Toysdaily 玩具日報

 找回密碼
 註冊
查看: 12002|回復: 25

[其他] Hot Toys 老 細 : 我 專 發 死 人 財 !!

[複製鏈接]
發表於 18-2-2010 04:15:33 | 顯示全部樓層 |閱讀模式
本帖最後由 Gretzky99 於 18-2-2010 08:09 AM 編輯

新正頭,大吉利是,今期要說一個發死人財的故事。
土炮玩具生產商陳浩斌,一直靠推出電影角色的 action figure謀生,因造型生動神似,大受玩家歡迎,造就他揚威海外。
惟諷刺的是,他最賣得的產品,全是一班逝世巨星,更坦言在世的人
相當「難搞」。憑着這批「死人公仔」,其公司去年賺逾千萬元。


《阿凡達》票房爆晒燈,令原來不睇好的陳浩斌亦要低頭,為對方推出 figure。




荷里活 3D猛片《阿凡達》上映至今,全球票房達二十億美元,成為史上最賣座電影。戲中潘朵拉土著的造型更成潮流,不少網民將自己的照片,修改成戲中人物造型放上 facebook,甚至有粉絲在討論區發起請願,要求盡快推出 action figure。
但花了數十萬元買下《阿凡達》生產權的 Hot Toys,其老闆陳浩斌卻大歎慢板,至今仍未肯完工,更對該戲造型嗤之而鼻,「角色成條藍色蜥蜴咁,都唔知有乜咁巴閉。」
原來他在電影還未上映前,已看過部分片段,認為該戲的角色不適合推出 action figure,本想打消合作念頭,惟導演占士金馬倫卻透過電影公司找他,希望 Hot Toys生產《阿凡達》的公仔。「隻嘢嘅比例咁古怪,當時我心諗死硬!不過我見對方盛意拳拳,咪口頭答應先。」直到該戲在全球颳起巨浪,他才肯付錢正式買下肖像權,施施然着手設計,預計四月才正式發售,「我始終唔睇好《阿凡達》嘅 figure賣得囉。」


死人最賣得

夠膽柴大導演台,全因近年他敲中多套電影賺大錢,自覺眼光獨到。例如去年替《蝙蝠俠:黑夜之神》推出模型,便因飾演小丑的演員 Heath Ledger突然在家中暴斃,造就其 figure銷量直線上升,更遠超同期推出的蝙蝠俠,「套戲未响香港上映,我已拎咗版權,原本打算用蝙蝠俠做主打,但 Heath Ledger突然過身,就肯定小丑一定賣得。」他隨即日以繼夜趕製小丑公仔,一推出便斷市,要多番再版加推,最後該 figure在全球賣出近一百萬隻,至今在網上的二手價,亦炒貴近三倍。(Bullshit!  從來沒有發生過!!):72:
狠賺一筆之餘,想不到亦為他贏了無數掌聲,這隻小丑 figure因面部造型細緻,去年為他揮低 Mattel、孩之寶等大企業,獲海外知名玩具網站 http://www.Figures.com選為「最佳玩具」,隨後更橫掃整個玩具界獎項,令他正式在海外響朵。
熟客 Iceman亦不諱言, Heath Ledger過身,令這隻 figure更具紀念價值,他更額外多買一盒來收藏,「我本身係《蝙蝠俠》 fans,未睇套戲已經想買 figure收藏,但 Heath Ledger過身,小丑紀念價值仲大啦。」



因 Heath Ledger過身,令小丑 figure在全球大賣,更一度供不應求。
圖中這款第二版 figure幾乎絕跡市面,二手價更曾炒至三千多元。





熟客 Iceman大讚 Hot Toys的 figure造型細緻,連面部皺紋和瞳孔都纖毫畢現,故此每月都乖乖花上數千元幫襯。






黃家駒是本港樂壇的「不死傳說」,每逢對方死忌等特別日子,都會引起話題,帶挈他長做長有。




其實肯花逾千多元買 action figure的玩家,多屬「七十後」的男性,他們抱着粉絲心態,追捧與自己一起成長的天王巨星。陳浩斌笑言這些過氣明星的版權費不高,但一登天國,便升價十倍,去年流行天王米高積遜病逝,他馬上趕製新一批 MJ figure,便大受歡迎,在全球各地賣出過萬隻。「我○七年曾推出過一款 MJ figure,但當時只賣得幾百隻,所以一直唔敢再搞。但佢過咗身就唔同晒,我食住個勢推出一套全新款式,立即俾人掃晒,連帶以前滯銷的舊款 MJ figure也好賣得。」他更笑說食過翻尋味,已加碼十倍與擁有 MJ肖像權的公司續約至 2012年,本月底再推出新一款 figure賺多筆。
陳浩斌坦言這類「逝世」明星的玩具,其實長做長有,故此每逢重要日子,例如巨星的五周年或十周年死忌,便會趁機推出新貨。他更另闢戰線,專門大搞「死人模型」,現在持有占士甸及馬龍白蘭度等多個過世巨星的版權。
○八年中,他趁樂隊 Beyond領袖黃家駒逝世十五周年,花了十萬元向黃家強買下其兄長的版權,推出三款家駒生前不同時期演唱會的造型 figure,結果大受 Beyond粉絲歡迎。故此他不時留意哪個去世明星有錢途,親自向有關人等傾談版權。


