銀河唯一的秘密，天際最強人物

冬暖夏涼小恐龍

http://hk.apple.nextmedia.com/news/art/20130415/18228695

歌仔有得唱「銀河唯一的秘密，天際最強人物」。最近四出踩場嘅愛護香港力量越戰越勇，前日由靜心BB帶隊，踩上喺城大舉辦嘅佔中論壇搞破壞。為咗維護愛國愛港同胞嘅神聖尊嚴，靜心BB同一眾愛港力戰隊成員，不惜踐踏公物，踩上演講室內嘅枱凳，指天劃地，疑似發射「愛港力死光」，嚇窒在場一眾斯文有禮嘅講者。
「愛港力戰隊」指手劃腳個post，氣勢實在懾人，《蘋果》同其他報館嘅攝影師拍低咗呢個經典一刻，隨即引嚟網民瘋狂改圖，傳頌靜心BB對國家維穩所作出嘅貢獻。
被諷為中共奴隸

「戰隊」一舉手一投足，令網民聯想起日本嘅超人戰隊，不過網民就形容，一個就係正義嘅朋友，一個就係中共嘅奴隸。又有網民將呢班「愛港力戰隊」改圖為革命兵，仲加咗句「愛港胡混，造反冇理」嘅標語。
有網民就諗起最近都紅爆網絡嘅高考「全攻型收音機」，認為「戰隊」擺出全攻型陣勢，足以大殺四方。但呢幅改圖都算陰毒啦，八方認為，網民其實係想暗諷愛港力同部收音機一樣，只係喺淘寶值28蚊嘅平價貨。八方呢個分析有根有據㗎，事關喺愛港力掃完場步出演講室之時，一班「調理農務蘭花系」嘅成員早喺場外「恭候」，大叫「搞事搞非愛港力，全職示威呃飯食」、「愛港力、收皮」，愛港力成員即時氣勢大減，對罵咗兩句之後就要由糾察護送下「東一隻，西一隻」，低頭敗走。