魔術師的玩具2022
本帖最後由 Garycharm 於 14-5-2023 05:12 AM 編輯魔術師的玩具總結2022
大家好！很久不見了！很久不見了！小弟已經移民加國了。諸事繁忙，所以要到5月先可以做2022年總結。我移民去新地方，一切都係未知數，不過有一件事係「肯很定」，就係要戒玩具。點解？因為根本買唔到。所以舊年年底開始我已經冇上TD，費事見到乜鬼嘢新品預告、或者大家嘅放閃post我會眼冤！ {:8_643:}
話分兩頭，舊年因為預備走佬，上半年基本上冇心情買玩具。到下半年，一切差不多定檔，諗到「依家唔買就冇機會」、「人生最後一餐」等等，就買咗好鬼多。我買得最多係模型，一口氣買咗近三十盒，其中仲不自量力有幾盒五星添。結果全部未砌。未砌嘅就冇乜好講。其他嘅，隨意講少少。
2022年心情複雜，買玩具又經常後追，好難揀乜鬼嘢最好最差十大，以下真係隨意講下：
King Arts 金剛 （特別色）
照道理，買玩具應該要買原色版。不過King Arts處理色彩真係有問題，原色版金屬藍色紅色都有種「娘娘地」老翻感。我自己大愛金剛，當年上超人睇幾次實物都買唔落手。就算後來被大讚，然後缺貨、開始升價，我遇到原價都係唔想買。依家佢出特別色，雖然怪怪地，我反而接受到。
依家每間廠都建立自己賣點。KingArts主打玩內構、會拆甲；亦即係話會多部件，把玩時容易甩。呢個係佢特性，要先有心理準備。
本品大部份外甲都係「磁石+插樁」式，穩固程度可接受。最易甩的地方係肩甲和小腿的十字鏢。十字鏢還罷了，只要擺好pose，最後安插就可以。而雙肩真係堅煩，我玩幾次，肩外甲其中一枝小插樁就斷了，影響是不太大，但掃興。
佢配件超、超多，不過唔係武器，係裝甲。金剛本來就有前期型及強化型兩種形態，King Arts式內構算第三形態；再加上各部份都有戰損件，玩家可以按喜好配搭出由輕微至嚴重等損壞形態，不過我懷疑冇人會有心機咁玩~~~
金剛係原祖級「顏面機械人」，頭部牛角加上腹部洗煉的龍頭，由合金玩具表現出來真係靚到我醉醉地。加上King Arts份量（比CCtoys天元更高更大！），外型絕對霸氣。佢一企出嚟，信我，足打敗你家裡八成以上玩具。有時玩玩具，一個優點就夠。
HG忤逆仔 舊年年中睇完Gundam Hathaway ，角木肇的機設越睇越靚，大開眼界。立即想買隻忤逆仔高達。Gundam Hathaway 產品本來不多，robot 魂等更炒上了。想了想，還是去買模型。可惜忤逆仔未出MG ，只好買HG頂癮。
幾年冇砌模型，家裏的工具殘缺不全，不過反正我也冇時間慢慢搞，還是懶人三寶：素組滲線消光算了。我一路重播Gundam Hathaway 套戲，一路砌模型，好享受。
忤逆仔本身算係大型機體，就算係HG，砌好之後都幾大隻，仲算幾靚。
這盒忤逆仔沒有marking 貼紙，機體本身又寡，唯有在家裏找份舊貼紙胡亂貼上去，擺明唔啱，我又唔係參加比賽，冇所謂。玩具嘛，喜歡就好～ 玩完忤逆仔，自然忍唔住去搞埋隻大白鵝。比較之下，大白鵝就差少少。可能因為我只係素組，如果大家有心機上色，可以企鵝變天鵝也未可知。
Bandai DX 超合金裝甲韋基利VF-1J
由威將一堆KO放大柯柏文、到CCtoys、King Art、Pose +，玩具隻隻都鬥大鬥重，1/48Valkyrie早已唬不了人。不過今次有重裝甲撐大變肥仔，仲有一對性感大拳頭，仍然好有存在感。
