九巴丹拿的大 D 大 (長文, 多圖注意)

SuperBus

(麻帆良市時報記者鹿目まどか報導)
隨住 1940 - 50 年代二次大戰結束, 日軍投降香港重光,
同中國國共內戰引發前所未有嘅難民潮,
香港人口日益急劇增長, 市民對公共交通服務嘅需求亦隨之增加,
於是九巴於 1949 年由英國 Daimler 車廠引入全港首批雙層巴士 --
Daimler CVG5 (九巴內部稱為 "丹拿 A 型"),
以滿足市民需求, 之後九巴亦不斷向 Daimler 引入更多雙層巴士為市民服務,
亦令九巴成為 Daimler 喺海外嘅重要客户之一,
但係隨住人口不斷膨漲, 同更多大型公共屋邨相繼落成同入伙,
市民對公共巴士服務嘅需求亦有增無減,
儘管九巴喺 1960 年代初引入 30 呎長嘅 Daimler CVG6 型巴士 (九巴內部稱為 "丹拿 C 型"),
已經係當時九巴車隊中最大型嘅巴士, 但係九巴旋即發現呢批巴士都係無法滿足需求,
因此九巴向 Daimler 車廠提出設計載客量更高嘅巴士嘅構思,
但係由於當時 Daimler 已經忙於設計新式嘅第一代後置引擎巴士 --
Fleetline 嘅研究工作並且進入量產階段, 已經冇多餘嘅資源去兼顧九巴呢個要求,
加上 Daimler 認為呢種巴士唔會喺英國嘅巴士市場起到用家嘅興趣,
長度亦超過當時英國嘅法定標準 (當時 30 呎已經係英國法定巴士最長長度), 拒絕左九巴嘅要求,
於是九巴唯有尋找其他車廠合作, 最後英國嘅 AEC 回應左九巴嘅訴求,
設計出長度達 34 呎嘅 AEC Regent V 型巴士 (俗稱 "長龍" 或者 "大水牛"),
並且獲得九巴嘅 210 架新車嘅訂單, 眼見九巴同 AEC 嘅呢一切舉動,
Daimler 亦怕失去九巴呢個大客户, 於是參照對手嘅底盤設計, 依樣畫葫蘆,
再喺自家出品嘅 CVG6 底盤上加以改良, 成為 Daimler CVG6-34 呎嘅新巴士,
以挽回失地同爭取九巴嘅新車訂單。

九巴喺 1967 年引入首批共 20 部 Daimler CVG6LX-34 呎型雙層巴士,
呢批巴士被九巴編為 "丹拿 D 型", 後來由九巴編配車隊編號為 D331 - D350,
佢地由 Metal Section 提供車身, 使用分別位於車前同車尾電動閘門,
同後置式樓梯嘅雙門車身設計, 同時擁有達 130 人嘅高載客量,
呢批巴士配有更大馬力嘅 Gardner 6LX 引擎，最大馬力達 150 匹,
配備原廠嘅 Daimatic 四前速半自動變速箱, 驅動後軸,
取代以往令車長感到既麻煩又浪費氣力嘅先選式波箱, 令車長駕車時較為輕鬆,
因而得到 "獨腳龍" 嘅稱號, 因為半自動波箱無須再踩 "極力子" 轉波,
左腳從此亦落得清閒, 而半自動波箱從此亦成為日後九巴新車嘅標準配備,
一直到配置全自動波箱嘅 Dennis Jubilant 同利蘭勝利二型巴士出現為止。
"丹拿 D 型" 巴士同佢地嘅前輩 AEC "大水牛" 一樣,
喺九龍各條高客量嘅路線上擔當吃重嘅角色。
呢批巴士同時經歷由一人售票改為全面一人控制嘅時代,
為左令呢批巴士更適合一人操作, 九巴更為佢地重建車身同作岀相應嘅改動,
包括將全闊前門改為半闊上車門, 尾門同樓梯移至車身中部,
以方便車長點算乘客車資之餘亦兼顧管理乘客上落,
呢批經過重建車身之後嘅 "丹拿 D 型" 巴士, 後期亦被派往行走 9、7B,
同新界嘅 61 同 63 號線, 一直到 1988 年全數退役。
雖然 34 呎長版本嘅丹拿 CVG 6 型巴士喺九巴車隊中有超過二百架之數,
但係以九巴嘅車身規格作內部型號區分,
丹拿 D 型嘅數量遠比其後輩丹拿 E 型 "長牛" 少 (丹拿 E 型巴士總數有 200 架),
令丹拿 D 型成為九巴車隊內數目最少嘅丹拿巴士車款。

