|
|
樓主 |
發表於 18-4-2010 08:56:14
|
顯示全部樓層
在上次Robotman的post中，最後有位只出了一個post的朋友寫了這篇回應...
****************************************************************************************************************************************************************************************
先向各位say hi 先！！
小弟（老小弟）只係呢個星期先上黎睇下”玩具日報”這個網頁，因為我一個人屈響間小屋仔度，根本連放一個超合金既位置都冇，所以好多童年玩具回憶只係響兆萬及皆旺既商場睇下就滿足喇, 亦沒什麼佔有慾。直至近排有個老友成響我屋企上網睇玩具野，我反而多左接觸而家既玩具資訊囉。不過......
無意中，睇到呢個post，他媽的，我沒眼花吧, 已消失既一個玩具回憶又再一次被翻起了，點解?? 我好記得, 我小學一年級時, 當年未上公屋, 全家人只係住響塘尾道一個小單位，每逢家人有病, 都會搭好耐車去觀塘，再轉車上秀茂坪睇一個"家庭醫生"。
響我一年級時，因為有病，阿媽請左假, 帶我去秀茂坪睇醫生, 當睇完再搭車去觀塘轉車時，路經月華街時，阿媽話行入去入面睇下野先~(即係行入而家觀塘去佐敦既紅van站頭果度，其實以前同而家都不大分別，只係冇晒小販推車檔囉)。
誰知，今日響呢個討論區度睇到既一個入電既機械人玩具，當日只不過係一個位於仁信里既一個推車小販檔既玩具丫? 當時我阿媽拖左我行過去，我冇記錯, 當時有兩款入電機械人賣，每個賣大約$50元港幣(當年維他奶每枝賣8毫子，太子道1千呎洋樓市價大約65萬，時任港督聽講話係麥理浩爵士做緊~)；一款就係樓主呢個post既相片入面果個，個頭好細的, 顏色大約係藍色同白色。而當時我太矮，看不清楚全部，但又被呢一個入電機械人既超大盒裝既包裝吸引，結果買左另一個款。
當日阿媽買左另一款果個機械人個樣係.........個頭銀色，好似半個饅頭咁既，有對短短地既牛角，個身既顏色係黑色，手腳我就真係冇咩印象喇，好似黑色加銀色。呢個玩具我玩得好開心，佢可以分體，上半身可以自己旋轉，對手又得，背脊仲有條坦克車帶，成個機械人可以訓響度咁行前行後，當時又鍾意機械人模型同埋跑車模型既我，真係好開心架。但........好境不常, 玩左佢一個星期左右(大約每日放左學，玩2至3小時左右)，佢個摩打就蒙主寵召左，當時我由小學2年級，拆開又砌番佢又再拆開，足足搞一到成小學5年級都整唔番好佢，當時內心好down。當有病要去睇醫生，都扭計行番入去仁信里，睇下可唔可以買番個機械人，不過，每次都見唔到佢擺檔(當然都未同阿媽講話要買番個機械人啦，等見到果個人擺檔先扭計都未遲)。
其實，呢個入電機械人響當時令我學識好多野，當時我屋企唔會有"辣雞"，就用爉竹，滴d爉去焊住摩打既電線(當年日本未流行玩滴爉)，又用鐵筆盒當鎚仔，鉛筆刨刀片當一字批，而家諗番起, 都覺得好白痴。不過，童年雖然非常窮，但玩具總係不缺少(不過係冇遊戲機囉，阿媽應承中左六合彩就送比我架!)，玩具來源至今仍是個迷，沒有盒, parts 唔齊，好奇怪，我係玩完咩野, 都入番入盒, 放響床邊望住佢訓。
不經不覺, 30年了，由一個白痴到咩都拆下佢, 試下自己維修一下既細路，已變成今日...........(閣下以為我已發左達，或者係身居要職，收入豐厚嗎?) 不是，仍係當日果個我(外型除外)，喜歡怎幹便怎幹，條件係唔可以騷擾到他人就得喇~不過講到擁有一個心愛既玩具, 就不同以前了，只要再見一眼，或看見別人購買時面上果種喜悅時，我內心都好溫暖，亦明白有時, 有些東西安放在適合既地方, 給適合既人士去收藏，總比自己去擁有更理想，而最近常到呢個forum都係想睇多d大既收藏及分享，亦幸運地睇到呢個post, 令我又諗起一d童時往事，不過仲有，雖然口講唔太去收藏現今眾多既玩具, 不過男人先天性既細路仔性格氣總會有d，我儲緊錢, 想買個v型電磁俠果個超合金啊, 又可以分體5架野果個囉, 而家成日去yahoo拍賣睇下, 又去呢度睇下, 可能儲多3,2個月都夠錢買架喇~不過要強調，我仲係堅持呢個v型野, 響d玩具店度買囉, 好想有兒時響買左玩具，雙手攬住玩具果種滿足感覺，同時亦對阿爸阿媽有著一份絕對既服從, 又唔會扭計唔聽話，鬼死咁乖直到果個玩具開始玩到悶悶地為止~至於明白到二手拍賣係會慳d 錢，不過只不過係第一個步入中年既超合金, 可能係唯一一個；因為讀幼稚園高班時(當時讀新法書院，有錢仔學校)個靚女同學主動借比我玩一陣個v型電磁俠超合金，果陣賣60蚊左右果個size囉，所以覺得而家選擇番呢個卡通人物買一個, 都幾好丫，至於價錢就跟隨大市走勢囉...........哈~
最後真心感謝出呢個post 既樓主，放youtube 果d link 同資料既網友，我feel so good 啊睇完, 忍唔住打七咁多字上黎悶下你地，問你死未~哈~
******************************************************************************************************************************************************************************************
有一段時間我突然對心愛的玩具冇晒感覺，唔想出街睇玩具及買玩具。幸好當時見到這篇回應，使我回想返我起初點解要儲玩具及玩玩具..
使我回想返與呀Dick一齊創立TD的目的，就係要互相分享大家生活的點滴，盼望能在討論中大家得到共嗚，多謝大家多年來對TD的支持!編輯們一定會繼續努力的! |
|
樓主: TD玩具老師
發表於 17-4-2010 23:31:30