VF-1變形系統早已非常成熟，不用介紹。呢一盒重點係重甲。這副重甲的手腳肩胸都算易裝易拆，很順手。下盤和背後推進器就要花一點心機。下盤（髖部）有六件組件（不計飛彈），建議先獨立試裝一次，才裝上機械人上。說明書上背部推進器的插入位指示不夠清晰，要看清楚慢慢來。
這副傢伙是我去年底離港前所入，那時只賣2K頭，相當抵玩。
千值練 勇者雷登
千值練這個品牌，近年質素參差，我已經很有戒心。呢隻雷登，缺點係頭太大，本來都冇打算買，不過當時我將要離港，都知日後難買玩具，就順手買隻玩下。總算冇令我失望。
我對廠方將角色魔改不會太反感，只要改得好改得順眼就得喇。不過唔好太為改而改、刻意加太多細節，變得畫蛇添足（例如CC toys 天元）。呢隻雷登，由推出官圖開始，我就覺得佢魔改得幾過癮。尤其將雙翼重新詮釋，簡簡單單，又解決咗原裝版本那個「必須換件」的外甲問題，兼且又原創了反向前出必殺技，好有型。
因為體型小巧，加上變形簡單，千值練今次表現游刃有餘。拎上手算幾好玩。
本帖最後由 Garycharm 於 14-5-2023 03:59 AM 編輯
CC Toys螺旋王
保持CC Toys一貫水準，大隻、美形、高可動。相比同公司的紅蓮螺巖，螺旋王沒有經太多魔改（還是我們本來對螺旋王就冇咁執著？）除咗無端端多一個王座之外，唔算有乜特色。不過簡單就是好，有時買玩具就係想買角色。只要佢認認真真生生性性出一隻好合金，唔好「每次慳成本、然後改少少嘢又大事宣傳出多一隻」，玩具迷已經滿足。
Hihi 笨大！聽到未呀？！
Bandai 超合金魂鐵甲萬能俠
每次超合金魂又有新鐵甲萬能俠，總會宣傳佢今次又改咗乜呀、活動能力又好咗好多呀咁，睇到麻木。其實玩具迷都心知，Bandai超合金魂要保留卡通原味，除非改到變 Metal Build 咁爆甲魔改，否則關節發揮有限，大家都唔會太大期望。今次比較特別係鐵甲飛拳發射器隱藏喺關節內，發射按鈕更直接放在肩膊後，可以不用換手臂直接玩，效果都算唔錯。外型上……都係咁啦，我覺得上次DC會靚少少。
King Art 太空保衛者
去年底推出時，因設計優秀，頗引起玩迷間一陣熱議。我早已經落訂，等老友收貨再寄俾我，只看得口水直流。到四月終於到手，我才能拆開這份遲來的聖誕禮物。
本品體形龐大份量十足，拿上手感覺極似十多年前Yamato那一隻產品。然Yamato太空保衛者為要增加巨大感，過份把雙腳拉長，比例不好看。另外Y記的關節不足之餘，關節又不好用，膝關節更有點不夠力，擺pose時會力不從心。以上缺點，這隻King Art 可算完全沒有犯上，兼且又可以拆甲，非常好玩！
說到拆甲。早期KingArt的設計很瑣碎，難裝但易甩，好睇唔好玩。今次太空保衛者把插樁加粗，大大方方的，外型不會差了多少，但好用得多。絕對是合金中的精品！
說缺點，係稍嫌關節不好用，好難擺出好姿勢。不過呢隻巨物，又真係唔駛點擺pose 嘅，係咪？
本帖最後由 Garycharm 於 14-5-2023 04:00 AM 編輯
Lego 42127 Batmoblie
咁多代Batmoblie之中，2022年羅拔仔嘅The Batman 走寫實派，蝙蝠車唔算特別靚。不過呢架 Lego Technic 真係出得好好。首先佢夠大架，長度幾乎同 Bat Tumbler 一樣，而價錢平近三倍，好抵玩。講到Bat Tumbler ，佢被詬病一塊塊護甲太鬆散，外型唔夠緊緻之外，亦易甩件，就算出到第二代都未有大改善。
