你以為我哋好蝦？！！！個人【天元突破】玩具相集及劇.....

Garycharm

呢排 FB又好、ＴＤ又好，都俾隻天威掃場，
我呢Ｄ冇買ｏ既人只有乾瞪眼流口水。
惟有玩自己玩具。

我前排ｏ岩ｏ岩重溫【天元突破】，
就拎Ｄ天元出ｏ黎玩下．．．．冇開壇影相，下面都只係舊相ｏ黎。
當時我放幾隻天元ｏ係旁邊（我Ｄ天元山口竟然冇出油，謝天謝地！！！），一路睇一路扭，
玩得好開心。尤其隻膠殼螺巖（已丟盒，唔記得邊間廠），上面有隻西蒙仔，真係好有ｆｅｅｌ，
另外當然係大哥卡米拉果隻紅蓮，雖然只係山口，不過都好好玩。

隻極品Ｋｏｎｉｍａ　合金我唔敢扭，扭ＣＣＴｏｙｓ果隻，都唔錯。至少我知爛ｏ左唔會太心痛。
至於千值果隻，雖然人人讚，但係我個人口味，只覺一般．．．．．
已經放ｏ左。雖然有少少後悔，原因並係因為佢係好物，而係忽然覺得自己收藏少ｏ左一隻，所以可惜。

隻ＳＲ，因為有兩隻大合金，所以感覺一般。
如果你問我點解唔扭ＳＲ而扭ＣＣＴｏｙｓ，
我會答你因為我覺得ＳＲ感覺仲易爛過隻大牛龜．．．．我已經玩爛過幾隻ＳＲ，經驗之談。

數【天元玩具】，應該係山口式出得最多。我自己有幾隻仲未影相，有緣份再ｐｏｓｔ。
另外，好想要當年壽屋果幾隻顏面，錯過了，ｓｏ　ｓａｄ～～

玩具講住咁多，講下卡通，以下係我ｏ係其他地方寫ｏ既觀後感，大家無聊就睇下啦：

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿



天元突破 ----- 推薦俾香港人

姜濤勇奪叱咜最受歡迎男歌手呀！！！

老實講，莫講話佢D歌，我真係連佢個名都未聽過。我由後生果陣都冇乜聽流行曲，最後叫做識唱佢幾句歌詞既歌手已經係黎明，流行曲我真係唔識。既然我自己唔識又唔關心，就唔會亂講嘢。不過講動漫我就可以好多o野講，例如大家熱烈爭拗的【鬼滅之刃】，我就睇到趣味盎然。

我今日都講一套我自己最鍾意既卡通【天元突破】-------依家Viu TV 有得睇。

故事講述：唔知咩時代，所有人類都要o係地底生活，地球上就有無數人類居住o既洞穴。每個洞穴都算係一條村，由村長管理。每個村長都教大家安於現狀安於天命安居樂業，你勤力做o野放工就有豬扒食。不過有個年輕人叫卡米拉，佢以前聽爸爸講過，洞穴的泥土之上，有廣闊大地，有天空星晨，係男人真正嘅舞台，叫卡米拉一定要離開洞穴。

以上係第一集故事內容，也是整套27集卡通的架構、主題。於是，就由地底打到地面、由地面打上月球、然後由月球打…………總之人類要自由、要有理想，就算遇到乜嘢阻礙、恐嚇、枷鎖都要一一衝破。你突破一關之後，後面就係一幅更大高牆，高牆後面又有另一幅高牆。好喇，你乜嘢都打破喇，人類就開始建立自己高牆，然後……

27集卡通，大致可分為四部份。為免破壞大家驚喜，我就不仔細介紹。不過可以講下一D感受。

通常動漫迷都會最推崇第8集，也即第一部與第二部的關鍵轉接位。我當年第一次睇，也會比較鍾意第一、二部。不過現在重看，對第三、第四部的感覺會較深。

話說「人類的敵人」一直懼怕人類的生命力，於是要千方百計去壓制，更用非常卑鄙的手段要人類「絕對絕望」。當人類絕望，就會失去生命力（劇中叫螺旋力），到時，機械人郁唔到、戰艦行唔到，可以任人宰割……

成套卡通節奏好快，又不斷有新嘢比你睇。角色鮮明，你肯定好快會鍾意其中某D人物，然後情緒跟著佢走，當劇情忽然轉向，面面都係絕路，你會不知所措。當你投入故事，真係會不禁問自己是否仍然可以堅持------當然，這是一齣少年向的熱血卡通，我地就安心等睇主角如何重新振奮全人類奮起反抗，駕駛機械人紅蓮之眼天元突破！！！！！

這套卡通也有他的缺點。首先我好鬼憎果條叫妮亞既女，又煩又悶；已經遲出場，都可以一路煩到結局。雖然結局令我好滿意，但係都好憎佢。

打鬥場面方面，熱血是夠了，不過唔夠細膩。尤其比較同期的動畫如【叛逆的魯魯修】、【機動戰士00】，天元的戰鬥就相當粗枝大葉-------這當然有關超級系和真實系卡通（一種動畫機器人的分類方式）之別，我覺得更似係去到製作後期已經缺乏預算，於是最後幾集都好似香港漫畫咁，每頁都「畫大格D」、慳功夫D。所幸因為故事方向選對了，觀眾已經情緒主導、恰恰切合到那種粗粗的風格。

我唔會話【天元突破】一定好過【鬼滅之刃】，
不過我敢講你鍾意【鬼滅之刃】，應該都會鍾意【天元突破】。
睇電視之麻，why not both？

尤其呢個時勢，香港喜歡動漫的朋友，未睇一定要睇，睇過都不妨重溫。









  



  









  

Dancougaproto

我就對呢套動畫冇愛，當年見到覺得紅蓮裸眼比例有啲怪，原作中最正反而係超銀河紅蓮裸眼。
Ccs版真係好鬼型:$可能係史上外型最好的紅蓮裸眼

Vince

話時話，近年真係冇乜「超級」系既機械人動畫。{:1_229:}

nela

睇完你個post ....今晚睇....

之前無睇過,但都識 Yoko ....:love:

toysraven

見到天元點都要入來支持下師兄{:1_377:}

你好

可惜師兄無入半眼果隻。

但都支持，好帖。

loikaleong

做得最好我揀千值練隻天元，雖然全膠 但外型和可動一流，買鐵就CcS, 但可動一般。