活人多麻煩

雖然靠賣死人公仔賺錢,但他亦愛找「活生生」的 figure迷明星宣傳,去年他就以「 fans價」請來周柏豪替產品宣傳。




陳浩斌指「死人」版權在行內競爭相當激烈,李小龍的肖像權便被本港另一玩具品牌雄霸多年,他想染指亦不得要領。至於繼李小龍之後,憑武打揚威海外的成龍,亦有行家買了版權,對方原定想趁機大搞之際,卻因成龍去年一句「中國人要管」,令生產計劃立即叫停。此事更成為行內笑柄,陳浩斌笑說:「在世嘅人,都唔知幾時會出現負面新聞。」
他更打趣指,不少荷里活巨星如湯告魯斯及畢彼特更是「生人勿近」,他曾想替《 Mission Impossible》中的湯告魯斯推出模型,電影公司雖已答應,惟最終卻被「靚佬湯」拒絕,「除咗湯告魯斯外,畢彼特都好怕被人搞佢個樣,以為我哋呢班模型佬,一定會整醜佢哋。」



高風險生意放大圖片

為求與別不同,其公司生產的 figure,全由人手雕刻面部。


除了版權難斟,投資風險也不輕,因為版權費動輒十萬至百萬元,製作過程亦相當麻煩,他指坊間的生產商,普遍以機器倒模大量生產,只會在推出限量版時才以人手上色;但他為求逼真神似,規定每件 figure的頭面,全由人手雕刻和上色,其餘部分才代工生產。
由於要自負盈虧,故此他愛押注科幻巨著和有優異往績的導演合作,不過也曾老貓燒鬚,為 Frank Miller執導的《幽靈奇俠》推出的 figure,選擇在電影上映時同步發售,結果該戲票房仆直,連帶 figure也嚴重滯銷,埋單損手數百萬元。「本來諗住佢套《 Sin City》咁收得,呢次實冇死啦,點知變晒蟹貨。」
經此教訓,他每次揀片都非常小心,遇上沒把握的電影,寧願歎慢板等上映後有了口碑,才敢買下版權,然後等待該戲推出 DVD時才同步推出,「雖然明知係執二攤,但點都好過急住去送死。」
雖然分分鐘慘蝕,但回報亦非常豐厚,按照他每款 figure平均在全球賣出數千隻計算,由於售價偏貴,故利錢不俗,去年賺逾千萬元。「我每次都覺得好似豪賭,用幾百萬元搏幾千萬元。」
窮小子變百萬富翁放大圖片

家中雖坐擁過百萬元影音組合,但他甚少煲碟,「都係重睇《星球大戰》系列。」


現時他出入揸名車,○八年更以六百多萬元,買下將軍澳整幢村屋與父母同住,他還將家中一角改建成室內影院,整套音響價值過百萬元。今日看似富貴,他慨嘆有苦自己知,在公屋長大的他,曾在電影公司及電視台工作,月入僅萬多元,後來問家人借了十多萬元開玩具店,為了慳錢,親身到內地玩具廠入貨,久而久之與行內人混熟。
當時孩之寶為抗衡 Mattel的 Barbie娃娃,針對男玩家推出電影《 G.I. Joe》的美軍造型 figure,令電影發燒友趨之若鶩。身為玩家的陳浩斌眼見這類 figure大有可為,便生產一些《 G.I. Joe》的配件測試市場,想不到食正熱潮,讓他賺了第一桶金;其後他便以香港警隊造型,推出多款自創 figure,惹來不少本地傳媒報導。
接着他更勇於擴展,在美國找中介人幫忙洽談版權生產公仔,○七年還在日本成立分公司,取得《生化危機》及《蘋果核戰記》等漫畫及電玩角色的版權。他直言漫畫角色和過了身的人始終最易搞,「好多明星都好注意自己嘅肖像權,好似加多條皺紋,都會被當事人投訴,都係卡通人物好,塊面夠晒光滑。」
陳浩斌檔案放大圖片

從小已迷戀玩具的他,經常被家人責罵玩物喪志;想不到長大後,卻靠玩具賺大錢。


37歲︰已婚育有一子
95年︰專業設計學院室內設計畢業
95年︰在 UFO電影公司做電影資料搜集員
96年︰轉職 TVB當編劇
97年︰在銅鑼灣開設 Toys Hunter地鋪
98年︰生產自家品牌 Hot Toys
04年︰取得電影《異獸戰》造型版權
07年︰成立 Hot Toys Japan進軍日本市場
09年︰取得電影《阿凡達》造型版權