比較之下，呢架Batmoblie就堅固得多，我俾老細（我個女）粗玩都冇乜甩漏。完成後外型會比相片更靚。機關方面，本 Moblie不設武器，乜嘢飛彈呀伸縮機關槍呀一蓋都冇。車頭車尾車門可以打開，頭尾引擎分別設有兩組獨立燈。隨著推動車身，車尾引擎有機關連動，喺燈光配合之下，好靚。比較特別係車頂可以外加一個小手掣，作用似軑盤，當推動車身時可以改變方向。說起呢個手掣，起初我睇介紹就唔多鍾意，不過實際把玩，可以好暢順咁控制呢架咁大架Lego車，又意外好玩。
缺點係Lego Technic 那些一枝枝一粒粒的插樁式組件比傳統Lego 難砌得多。通常越到後來，因為結合的組件大了，插樁多了，就越難砌，亦容易錯。整過裝置過程趣味不及比傳統 Lego~~
本 Moblie 不附設 Batman Lego人仔，事實上Lego人仔亦唔啱比較。要配人偶的話應該係1:18，依家勉強可以坐上SHF ，不過要睇角色，那隻SHF The Batman就坐唔到喇。
SHF The Batman
配件多、布被風，關節好用，更附有人面頭雕。因為人面係黑眼圈，所以可以遮掩SHF面相技巧不足。依家整體質素真係幾好。相信係SHF最好嘅一隻Batman。
Pose+銀河烈風
講設計，Pose + 真係CLS，係變形合體夾口硬係爭少少，一般關節亦偏太緊。又，我竟然覺得隻雀好好玩。 玩上手，感覺有D似早期ES 的Q版合金，變形有心機，可動足夠有找。不過可能係油漆問題，變形位置開合之間仲係「有少少唔順唔順」。個別活動/變形關節亦過緊，要小心玩。
Lego 41714 —— 推介比鍾意舞台嘅朋友
我玩Lego 特別鍾情建築物、情景，最重要係要有機關，機關越多越好。呢一套產品本來已夠滿足我興趣，更特別係今次主題係「劇院」。
砌完之後，整體唔算好大，有三層，勝在有前有後。未打開之前，劇院外觀已經好靚，有海報、有羅馬柱、有正門、有售票處。而且有街燈及郵筒等等小物件顯示街景。簡單放在家，已經很有看頭。
打開建築物見到內部，嘩，不得了…… 觀眾席見到有活動布幕、有喇叭、有貴賓廂。舞台內部更加犀利，有light bar、有#景片，舞台後方的大佈景可以更換。side wing 後有控制台，此外服裝、道具及化裝房間一應俱全。台下有廁所、雜物房，而且更有一個舞台地道機關。道具方面，今次Lego 做得大方，除了角色頭套、樂器、刀刀劍劍之外，有少少搞笑物品，誠意十足。
本帖最後由 Garycharm 於 14-5-2023 04:01 AM 編輯
Three zero 加里昂
好好玩、好抵玩。惟一問題係拆腳（分體）相當麻煩，甚至易爛。如果你依家至去買，買咗，發覺你嗰隻對腳都係好實，建議放棄分體（尤其你唔肯定仲有冇保養），就咁玩已經好開心。
我特登將佢同十幾年前隻Wave 鐵巨神比較下。兩隻來自不同設定，Threezero係TV版，Wave係OVA版。難得係兩隻幾乎一樣高，放埋一齊，童年回憶返晒嚟，熱血爆燈。
Wave版幾乎全膠，Threezero 版大量合金。Wave版按OVA設定，不能變形。Threezero 版可變。Wave版身形比例完美。Threezero雙腳稍長。Wave版有分普通版和金屬色版，我這隻係金屬色。Threezero 版係一種舊化的金屬色版。Wave版武器一劍一盾。Threezero 版有劍有盾、大炮，另有一枝變成鋼索的軟劍。Wave版價錢我已經不記得了，大概2、3K，屬當年的超高價玩具。Threezero 版約1K頭，以現在標準，根本係大家樂價。
