|
|
|
(麻帆良市時報記者キズナアイ報導)
はい、ども! キズナアイです~♥
年資較深嘅巴士迷朋友,
對被稱為 "倫敦寶" 嘅倫敦 DMS 巴士應該唔會陌生啦,
而呢款巴士亦曾經喺香港呢片彈丸之地留下足跡。
倫敦運輸局 London Transport 喺 1969 - 1976 年間,
向英國 Daimler 車廠 (後來被 Leyland 收購) 購買合共 2646 架
Daimler Fleetline (DMS) 雙層巴士, 成為全球最大嘅 Daimler Fleetline 買家,
原意係替代當時服務已久嘅 AEC Regent (RT)、AEC Regal (RF)
同 Routemaster (RM) 巴士, 同引入一人控制運作模式,
初時 London Transport 對呢批新巴士抱有好高嘅期望,
甚至為佢地冠以 "Londoner" 嘅稱號, 希望得到有如當年 AEC Routemaster 嘅效果。
但係喺服役期問, 佢地喺倫敦嘅行車同運作表現,
都令倫敦市民、司機以至 London Transport 感到強差人意,
London Transport 保守嘅車輛維修制度, 更令呢批巴士唔適合 LT 嘅日常車務運作,
迫使 London Transport 喺 1978 年宣佈將呢批平均服役只有僅僅八年嘅 DMS 巴士提早退役,
並且流入二手市場放售, 香港作為海外使用 Daimler Fleetline 巴士嘅地方之一,
亦成為呢批倫敦棄將嘅落腳地, 香港嘅幾家巴士公司,
各自引入唔同數量嘅倫敦 DMS 巴士, 總數合共達 370 部之多,
其中中巴喺 1980 - 1984 年間, 分批引入合共 208 架倫敦二手 DMS 巴士,
成為全港引入 DMS 最多嘅巴士公司。呢批巴士被編為 XF1-206
(叧外兩架中嘅其中一架喺卸下葵涌貨櫃碼頭時發生嚴重意外, 整個車身幾乎盡毀,
後來比城巴購入作為零件車之用, 另一架被中巴作為訓練巴士並且號為 T19)。
中巴喺 1988 年為排喺呢批巴士隊末嘅 "倫敦寶" 巴士 -- XF206 進行改裝,
將座位改為高背座椅, 並且鬆上中巴豪華巴士色彩,
重配編號為 FC1 (Fleetline Coach 之意),
作為行走當時 260 同 262 豪華巴士線嘅 MCW Metrobus 巴士 (MC) 嘅後備用車。
雖然係豪華巴士線嘅後備車, 但係佢平常卻會喺其他普通路線出現,
特別係當時 11 或者 11A 線嘅常用車, 甚至作為 "打仗車",
支援過海隧道路線。當中巴喺 1991 年引入配有空調設備嘅 Dennis Dart 單層巴士,
並且將 260 同 262 全線空調化後, 呢架 FC1 更顯得英雄無用武之地,
一直喺其他路線行走直至 1996 年初退役。
今日, 麻帆良市隆重歡迎中巴 Daimler Fleetline DMS "倫敦寶" 巴士 FC1 登場!!
FC1 呢架中巴豪華版 "倫敦寶", 對市長 Super Bus 嚟講可以話非常特別,
佢話佢中學果陣某朝搭九巴 12A 返學, 過左煤氣鼓之後見到隔離有架中巴經過,
佢同中巴嘅 XF 完全一樣, 但係就上左中巴 MCW Metrobus 豪華巴士 MC 嘅車身色,
喺電光火石之際, 留意到佢嘅車隊編號, 咦? 係 FC1?
初時 Super Bus 唔知呢架豪華色車身嘅中巴 "倫敦寶" 到底有乜來頭,
到後來先至知道呢架車隊編號 FC1 嘅物體, 其實就係中巴倫敦寶車隊中排隊末嘅 XF206,
只係後來改裝, 全車廂座位改為高背座位 "升格" 為豪華巴士,
因而成為車隊中獨一無二嘅豪華版 "倫敦寶" -- FC1 啦,
但係作為當時中巴嘅豪華巴士, 佢地多數都不設企位,
中巴派呢啲豪華巴士喺繁忙時間過海 "打仗",
雖然某程度上算係為乘客提供 "增值" 服務,
但係遇到企位乘客, 唔通要偷雞比佢地企?
同埋作為一架豪華巴士, 呢架 FC1 卻比人有魚目混珠之嫌,
雖然車廂配有高背座椅, 但係同配有全氣墊懸掛系統嘅 Metrobus MC 相比,
呢架 FC1 沿用標準 Fleetline DMS 使用嘅葉片彈簧,
行車時嘅乘坐感覺有幾舒適, 相信大家都心中有數啦,
無論如何, 呢架 FC1 喺中巴嘅出現, 算係為中巴倫敦寶巴士車隊加左少少點綴,
亦為呢架不一樣嘅中巴倫敦寶巴士帶來一個不一樣嘅故事,
今日呢架 FC1, 正好將佢喺中巴服役嘅模樣重現大家眼前!
隆重歡迎! 中巴 Daimler Fleetline DMS "倫敦寶" 巴士 FC1, 見參!!
證書編號 0334, 限量推出 550 架
正式落地!! キズナアイ首次同新車來個合照~ ♥
留意前門嘅後半部被中巴用金屬片封住,
只保留前半部比乘客上車, 但係被封住嘅位置依然保留原來嘅上車梯級,
部份中巴倫敦寶巴士亦使用呢個改裝模式,
但係就算係普通版倫敦寶巴士, 該處亦不設任何座位甚至企位
當 MC 遇上 FC
雖然大家都係豪華巴士, 但係到底邊架會坐得舒適啲,
相信坐過嘅人都應該心中有數
中巴的倫敦寶
中巴的豪華色巴士
Thanks for reading~ |
|
發表於 11-11-2018 17:05:49