|
|
發表於 10-9-2011 00:22:47
|
顯示全部樓層
本帖最後由 Getterdragon 於 10-9-2011 10:11 AM 編輯
我都有認真地想過開玩具店，不過最後都不成事，考慮因素如下：
當你申請了牌照，有足夠現金
1：貨品類型: 你的售賣貨品類型係乜野？賣行貨or日版貨，貨源？向代理，批發商or經日本寄貨(要有接頭人)，
賣行貨,可能訂十款,俾得六款, 貨量未必足夠, 可能cut單, 仲要你幫佢食好多死貨.
賣日版貨, 匯率 係一個問題, 運費又係問題.
你自己喜歡,睇好的未必好賣，不喜歡的可能好賣，要預左多元化入貨，眼光好重要，自己對所賣的貨品認識多唔多先？
貨品 - 人無你有, 間舖先做得長久, 定期去日本搵貨, 係其中一個生存方法.
2.: 有無訂購服務? 訂行,日版or限定版, (如何取得足夠的限定版 和 如何安排寄回港,又係一個好複雜的問題)
3.: 做生意一定要守, 預左開始頭半年至一年要蝕錢, 你有無咁多錢,時間,勇氣去守先?
4.: 你預計開間店做幾耐, 有無定止蝕位, 例如: 攞 $50萬至$100萬 開店, 要你守一年, 蝕多少關門大吉!
5.: Full Time or Part Time, 如果 Full Time 要請人看店舖, 回報是否Cover 得到 所有開支, 租金, 人工 (你和店員), 最後是否有盈餘!
如果 Part Time 要考慮自己有無咁多精神,時間去買貨,訂貨,取貨,賣貨,看店 先, 日日收十點,假期無休息!
6.: 租什麼地方, 地方 Size, 長約or短約, 人流多租金一定貴, 賣的貨品價錢自然要set高d, 但係要考慮賣唔出變死貨的問題,
人流少租金可能會平d, 賣的貨品價錢可以set平d, 但係要考慮生意額是否足夠維生,
7. 銷售對象, 專賣medicom ,12吋 Hottoys or 賣雜貨 gundam fix, sic, 合金 又唔同做法,
對象係大人,學生,女性, 高收入人士, or 普通玩家, 定價可以分別好大.
8. 銷售方式: 想炒賣玩具 , 想Set高價黎賣 (直到人無我有), or 薄利多銷.
9. 自己性格是否可以 Service 別人, 都好影響你的生意額.
10. 會否提供售後服務, 貨品有問題, 會否願意換貨 or 送去代理 or 換件．
11. 賣唔去, 死貨如何處理, 安放地方又係一個問題, 可能要有 "壞帳" 的準備.
12. 淡市如何處理, 一年有好幾個月無什麼玩具推出, 點算?
13. 作風: 別舖加價 / 減價 / 炒價，你跟唔跟先，價錢波動，咁會好影響 顧客 對你的信心.
14. 對市場運作要好清楚, 要有敏銳的觸覺, 潮流興什麼, 你要考慮入唔入貨.
15. 心理準備: 自問EQ好高, 容忍度好好, 先好考慮開玩具店. 最好上網玩拍賣, 試下先,
市場有好多 "非一般買家",唔係人人忍受得到,
1. 驗屍官 - 叫你取十盒八盒出來俾佢睇, 最後可能唔買, QC力求完美先買,
2. 問題少年 - 一件貨品問你十幾條問題, 答完最後可能唔買野.
3. 寂寞少年 - 有d客行入店舖, 志在打發時間, 搵你吹水! 最後可能唔買野
4. 小偷阿星 - 入來店舖偷你玩具, 叫你精神不能集中.
5. 開盒王 - 未俾錢,未問過你, 開盒玩具自己檢查, check 款, 特別係合金, 盒蛋 cases 最多.
6. 換件王 - 買你一盒幾百元玩具, 少少問題叫你取第二盒幫佢換件, 實行玩 "六神合體".
7. VIP王 - 自覺係VIP 會員, 追求五星級服務, 你如果招呼佢,唔使招呼其他客.
8. 退貨王 - 全新玩具,當場check過無開封, 返屋企玩完話有小問題, 叫你換俾佢 (當然唔係破損問題)
9. 飛機王 - 似熟賣熟, 買過一兩次野, 叫你幫佢預留貨品, 最後有貨又放你飛機去其他店購買, 價錢可能相差不過 $20.
10. 談判專家 - 買少少野,什麼都同你講價, 講價平十蚊都係好既. (當然有d叫你平 $50-$100 都有)
我只係一名玩家, 無開店舖的經驗, 以上如有錯漏，見諒！ |
|
樓主: shwong