結論：兩隻都要！！！！！{:8_721:}
GFFMC MS-06F渣古 庫克羅斯德安島 Ver. 墨綠色機身配以Bandai一粒粒白色強迫症式的標記，加上合金骨架，讓這隻渣古有一份很討玩具迷喜歡的外觀和手感。MG式王道關節，又不像同系列Gundam那麼緊，玩得順手。
故事中德安渣古用了很多舊零件拼湊，身上傷痕累累、頭部也有點變形。這盒GFFMC 表達得不太道地，只算意思意思而已。
武器極豐，能量斧兩把（開動及靜止各一）、雷射槍一枝，最誇張係有四枝大炮，各可以更換部件轉換形態，另彈匣若干。所以雖然渣古沒有高達核戰機的變形玩法，但仍然豐富好玩。
SHF Black Sun 冇期待之下，呢隻幾好玩。色靚外型靚，比較之下，之前隻「真幪超」簡直係真玩笑。蝗腳劍（誤）造得認真，胸甲更換方式都算方便。
好靚好玩。
超合金魂GX-101大鐵人
外型靚過AT果隻（應該啦！），變型都流暢。雖然未有超惑星巨人驚喜，不過我都好滿意。始終我哋對大鐵人感情大好多！
又，如果GX-100唔係隻宇宙飛龍而係巨，相信都唔會俾人鬧得咁勁！
CCToys 真三一
夠大夠惡，型到一個點！依家唔同公司有唔同方向，我誇張D講，對於一D非合體變形機械人，CCToys無論係體積、質感、關節、甚至價錢，都可以話係我哋….起碼係我啦，係我咁多年嚟所期待既合金玩具極緻。惟一有少少意見係，因為要顧及活動能力，呢間廠嘅風格都係要魔改。都好吖，如果想原味嘅就揀Bandai，想玩嘢嘅就揀佢。多個選擇都好。
本帖最後由 Garycharm 於 14-5-2023 04:01 AM 編輯
DX暴太郎戰隊Don鬼退神 大隻、實淨、簡單。因為要顧及結構穩陣、又要減低成本，分體狀態基本上五舊嘢都係一碌葛，合體淨係拆拆拆砌砌砌，講唔上乜嘢變形。可能因為咁，合體時候頭部、胸口，都有簡單機關玩下。手腳叫做可以郁吓，不過擺唔到乜嘢pose 。齒輪關節為軀體提供穩定性，不過亦都限制活動幅度，好難做微調。兩把大刀都係用插裝式插入手掌，限制了拿劍方式，不能調節劍刃方向，亦不能反手拿劍。戰隊合體不嬲好玩過超合金，除咗人氣不及之外，過去戰隊缺點係唔夠靚仔，今次鬼退神外型絕對討好，算係顛覆命運。整體來講，如果原價入手都會玩得開心，炒價就千祈唔好制。 本帖最後由 Garycharm 於 14-5-2023 03:48 AM 編輯
以下係一D立立雜雜，我覺得係舊年幾靚幾好嘅玩具：
本帖最後由 Garycharm 於 13-5-2023 08:32 PM 編輯
以下係我覺得兩隻ok樣衰玩具：
徐錦江
羅慧娟（羅小姐，對不起了）
本帖最後由 Garycharm 於 13-5-2023 08:35 PM 編輯
以下呢隻係2023年產品，因為我真心覺得好，就順便推介一下：
TransformersStudio Series---- Scourge
