【佔領中環】尊子：唔行出嚟隨時渣都冇
【佔領中環】尊子：唔行出嚟隨時渣都冇以「漫畫刁民」身份參與「佔領中環」商討日的漫畫家尊子，在《香港家書》中談到普選問題時，反駁部份人認為「佔中」與自己無關的看法，強調目前離普選仍有一段距離，只是等待普選來臨不是辦法，一定要自己行出來，「否則隨時連渣都冇」。
尊子又以杯麵比喻「佔中」商討日成效，「好似一個杯麵，食一個冇事，但如果每晚臨瞓前食一個，保證你一年後要買過晒啲褲，細碼轉大碼，大碼轉加大碼……『佔中商討日』就係咁樣」。
尊子《香港家書》全文：
老豆：
早幾日阿仔問我：「阿爸，如果你參加佔中，可能會俾警察拉，但其他人卻話：『唓，關我咩事啫』，咁點算呀？」
條問題咁深，我點識答？
於是問番佢轉頭：「阿仔，如果另外一個小朋友嘅阿爸參加佔中，可能會比警察拉嗰噃，咁….你想我做支持佢嗰個？定係話『唓，關我咩事？』嗰個？ 」
喺幾個月前，我同一班朋友搞咗個「爭取普選」為主題嘅漫畫展覽，廿幾人，一半以上係新相識嘅後生仔女。我地叫自己「漫畫刁民」。展覽完咗，呢幾日同一班人，正籌備和平佔中運動嘅第二輪商討日。
「和平佔中」已經講咗半年有多。呢半年打開報紙雜誌，都有陣火藥味攻上來，好多殺氣騰騰的文章，狂鬧「佔中」，話佢邪惡，話佢亂港，話佢「暴民」，話佢害人害物，又話佔中一日，會令香港人每日損失十六億。嘩，十六億喎！每日喎！不如叫政府「執」咗天文台佢，等佢無得掛八號風球，無得宣佈打工仔唔駛返工，大家一年賺多幾百億，重可以拉開香港同上海嘅距離，唔使成日比上海威脅我地。
其實，我心諗，西環同特首府都唔知幾想你聽日就搞「佔中」，早搞早着。「萬人佔中，九點開始」。咇一聲，解放軍出動，未到下午十二點，就已經接晒人清晒場，下午一點，自由行同胞又可以繼續shopping買奶粉，祈福黨繼續搵食，恒指牛皮靠滾，乾手淨腳，地下連紙碎都冇一張。
可惜吖，可惜唔係咁。佢地佔中三子搞咗個死唔斷氣嘅商討日。
你有冇見過遊行示威，條遊行隊伍行成年半都未行完嘅呢？嗱，佔中商討日就係咁嘞。佰係佢地唔係用腳遊行，係用「咀（嘴）巴」遊行。如果「佔中日」係目的地，「商討日」就係由維園出發沿電車路去中環遮打花園嘅「遊行」。呢個「咀（嘴）巴」遊行，冇向警察申請「不反對通知書」，警察冇得用鐵馬封路，冇得出蠱惑「截人龍」，冇得出動胡椒噴霧……。有嘅，只係舉牌：「你地不可能和平，不可能不犯法。你地即將喺暴民，你地即將亂港……」
呢條「咀（嘴）巴遊行」隊伍，行咗半年，先至去到百德新街，SOGO都未到，中途重不斷有人插隊添，死未。
「咀（嘴）巴遊行」有冇效？好似冇，又好似有。就好似一個杯麵，食一個冇事，但如果每晚臨瞓前食一個，保證你一年後要買過晒啲褲，細碼轉大碼，大碼轉加大碼，加大碼轉被袋──腰圍大到買唔到褲，攞個被袋下面剪兩個窿當褲着。「佔中商討日」就係咁樣。
戴耀廷早幾日寫咗篇文，題目係香港人為民主付出太少。但係，參加佔中商討日嘅犧牲不可謂不大。商討，首先就係要出聲，一出聲，就失去咗做「沉默的大多數」資格，就冇咗一級教授替我地說話嘅福利。第二，一參加商討日就顯示咗自己嘅立場，第日返唔到大陸搵食。嘩，搵唔到食噃，即係要攞綜援住劏房噃！簡直係慘絕人寰啦。
老豆，我讀藝術嘅。有時喺度諗：點解香港冇艾未未嘅？有就好啦，佢咁想出鋒頭，我就匿埋喺屋企畫畫。維權呀，爭普選呀嗰D嘢，就由「香港艾未未」去搞，各盡所能吖嘛呢啲就叫做。點知我等呀等……等呀等，等極都冇嘅喂！唔對路喎，所以不如自己唔行出來，否則隨時連渣都冇，於是用咗部分上Facebook、Youtube嘅時間加入咗佔中商討日嘞。早幾日有記者招待會，報紙影埋相添，而家出街要戴墨鏡。
老豆，如果你尚在人間，明年你會唔會參加佔中？參加嘅話，跟住就有人話「唓，都唔關我事嘅」，咁你仲會唔會去？
阿仔上
2013年9月28日
（全文完）
http://hk.apple.nextmedia.com/realtime/news/20130928/51765964
頁:
[1]