今日, 麻帆良市隆重歡迎九巴丹拿 D 型巴士登場!!
一向對好似丹拿 CV 型呢尐半駕駛艙設計嘅古老巴士冇乜興趣嘅市長 Super Bus,
繼上次丹拿 E 長牛之後, 今次又再破例, 引入呢款經典舊車,
Super Bus 坦言, 佢身為 "紅磡人",
對丹拿 D 型呢款巴士喺紅磡區行走嘅印象始終比較模糊,
印象最深反而係坐丹拿 E 型 "長牛" 行 13A, 或者 AEC 大水牛行 6C,
不過果陣已經係大概幼稚園高班或者小一嘅時候啦,
Super Bus 又話, 雖然冇乜印象有坐過丹拿 D 型行 7B,
但係喺佢中學時期, 7B 亦係 12A 以外另一條返學放學嘅路線,
不過始終唔及搭 12A 多, 搭 7B 都係睇佢心情而己,
佢仲記得果陣 7B 幾乎都係以 Duple 車身 嘅 Dennis Jubilant,
或者俗稱 "黑金剛嘅巴士行走嘅, 所以 7B 都算係另一條陪佢上中學大嘅路線。
Super Bus 仲話, 或者就係因為丹拿 D 喺九巴車隊入面都係得二十架咁多,
佢地嘅名氣始終唔及其前輩, 數量達 200 架嘅 AEC 大水牛,
甚至後輩丹拿 E "長牛" 咁深入民心啦,
不過佢地喺九巴車隊入面都有立過唔少汗馬功勞, 依然係值得肯定嘅。
佢又概嘆, 隨住年月過去, 呢尐曾經喺細個果陣陪住佢長大嘅巴士,
依家都已經喺街上全部消失, 取而代之嘅係滿街都係有冷氣嘅金色巴士,
昔日坐喺巴士上層開盡車窗坐車涼風嘅日子, 依家亦已經一去不返啦,
希望借住呢架丹拿 D 巴士, 去尋回香港嘅一些零碎嘅片段啦~

隆重歡迎! 九巴丹拿 D 型巴士, 見參!!










證書編號 0843, 全球限量 1000 架


正式落地!!




模型其中一個美中不足,
橫頭磡嘅英文名字 Wang Tau Hom 串錯左為 Wang Tau "How",
不過儘管如此, 亦未算破壞整架車嘅形象














丹拿 D 與丹拿 E




真車相片, 姊妹車 D332 同樣行走 7B 往橫頭磡



網上相片, 本文主角 D336 行走 7B 往橫頭磡, 地點為舊紅磡碼頭
可以見到背景為依家嘅紅磡灣中心,
曾經係 "紅磡人" 嘅你, 又有冇印象呢?
https://www.flickr.com/photos/46986413@N07/11311069594/


https://www.flickr.com/photos/46 ... /72157642535638045/
喺上面 Link 嘅網上相簿, 除左舊巴士之外, 仲可以揾到以前香港嘅背景相片,
同今日嘅香港相比, 堪稱一個強烈嘅對比,
細個果陣嘅回憶亦喺腦海中再次浮現, 雖然在下都係一個會貪新忘舊嘅人,
不過正當今日大家都坐住舒適嘅空調巴士四圍去嘅時候,
唔知點解, 我就會希望停留喺以前坐巴士嘅年代,
而且果陣坐巴士嘅果種感覺係依家坐任何一款新車都比唔到嘅,
甚至會感概地講一句: "都係以前嘅香港好~!"

或者, 呢個就係大家所講嘅 -- 懷舊...


Thanks for reading~

ctb234

丹拿D同AEC終於都有凸窗板模型出.
而且做到架車個神髓出黎.
丹拿D,E同AEC細個成日搭比較有感情.
希望出埋上米下紅同早期車身板本.

7466

上次AEC個咀怪到離晒譜
今次換番個咀即係有番個神髓喺度{:2_270:}

mfleo2010

印象深刻的巴士，記得小時候看見時在司機位置旁的那個引擎蓋上有少年會坐在上面，那是行車中的情況來的。:34:

多謝分享。