我已經好耐冇買孩記變形金剛，因為真係玩到悶。呢幾年我只收T記嘅MP，相對多少少收藏價值。不過呢隻唔同，一出官圖已經好吸引。特別係車型，成架Mad Max咁。當然啦，我都知「官圖無限好」，就做足心理準備，訂咗先。電影版最新角色Scourge，前身係Thundercracker，即係同星星叫差唔多樣（星星叫係紅色，佢係藍色），又成日一齊行動果架飛機。後來俾 Unicorn 收編變身，變為一架太空船，就改名叫Scourge。比較特別係佢故事後期曾經扮過柯柏文，所以今次就俾佢變為貨車頭。一來俾老Fans有話題，二來真係吸引過變乜鬼太空飛船。先講車型，車頭我大讚，Mad Max車款原來咁適合變形金剛，所有變形夾口都可以自然隱藏。車頭散熱口仲有幾粒狂派標誌點綴下，好靚仔。相對之下，車尾（即機械人腳部）就好求其。佢變形不過係將兩隻腳180度翻轉，將雙腳由內側轉到外側。佢簡單唔緊要，問題係孩記習慣偷膠，於是形成車尾有窿窿。後輪有一個小小的拉出設計，但係輻度少，更完全不能鎖定，結果形同虛設。Scourge有一枝炮仔，形狀似一隻蛋，變車形時說明書會教你將佢打開（變形），裝喺車尾上面。不過又係因為偷膠，會非常難睇。我建議一係唔裝（好似我咁），如果要裝，都唔駛打開，直接成舊裝上車會仲好睇。人形方面，手長腳長兼大胃腩，加上官圖又影得衰，嚇親好多人。但係我就好鍾意！首先電影版老變，除咗老柯、蜂蜂、斯韋柏少數角色之外，大多數都係怪怪雞雞。呢隻已經算玉樹臨風喇。再有心機擺下pose，佢真係可以好有型。深灰配色再加上火紅透明件。面相似關二哥、身形手腳似Getter 2，重點係後頸一把秀髮，直頭有殿堂級機械人「五星物語」嘅影子！我真係玩得幾開心。玩具嘛，開心就好。
本帖最後由 Garycharm 於 14-5-2023 03:48 AM 編輯
原來我留多咗位，咁就仔細講下呢隻：
Lego 10497銀河探險家號，是致敬1979年推出的lego 497，將經典舊作以新技術新規格翻新推出。而這舊lego 497，可是我人生第一套Lego！
先介紹一下舊lego 497。這套裝包括一大架銀河探險家號大飛機、小型探險車（能藏於大飛機裡）、通訊基地、兩塊大底板（分別是停機坪、星球表面）。當年盛惠二百多元，比很多大型超合金還要貴，是超級豪華的lego套裝！
2022年推出的 lego10497，卻很可惜地取消了通訊基地和底板，只有一架高規格的銀河探險家號和內藏的探險車，所以我也一度猶疑購買。結果當然還是買了。
新銀河探險家號大致保留了舊品的配色和外型，當然也保留到飛機尾部那經典的內藏探險車開合機關。供探險車出發用的斜台更用上新設計，只要你把斜台可伸縮的部份拉出，探險車就會自動出發，十分有型好玩。探險號也有幾個小機關，最實用的是飛機底部可伸縮的升降台，一拉出就可以用。機身細節方面，因為要滿足舊情懷，保留了大大塊黃色透明窗、機身編號、機頭的星球標緻（真係好有七十年代feel）；更因為用了整幅的藍色lego磚頭作機身，驟眼看會似很撲素簡陋。但只要再細心看，其實探險號營造了很多細節：灰色機翼、兩組推進器，根本係直接挪用了星球大戰的設計和組件，所以仍算豐富。
裝組方面。由於承托巨大機身，加上要收納伸縮升降架，本品基部採用了頗多lego technic式組件，比較濕碎麻煩。只要捱過這一關（即頭4包組件），趣味就漸漸出來了。去到後幾包組件，會越來越爽快過癮，欲罷不能。
人偶可能是最無趣的部份。本品有兩紅兩白四個太空人仔，及一個簡單的小機械人。太空人仔除了胸前那個懷舊標緻之外，全素色；不設轉換表情，也沒有替換頭髮。機械人仔也是取材自lego 在70年代另一套的太空套裝，感覺只係權當取消通信基地之後的替代品，聊勝於無而已。
順帶一提，本品的說明書製作不錯，有多頁介紹當年產品和新品的設計概念，值得收藏。
