我覺得一個人外面打得市民，返到屋企一樣可以打老婆、打仔女

takeshi

雖然我相信文中的speed Dating的故事是老作居多，但帶出的思考卻很中!




我對佔領行動冇立場，但作為一個女人，我覺得一個人外面打得市民，返到屋企一樣可以打老婆、打仔女，我唔會信這種人，以強欺弱根本係懦夫行為。

Jessie唔止一次哀求我陪她去Speed Dating，我當然每次都推，因為我從來都唔信在那種場合會有「荀盤」，況且大家都知道我又真係唔急。Jessie每次返屋企之後都會向我報告當日戰況，我例牌問佢今次個男仔係咩職業，佢同我講做警察，我真係成個人彈起。我身邊嘅女性朋友，冇一個會揀警察做男朋友，老人家的智慧絕對唔可以忽視，一句「好仔唔當差」講得出口一定有理由。
Jessie同我講警察先生又大隻、又靚仔，坐低就睇中咗佢（唔好問我佢點解知，我都唔知點解）。我問佢兩個人傾計內容，因為點打開話閘子可以睇到一個男人的道行，再傾多幾句就可以睇到一個人的見識，

以下係雙方的對話︰警察男︰Hi，我叫Brian，點稱呼你？Jessie︰我叫Jessie，你都幾大隻，平時去邊做Gym多（呢招我教佢嘅，要起人底唔好問人住邊，問去邊健身已經可以反映好多嘢）警察男︰我，平時做嘢都有操開，我做警察Jessie︰原來係咁，咁你呢排應該好忙，旺角今日又好多人去「鳩烏」警察男︰前幾晚揮警棍揮到手軟，呢一班正暴徒，抵打，影響社會秩序。Jessie︰又係，佔領住金鐘，我揸車返工都煩好多。呀，你邊間大學畢業 （天真的她以為所有警察都是大學畢業）警察男︰你今日條裙好靚…..唔係話睇唔起警察，老實講大學畢業生都一街垃圾，更何況連大學都冇得讀，靠毅進攞番會考五科合格先夠資格去考警察。

我唔係話在中環工作特別高尚，其實我哋都係打份工，只不過份人工比做警察高幾倍。我叫Jessie諗諗兩個真係拍拖，你班朋友外國返嚟句句英文，點帶Brain出嚟社交應酬，呢個根本唔係佢嘅世界，你咁做同玩佢冇分別。我對佔領行動冇立場，但作為一個女人，我覺得一個人外面打得市民，返到屋企一樣可以打老婆、打仔女，我唔會信這種人，以強欺弱根本係懦夫行為。


我今日在facebook睇到有警察同個女示威者講︰「再嘈捉你返差館強姦」，我口講我心，真係唔排除佢將來都會咁做，因為一個心理狀態正常的警察，絕對唔會大庭廣眾講這種說話。我在電視見到班警察兇神惡殺，一棍一棍打落去，我隔住電視都感到心寒，我唔想有一日，我老公咁樣對我。仲有，天網恢恢，警察打完市民俾人起底傳到一街都係，真係唔知以後仲點見人。


聽人講做警察，特別係反黑成日要接觸黑社會，我在Youtube見到旺角有好多著住黑色背心嘅反黑，句句都係粗口，撲過嚟成隻癲狗咁，同朋友去高級餐廳食飯，佢忽然講句粗口真係邊度都唔駛去。阿媽講得冇錯，物以類聚真係冇錯。當然香港絕對有好警察，但老實，作為女人也沒必要拿一生幸福作賭注吧，對嗎？
文︰孫梓晴