六四23問答

hk小文

大國有話兒 - 曾志豪
六四23問答
(2012年05月28日)

問：六四已經23年，為甚麼仍要紀念六四？
答：你試下爭稅局一毫子，莫講話23年，230年你未死都唔會放過你。政府欠人民的血債，點可以咁輕易放過佢。
問：六四主事者都死得七七八八，再紀念六四有乜意義？
答：耶穌都死咗咁耐，屈原都沉咗成千年，咁係咪可以唔要聖誕同端午呢？
問：人都死咗，平反有乜用？
答：人都死咗，係咪唔使出殯先？平反就係金銀衣紙，用嚟燒俾六四英靈嘅最佳祭品。
問：學生都有錯，如果唔係又絕食又霸住廣場，都唔會逼到政府行呢步啦，點可以怪晒政府呢？
答：下次強姦犯同警察講：條女都有錯啦，佢嗌得太大聲掙扎又勁，我先焗住要攞佢命咋，邊怪得我呢？
問：依家唔係平反嘅時機，政局不穩，社會矛盾又多，好易令政府失去管治權威，危害政權穩定，你想國家亂咩？
答：春天不是讀書天，夏日炎炎正好眠……日日都唔方便架啦，鄧小平未死就話等佢老人家走咗先；江主席又未死，又話驚影響佢權力來源嘅合法性，又要等；新領導又話太新無能力處理上一代嘅難題……師兄，有邊個債仔爭人錢唔係咁講先得架！
問：其實當時情況好亂，大家都唔知發生咩事，你叫人點落判斷呢？
答：你真係咁亂，點解你傾向相信無死人，多過有死人呢？點解你又會信政府多過學生呢？咁識諗，你都唔係好亂0者。
問：點解當日聯署追究屠城責任嘅梁振英，之後變咗支持鄧小平攞諾貝爾和平獎呢？
答：佢嘅意思係，鄧小平九七回歸前就走咗，無機會再下令出動防暴警察對付香港嘅示威者，都算係為和平作出貢獻。
問：六四廿三年，有乜特別？
答：人民不會忘記六四，政府不會忘記廿三條立法。都係維園見啦。