總結，本品絕對懷舊向。有情懷的會很難抗拒，但冇情懷的應該不會去考慮。畢竟，要玩Lego飛船的話，選擇多的是。無怪本品價錢一值跳樓……
本帖最後由 Garycharm 於 14-5-2023 04:02 AM 編輯
2022年最乞我憎係以下兩隻，兩隻都係合金魂！
超合金魂 GX-96 Getter Robot Go 差！
佢樣衰我就預咗，買佢都係想儲角色兼玩下變形。佢變形真係差-----唔順手、難變，變完仲要冇滿足感。最抵死係有幾個位仲好易爛添。我就玩斷咗某個紅色部件，所以我咁燥！
超合金魂 GX-102帝王SKL
呢幾年超合金魂不思進取就人所共知，但係一般都衰極有譜。例如D.C.系列，可以話冇驚喜，但係乾乾淨淨。GX-75帝王，只要泊埋千記帝王，立即存在感大跌，但係獨立睇都仲靚仔順眼。呢隻SKL就真係出事。 之前有師兄話胸前雙槍裝得唔夠緊，易甩，我個隻就算可接受（其實都都易碰甩），唔知係咪個別事件。
我想講問題首先係顏色，好地地搞到變灰藍色。係，動畫係有少少黑中偏藍，但係你件玩具搞唔到，你就直接用番黑色啦！依家一拎出嚟，搞到變壽屋模型咁！
第二係身型。動漫迷都明：每個機械人嘅插畫、動畫、設定稿都有少少唔同，唔同畫師會有唔同詮釋。SKL有時會偏壯有時偏瘦，你出玩具，就按能力（可行性）去搵一個啱嘅風格去做。依家？變咗一個操肌失敗嘅變態佬！件爛袍又係肉鬼酸，成個扁平爛龜殼咁，完全冇飄逸感。我都未講你上色完全冇誠意喇。大哥，你其實係咪想遷就個包裝盒，先至搞到變成咁？
換手型（拳頭）又係白痴，無端端加一個金色手鐲（好似之前隻帝王都係咁），難拆難裝，想換多幾次手形去影相，就要我做多幾重功夫。要解決其實好簡單，你老哥每隻手形都俾多粒手鐲、每個黐死佢，咪搞掂囉！我死唔信會增加好多成資本！！！我情願你扣番果舊石頭算鬼數！
把劍又係on 9，電鍍靚唔靚就見人見智，但係劍身果個大窿想點？依家你Bandai唔識出遮醜件咩？搞到我哋想影張相都左避右避。另外，把劍好鬼難插入手掌。依家一般呢種根棒狀手柄兵器，都設計為手柄可拆，方便塞入拳頭。呢隻SKL 大劍玩伸縮手柄，所以冇拆開機關，搞到好難塞入……我都算喇，你老哥我塞入之後，個手窿又過大，握唔實把劍，搞到擺pose把劍會自轉，我頂你個肺。
Bandai正hihi！
本帖最後由 Garycharm 於 13-5-2023 08:39 PM 編輯
一次過講完，舒服晒~~~~~~~~~~~{:8_630:}
稍後，我會出多一個告別post，到時見~~~
魔術師師兄唔洗戒玩具甘嚴重，用錢解決到既問題就唔係問題，依家好多玩具網站如日本amazon，amiami都可寄海外，所以唔洗戒，繼續買多d{:8_667:} 本帖最後由 nela 於 13-5-2023 09:53 PM 編輯
很久不見，原來已遠去現在地方大咗，penthouse/車房／地庫可以點display figure都得
好耐無用成10分鐘睇一個post⋯⋯感動
好多好野，合金我只有cctoys 真三一同VF-1J旣重甲
竟然一只HT都無
讓我七月時弄個半年總結湊下熱鬧先。 fallout8 發表於 13-5-2023 08:31 PM
魔術師師兄唔洗戒玩具甘嚴重，用錢解決到既問題就唔係問題，依家好多玩具網站如日本amazon，amiami都可寄海 ...
你有冇聽過一句說話：「留港做蟻民，移民變窮 L」？{:8_749:}