完喪屍，再劏粉絲銀包！

當一個喪屍遊戲故事發展到第四集，其實已經同「喪屍」冇咩關係，難得《生化危機》仲有米娜祖華域芝（Milla Jovavich）孭飛，所以就算離題都依然收得。正因如此，米娜姐對電影甚至相關玩具都擁有全盤話事權，所以Figure延至依家先至發表。

奄尖米娜改完又改
到底米娜姐有幾挑剔？HT解話：「其實愛麗絲嘅頭雕喺舊年年尾10周年展覽已經Show咗，當時已經做咗四次修改，我哋都認為似到十足，奈何米娜睇過後仲係唔滿意，佢希望Figure嘅化妝能夠連戲，面相要性感啲同後生啲，之後再經過多番修改，先至審批成功。」實物所見，由Song Hye Hyun操刀嘅頭雕，比起HT以往主力雕女生Figure嘅林浩己，似乎更自然及Human-being得多，面形、眼神都應要求變得女性化，加埋紅唇半張，真係幾有女人味。而且為咗方便玩家換裝，HT整埋兩款髮型組件，比植髮企理得多！

特製貧乳Body
素體方面，HT以往嘅女生Figure都係身材逼爆，如果照辦煮碗放喺米娜姐身上難免失真，所以特別炮製一款新Body，由遊戲版嘅Jill作為修改基礎，換咗細碼胸形，重現真人嘅貧乳特徵。服裝方面，緊身衣及腰封都跟足電影第四集嘅女戰神造型，Legging及長靴都剪裁一流，最特別係送多件磨毛布製飛機褸，重演揸飛機一幕嘅造型。話明係女戰神，武器當然大堆頭，密林左輪、霰彈槍、MP-5K輕機槍、啹喀刀、武士刀及警棍統統有齊，再貪心嘅玩家都冇得投訴啦！

查詢︰2388 4677（玩具狂熱）

＊圖中為試辦款式，與正式推出的版本或有少許分別。




HT 《Resident Evil : Afterlife》 1/6 Alice　零售價︰$1,180　預訂價︰$1,130
發售日期︰今年第四季



頭雕似足真人，雙眼、紅唇都夠晒女性化，頭髮就有露耳及冚耳兩款任你換。



緊身衣及腰封剪裁一流，留意胸形較細，唔會有逼爆衫嘅效果。



背脊有齊槍袋及刀鞘，放得落霰彈槍及武士刀。



附送飛機褸一件，用磨毛布料製成，夠質感。



刀、槍都有齊長短款式，有排你玩！

vicksuen

佢無咁大喎{:2_113:}

onetoy

figure面相好像泰國人妖...

Gretzky99

figure面相好像泰國人妖...
onetoy 發表於 20-6-2011 08:47 AM

錯!!!!

人妖靚得多!! :70:

BBCC

好核突~~~~~~~~~~~~~~~~~~~~~~

freelander77777

個頭雕應該唔會改架啦，因為出得街，個頭雕巳經比電影公司批咗啦！！所以可以skip咗佢買其他!！

gekigoke

Milla  喜歡自己凸眼及似男人個樣

kingeltshan

唔會改? ten won't buy~

dj夫

:69:睇左實物,完全冇興趣, 成個男人咁:72:

ronzero

超濃妝.................想趕客??

aruns

頂唔住個男人樣+水桶腰 ...skip:34:

BlackD

實物條腰粗到傻呀

freelander77777

希望HT好似 John Conner 咁，做過一個令D概頭雕出黎(機會好微，因HT太多project 了）！！如果唔係就.......bye bye my dear Milla.

darthluke

真係好肉酸:72::72: