九廣鐵路局 EMD G16 柴油機車 -- 九鐵柴油機車的光輝歲月

SuperBus

(心跳巴士迷俱樂部會長 Monika 報導)
今日前稱九廣鐵路英段嘅港鐵東鐵綫, 全綫都係使用附有空調設備嘅電動列車行走,
但係喺八十年代電氣化之前, 九鐵自 1910 年正式通車起係使用蒸氣機車拖曳載客車卡行走,
至六十年代由柴油機車所取代, 所以儘管九鐵已經改稱為東鐵綫至今,
喺香港依然仲有唔少人以 "坐火車入沙田、大埔" 稱之。
今日到埗, 港鐵最新推出, 九廣鐵路局美國 EMD G16 柴油機車 59 號車,
就係當年拖帶載客車卡載運乘客往返九龍同新界嘅其中一員,
全員四架 G16 柴油機車於 1961 至 1966 年間投入服務, 編號為 56 - 59,
並且以前九廣鐵路局同九鐵公司嘅英籍高層命名, 本文主角 59 號車就命名為 "霍士傑號" (Gerry Forsgate),
其餘三架分別為 56 號嘅 "杜利華號" (I. B. Trevor)、57  號嘅 "侯偉志號" (Bobby Howes)、
同 58 號嘅 "簡霖號" (Gordan Graham) , 佢地喺九鐵一直擔當吃重嘅角色,
直至 80 年代電氣化之後, 只作拉動貨卡及緊急用途之用。
佢地喺 2007 年兩鐵合併之後亦租予港鐵公司使用, 但係由於佢地當時已經有相當嘅車齡,
57 號車更因為機件問題早喺 2009 年退役, 並且喺 2014 年末正式報廢拆解。
而且隨住港鐵喺 2010 年停止貨運服務, 佢地只會作為夜間工程車之用,
地位亦不及以前重要, 本文主角 59 號車則喺 2018 年進行工程期間與 60 號車相撞,
60 號車經過復修後再次運行, 但係 59 號車卻因此宣佈報廢, 最終喺 2021 年被拆毀。
餘下嘅 G16 機車由於車齡已高, 最後喺 2021 年2 月宣告退役,
其中 56 號車經港鐵於 2023 年末起進行復修之後, 以退役前嘅車身色彩,
喺 2024 年四月起假紅磡站 5 號月台展出。

呢款 "柴頭" 喺超過半個世紀嘅服役生涯中, 曾經披上三個車身塗裝,
除左本文主角, 九廣鐵路局時期嘅深綠色塗裝之外,
亦上過九鐵電氣化之後嘅灰藍色同最後以紅色為主色嘅車身塗裝,
同時亦見證左由九廣鐵路局、九廣鐵路公司到兩鐵合併後嘅港鐵三個時期嘅變遷,
不過 Super Bus 話佢個人覺得始終深綠色最好睇, 夠古典味道之餘亦都係佢一個童年嘅回憶,
而且呢款 G16 亦係九鐵踏入柴油機車年代嘅代表之一,
同時亦代表住佢地喺九鐵尚未電氣化前嘅光輝歲月,
Super Bus 仲話雖然佢果陣始終仲細個, 對坐呢種火車入新界嘅印象比較模糊,
係睇番一啲七、八十年代嘅電視片見到呢款柴頭勾起少少回憶,
印象中車上仲好似有人喺車上賣野食, 好似仲有雞髀賣, 不過隨住九鐵電氣化, 車廂內唔准飲食,
更加唔會有人再喺車上賣野食啦, 如果各位有坐過當年嘅火車, 又不妨分享一下你地當年嘅經歴啦!
至於灰藍色, Super Bus 就話佢個人就真係覺得麻麻, 因為喺佢地做左拖貨車之後,
每次見到佢地行過或者聽到佢地嚟緊果陣真係要準備定掩住鼻兼屏住呼吸,
尤其是當見到佢係拖豬車嘅時候就更加惡頂, 仲要係隔幾條街都可以聞到,
可以想像當年用 "柴頭" 拖卡載客嘅年代, 車廂仲要冇冷氣要開窗等空氣流通,
一有豬車經過真係閂窗都閂唔切,  如果入隧道嘅話就更加係災難!
就算你係坐喺冇得開窗嘅電氣化火車嘅車廂入面,
啲豬車經過所發出氣味依然難以招架, Super Bus更笑言: "正所謂一係唔好再提,
一提番起, 果種陰影同令人印象難忘嘅氣味又全部返哂嚟!"
(Super Bus 按: 除非你唔介意, 或者對呢啲氣味毫無感覺)








玆證明限量推出 3880 架, 此乃第 0742 架


正式落地!! 心跳巴士迷俱樂部, Sayori、Natsuki、Yuri 同 Monika,
帶您一齊感受九廣鐵路 EMD G16 柴油機車帶來嘅心跳回憶!!








柴油機車時代嘅九廣鐵路局標誌










與九鐵 "黃頭" 電氣化火車相會


正所謂長江後浪推前浪, 黃頭經過達四十載嘅服務生涯,
亦同柴油機車一樣踏出歷史舞台, 由東鐵綫現代列車取代




附上 Youtube 揾到嘅一輯長三十六分鐘嘅紀錄片 -- Kowloon-Canton Railway (British Section),
介紹 1974 - 1983 年嘅九鐵, 可以見到當時柴油機車嘅運作情況,
以前九鐵各車站 (包括尖沙咀舊九龍總站) 嘅面貌, 同當時路綫沿途嘅景色 (英文旁白)



Thanks for reading~