發表於 18-2-2010 07:52:17 | 顯示全部樓層
...好好的報導:73:
發表於 18-2-2010 08:05:58 | 顯示全部樓層
不知所謂,乜野人寫架
眼紅HOTTOYS成功既失敗者作架?
佢幾錯都只係小錯,搵錢,冇傷害人,做乜要咁樣作故事寫人.
 樓主| 發表於 18-2-2010 08:12:23 | 顯示全部樓層
不知所謂,乜野人寫架
眼紅HOTTOYS成功既失敗者作架?
佢幾錯都只係小錯,搵錢,冇傷害人,做乜要咁樣作故事寫 ...
K66 發表於 18-2-2010 08:05 AM


記者的實際意思是:

死人 figure 最賣得
發表於 18-2-2010 08:18:28 | 顯示全部樓層
本帖最後由 K66 於 18-2-2010 08:26 AM 編輯

垃圾壹周刊,作料作到...

故此他不時留意哪個去世明星有錢途,親自向有關人等傾談版權。

呢句野算乜意思...

100萬隻小丑...一隻賺100蚊都執1億,邊有可能
稅局實搵佢傾計啦

仲有,A片、B片、C片都係同一家公司,邊有可能一套賣得唔好,就開話D公仔變蟹貨
呢D說話點可能講出街,想以後冇版權傾?
個記者咁大擔作到咁大,一定有錄音,你真係信叫佢唔好寫就一定唔寫?佢地專寫呢D細位!

我真係覺得,今次烤活大X鑊過IRON-MAN爆版+BATMAN油版加埋X一千倍
唉,做乜要做全香港最黑暗雜誌既訪問,係咪真係Shot左...
快D去睇下自己係咪犯太歲,今年點解鑊鑊新鮮……
 樓主| 發表於 18-2-2010 08:31:39 | 顯示全部樓層
垃圾壹周刊,作料作到...

故此他不時留意哪個去世明星有錢途,親自向有關人等傾談版權。
呢句野算乜意 ...
K66 發表於 18-2-2010 08:18 AM



鬼 佬 唔 識 睇 中 文.....:34:
發表於 18-2-2010 08:39:23 | 顯示全部樓層
o的雜誌不嬲都係咁~!
我舊老細都俾壹同蘋果訪問過!
出到o黎都不知加左幾多野!!
 樓主| 發表於 18-2-2010 08:42:33 | 顯示全部樓層
垃圾壹周刊,作料作到...

故此他不時留意哪個去世明星有錢途,親自向有關人等傾談版權。
呢句野算乜意 ...
K66 發表於 18-2-2010 08:18 AM


睇壹周刊, 素來要自己判斷:


故此他不時留意哪個去世明星有錢途 - 作o野

親自向(去世明星)有關人等傾談版權 - 事實
發表於 18-2-2010 10:28:49 | 顯示全部樓層
記者的實際意思是:

死人 figure 最賣得
Gretzky99 發表於 18-2-2010 08:12 AM


但個標題係 " Hot Toys 老 細 : 我 專 發 死 人 財 !!" :38::42:
發表於 18-2-2010 10:29:06 | 顯示全部樓層
Already seen this article/review from that B.S magazine yesterday.:53:

Anyhow, Howard do succeeded making HT brand as No. 1 among 12" figure industry. That is a fact.IMO
發表於 18-2-2010 10:33:03 | 顯示全部樓層
回復 1# Gretzky99


    暗串eb.....
發表於 18-2-2010 10:47:42 | 顯示全部樓層
依d野睇了米算 lor !!!唔洗噤緊張!!! 米當娛樂新聞睇 lor !!!:34:
發表於 18-2-2010 13:47:35 | 顯示全部樓層
一個願比 一個願捱啦~~~~~~~~~~~~~~
發表於 18-2-2010 13:54:20 | 顯示全部樓層
依d野睇了米算 lor !!!唔洗噤緊張!!! 米當娛樂新聞睇 lor !!!
locat 發表於 18-2-2010 10:47

如果同樣內容講eb同m記你又會唔會咁講架!??
發表於 18-2-2010 14:02:48 | 顯示全部樓層
不招人妒是庸才,又一次証明ht真係好野!!!:71:
您需要登錄後才可以回帖 登錄 | 註冊

本版積分規則

Archiver|手機版|Toysdaily 玩具日報

GMT+8, 28-11-2021 04:27 AM , Processed in 0.151828 second(s), 20 queries .

Powered by Discuz! X3.4

Copyright © 2001-2021, Tencent Cloud.

快速回復 返回頂部 返回列表