回覆返上面幾位先。
dragonman 兄, 可能潮汐漲退情況有所不同啦, 我去o既時候反而係有魚o個邊好大浪。因為地形問題, 有魚o個邊俾o的石山夾著, 所以水流其實更急。
verywai 兄 & 史太林兄, 呢度已經唔算係好多魚, 而且幾乎全部都係同一種, 可觀性唔高, 我諗浮羅交怡o既巴雅島會精彩o的, 當然如果有機會潛入海底, 就更加會發現另一個世界。至於俾魚咬, 我最多都係試過手指中招...。第三幅魚相係我老友幫手o係鏡頭外拋麵包引o的魚埋去先有咁o既效果。
好, 開始下半部遊記。
到 Day 4, 我地參加o左 Local Tour 去攀牙灣國家公園, 一個香港人極少會踏足o既地方。基本上都係遊船河o既行程, 活動範圍主要就o係遊艇上。
攀牙灣係一個好大型o既海上風景區, 山水景致有o的似桂林, 上百個形狀奇怪o既小島散o係海面, 確實難得。同船一齊o既大部份都係英國人, 亦有中東人同印度人, 就係唔見黃種人...。
遊艇碼頭附近一攝~~
終於起行!!
呢o的就係攀牙灣入面好典型o既海島, 圓圓地、石頭上面翠綠一片, 冇沙灘, 基本上船隻都係無法靠岸。
o黎一幅遠景：
由於幾條船一齊出發, 所以前前後後都會見到同類型o既遊艇....
o黎多幾幅 Snaps 先!!
船尾... 冇欄杆... 都有機會跌落去...
成個行程就係一口氣駛到最遠o既景點, 然後逐個點玩返轉頭, 所以第一次落船已經接近正午...
呢度係回教徒o既水上漁村, 整條村都浮o係海面, 規模頗大。講到尾, 呢度同大澳o既感覺差不多啦。
但要留意o既係, 泰國係佛教國家, 竟然會有一班回教徙o係咁偏僻o既地方建立自己o既社區, 實在一o的都唔容易。同行o既幾位中東遊客就係特地為o左睇o下呢條村而參加 Tour。
下面呢部就係小型駁船...
哈哈, 跟住我訓o左o係碼頭度, 訓訓o下貼住個地板影o左呢幅.... 可能我將來某一日旅行途中死在路上時, 就係會用差唔多o既視點、角度同呢個世界講再見??
午飯o係遊艇上面食, 菜色意想不到都幾豐富!! 飯後去船尾吹海風...
第二站係 "Khao Ping Gun", 亦即係三十年前某套 James Bond 電影o既取景處。o係海中要換乘長尾船上岸, 島上入口被兩座巨岩包圍, 頗有氣勢。
裡面除o左奇石之外, 主角就係內海灣中形如鐵釘o既岩山, 上闊下窄筆直地插o係海中, 奇哉怪也。
可惜當時光線角度好差, 個島本身o既石山又形成o左奇怪o既投影, o的相實在好唔靚....。呢個就係 James Bond Island...
Close up!!
下面呢幅我幾鐘意!!
第三站開始我實在無法冒險帶相機, 因為開始要座獨木舟。目的地係好幾個小島同有水道連接o既山洞, 近距離接觸奇石都係個不錯o既體驗。
臨走前操舵o既泰國人不斷對我地講一個泰文名詞, 正當唔知佢想點之際, 佢忽然向上一指："This is what I'm talking about!!" 原來.... 係一條非常像陽具o既巨大石柱, 當堂爆笑!!
下一個島係鐘乳石洞內o既探險, 山洞好深, 有o的地方水深及膝、亦有時要低頭彎腰而過, 比長洲o既張保仔洞好玩得多。
原來山洞終點係島o既山腹地帶, 有一大片濕地同紅樹林, 泥上面全部係蟹仔、彈塗魚、仲有馬騮 ---- 完全勾起高中同大專時代做 Project o既回憶…。
好啦, 終於玩完最後一站, o係遊艇上乾蒸o左成日, 可以落水啦!! 船上o既年輕泰國導遊立即扯著我："You may jump now!!"
原來係搵我第一個由船尾跳海。船尾o既高度大概有兩三層樓掛?? 雖然係高o左o的, 但本大爺都二話不說, 砰地投奔怒海, 好過癮~~~!!
回程中, 當然又要 Snap 一下...。
返到酒店, 唔少得要整返杯清熱o既沖劑。仲o左一般平安藥物之外, 我無論去邊度旅行都會帶住十包八包, 每晚臨訓前整一杯, 乜o野熱氣、喉嚨痛、暗瘡、便秘、口臭都通通踢走。
當然唔少得泰國特產o既冬蔭功杯麵, 而我亦好懷疑... 究竟泰國o既杯麵除o左冬蔭功味之外, 仲有冇其他味道?? 入到超市, 隨手拎起都好似係唔同牌子o既冬蔭功味...
