HONG KONG NOW

冬暖夏涼小恐龍

HONG KONG NOW

【白影：小白白嘅自白】

開始淡出 Xanga 亦都係因為兒子開始長大，唔想再花太多時間在網上，而且我當時都覺得，我已到咗一個即使佢上到中學，都有足夠嘅中化水平去幫佢。嗰時仲多咗個女，所以我無想過會再出嚟寫野。而且問心，比我寫嘢好嘅大把，但前年嘅反國教，已令我差點想投稿，不過當年阿女剛出世，真係無時間。當年上街反國教，一手推住架BB車，一手拖住亞仔，結果上埋生果報，仲要上咗幾次，有次仲要係家訪，半集動新聞嘅專訪，結果同我老母吵大鑊，所以而家先開分身。之後，反國教取得所謂嘅階段性勝利，大家和平散水，但我嗰時總係覺得唔應該係咁，結果國教借屍還魂，遍地開花，令我深深感無奈同氣憤。但除咗咁，我乜都做唔到，只好自己不斷留意兒子嘅課本及問佢有無喺學校唱國歌，學國旗，老師有無教佢講「我係中國人」。

到咗舊年電視發牌，我完全對政府失望。基本上我已無乜睇電視，即使港視開台，我都應該唔會有時間去睇，但唔知點解，我團火返哂嚟，可能係因為迫人太甚吧。於是晚晚收工去撐，放棄每晚嘅親子時間，基本上，我係一收工就返屋企嘅住家男人。結果去去下，仲識咗十子，做埋義工，而且寫咗幾篇有關件事嘅文，當時其實我係投去主場嘅，但無人理我，連回個 Email 話收到都無，最後多得容總收留我，連續好幾篇都收。就係咁樣就開始咗投稿嘅生涯。寫咗兩個月，其實都唔係單純地寫時事嘢，總之見到有咩想寫就寫。