之前講過布吉我總共去o左三次, 但原來頭兩次我都無試過o係最大o既巴東海灘游過水、亦未o係呢度欣賞過日落, 頂多只係天黑之後去酒吧街飲o野、再順便去沙灘吹吹風。第一次去o既時候, 幾乎每日都安排o左其他節目、第二次就因為酒店太遠, 終於去到第三次先有機會。
第三次布吉之旅, 係 2011年 1月, 玩並唔係目的, 因為我要同一位老死考進階潛水牌 (Advanced Open Water Diving)。忽然扯起條筋去學潛水?? 我實在太鐘意海啦!! 無理由一隻水怪只係識o係水面游o架o麻!! 尤其係兩年前去沙巴浮潛, 見過些少海底珊瑚之後, 就更加堅定我o既決心。
又有人會問：乜唔係無牌都可以潛咩?? 冇錯, 無牌係可以潛, 不過每次潛之前都要上 1-2 個鐘o既堂, 就算你話之前上過, 始終人命關天, 唔會有人夠膽去豁免你。落到水之後, 教練都會好似拖狗仔咁扯實你, 乜癮都冇晒啦。再者, 無牌人士通常只會去一o的唔夠十米水深o既潛點, 可觀性有限。
咁點解要山長水遠去外國呢?? 其實第一個初級牌我係o係香港考, o個次真係深切地體驗到香港水域係幾咁趕客, 西貢o個邊能見度有三米已經要還神, 落到水底乜都見唔到, 都幾恐怖...。所以, 話就話去考試, 其實亦同時借機會去欣賞壯麗o既海底。(先賣o下廣告, 要睇海底相, o係我之後o黎緊o既第四彈遊記就會有, 敬請期待。)
潛水期間o既經歷我唔多講, 反正冇相 (當時我地冇水底攝影裝備), 齋 Talk 超悶, 除非你地有興趣想睇我先再寫啦。下面係一o的我僅有影返o黎o既相：
酒店一角, 無聊一影 ----
整o的美食相先, 潛水店老闆亦介紹o左一間專食海南雞飯o既舖頭俾我地, 果然好食到 Two Thumbs Up!!
大排檔美食, 先來個泰式炒飯。
酸辣炒麵、大虎蝦、泰式炒河同椰汁鹵豬肉....
地道全餐~~
超市甜品。各位, 以後去旅行一定要記住：酒店o個個只係雪櫃, 並非冰格。所以, 放雪糕進去是會溶掉的。
影完相之後, 我地用湯匙一 "畢" 落去... 成兜o野就變到嘔吐物咁款...
然後, 送上巴東海灘o既日落同晚霞....
撞正退潮, 沙上濕濕地反著少少水光...
好啦, 今次係咁多。
後記 ---- 布吉呢個地方, 我諗我以後都會 Keep 住去, 除o左有無數唔同o既潛水勝地之外, 又近又平又方便先係重點, 遇著假期, 隨時自己請多一日已經夠玩。而呢個地方俾我o既最深感受, 竟然係o的西方遊客。
我地去泰國係一個好平o既選擇, 但西方人就o岩o岩相反, 佢地要座十幾廿個鐘頭機先可以o黎到 (情況等於我地去歐洲咁上下啦), 所以o係呢度出現o既西方人, 唔少都係非富則貴。佢地好多都鐘意晚晚食煙隊酒, 日頭就o係沙灘度唔郁咁曬曬曬, 玩一頭半個月先返歸。
見到佢地大大件、成日頂住個大肚腩仲要暴飲暴玩暴食, 然後再望o下細細粒o既當地泰國人, 唔知點解感覺唔係幾好。唔關貧富懸殊事, 而係生活方式o既問題, 感覺上, 富裕國家o既人民都消耗太多資源啦, 其他發展中國家, 永遠都好似為他人作嫁衣咁....。加上泰國向來色情事業發達, 雖然布吉比起芭提雅相差十萬九千里, 但不堪入目o既情景仍然有。好多鬼佬 (恕我終於要用到呢個有乏義o既稱呼) 去泰國根本一心要玩呢o的o野, 玩女已經好好, 更多o既係玩人妖、玩少年.... 而且仲要係光明正大地拖著出街, 我真係接受唔到。
我見過最誇張o既係一個六、七十歲o既白種人阿伯, o係酒吧街招遙地拖著一個十幾歲o既泰國少年, 表情仲要氣高扯揚, 覺得好威, 我都唔知講乜好。
最後, 布吉出名o既靚島基本上只有 Phi Phi Island 同 Maya Beach 未去過, 但正如我o既潛水教練話齋, "你落過水底, 就唔會認為花兩三個鐘來回去靚沙灘係值得o架啦"。所以, 如果下次去唔成泰拳 Training Camp, 我就會向離布吉唔係太遠o既潛水勝地 ---- 斯米蘭群島進發~~!!! |
發表於 18-8-2011 00:46:37
樓主
