小妹與好友的友誼出問題...希望各位大大開解下我..

Lady

:56:
我真係好唔開心...冇地方發洩...所以只好係度講...
可能係好多字...但係希望有人睇完可以安慰下我..
或者如果覺得件事係我唔啱..可以講下d忠言我聽等我知可以點做..

我有三個好朋友中學一齊讀左7年書
佢地係好鐘意買衫褲鞋襪化妝品首飾護膚品既女性
我係一個熱血...好鐘意玩具...好鐘意打機...唔鐘意化妝..唔鐘意買衫褲鞋襪....較怪胎既女性
7年黎一齊生活一齊捱過會考高考...非常要好既朋友
而家因為大家有唔同人生方向..唔再一齊生活..呢幾年見少左好多..但仍係好朋友

係以前開始，除左返學見到面..課餘我地本來就好少一齊行街
因為一行街佢地就要買女人野..我又唔多識欣賞佢地所喜歡既款式
通常出親街就係佢地買衫..我企係門口等.....
我有試過去同佢地一齊入間鋪頭睇衫..佢地都會問我對佢地睇中既衫有咩意見
但係我問心..佢地覺得靚果d多數都係花呢花碌....我真係覺得好肉酸...
不過最緊要佢地鐘意..所以我都答話"人人喜好唔同最緊要你鐘意就得啦"
有時真係唔多d明女人點諗..睇中一件衫要問曬全部人好唔好睇...
但係人地答話好睇..佢可能最後唔買...話唔好睇..結果答句都唔係丫咁就走左去俾錢......咁做乜要問意見???
有時明明自己想買..思考左30分鐘..決定買定唔買好...每睇中一樣野都思考30分鐘..
行一間20尺衫鋪要行一個鐘....結果一樣野都冇買...........
所以我通常都唔塞住人地鋪頭做生意走出門口等....

每一次約食飯也好睇戲唱k乜都好..之前或之後都係要睇女人野
每次都係咁..我都照陪佢地去..我當係朋友見下面..做d乜野其實都唔太大所謂
有一次我約左其中一個朋友食飯...我問"不如咁丫今次食完飯陪我睇玩具一次咁多丫"
"好呀"她答
飯後..朋友說:"丫我想買bra不如你同我睇一睇我再陪你睇玩具丫"
睇完bar"丫我想睇咩咩化妝品呀，睇完再陪你睇完具丫"
睇完唔知咩化妝品"不如我地去邊度邊度睇衫丫"(已經冇再提一陣陪我睇完具)
...我已經心灰冇話可說...跟住佢就話約左男朋友要走啦所以bye bye

所以其實我多多少少都怕左佢地..唔太想同佢地出街..
因為一來大家興趣完全相反..二來永遠只有我就佢地佢地唔會就我體諒我...仲有其他大大細細原因...
以前就話一齊返學成日見....唔一齊去玩去街都冇問題...而家就一年見得一兩次咁啦
呢幾日個朋友約我(就係先前話陪我睇玩具果個，我知佢近排想買比堅尼....)
琴日佢約食飯我推佢一次..多少就係因為怕左佢..........
今日佢msn搵我話"聽日本來約左人俾人放飛機呀..."
語氣似暗示想我陪佢，而且多少令我覺得搵我sip時間..因為之前幾次都俾人甩底就打黎搵我
我就話我逢星期日都約左屋企人所以唔得閒(我講事實)
佢即刻話 "我又唔係約你  你駛唔駛咁快報定案，討厭" 就冇再同我講野
然後再係msn個名度打"好不喜歡不用心聆聽的朋友"
明顯係話我啦我真係好唔開心同有興..我平時係推得佢多..但係多多少少係佢令我唔鐘意陪佢行街..
加上我真係約左屋企人唔係呃佢....咩叫報定案呀..你係我老細我同你請假所以要報定案呀?
呢句說話真係有d過份囉..仲要係msn個名度加句咁既野...好似廣播俾全世界知咁..
我只係講定你知我聽日唔得閒姐...你有第二d野講咪講囉..又唔係唔聽你講...
我真係有衝動想話返佢..但係佢早排同男朋友分身..我唔忍心做到好似連朋友都同佢嘈交..

佢其實係個好友善既人同埋好好既朋友..以前 a level一齊溫書互相鼓勵...
早排佢同男朋友分手..我唔係好識講野..都有努力去開解佢...真心咁關心佢...
而家因為興趣不合所以做唔到朋友? 做朋友唔係做情人...應該唔駛志趣相投架? 點解關係會變到咁...
冇左呢個朋友的話我一定會好傷心...但係呢件事我明明冇錯我冇理由要道歉架....我應該點做...

如果咁長編大論都有人睇曬......好多謝你.....至少有人聽我訴苦............

[ 本帖最後由 Lady 於 17-8-2008 02:45 AM 編輯 ]

原罪

相處時間長，同佢係咪你好朋友其實唔可以計。
我反而睇可唔可以共富貴同共患難。
同第三類…酒肉朋友。

第三類唔講，唔太交心，純一齊玩用…

共得患難既我會當朋友:$
但共得患難唔代表可以共富貴，當朋友富貴左，或小弟富貴左仲相唔相處度呢？
現實係有時真係相處唔到…有為大家朋友圈同認識既人唔同左…代人處事都唔同左…
當發生呢d事會好無奈…因為大家都有心做朋友…不過慢慢唔夾…:oh:

最正既係共到患難兼共到富貴。你就係你，佢就係佢，環境點變大家都咁樣相處，其他野都唔計較。呢d係朋友中既極品，可以對一世:handshake:

唔針對樓主的事分析，因為好多細節我唔會知…
但一個人值唔值你當佢朋友，睇你點定義咩係朋友啦。你要交心的還是要人陪…

Tachikoma

好明白你既感受　小弟以前都有由小學開始的好朋友　曾經還想過要否發展更深的關係　但最後都因不同信仰及其他一些事無再連系　真的覺得可惜及難過　但後來明白到人生不同LEVEL會有不同須要　亦會交到不同朋友　就讓過去的過去吧　希望LADY你可以快D開心番LA　未來你可能會交到更知心的朋友呢:77:

清仔~.~

中學後出來都現在一個同性朋友都沒有:79:

不過我知道只是有講有笑　不能稱上真正的朋友

IchigoKurosaki

我最近都有差不多的經力。。。最後自開始明白做朋友不一定是相雙方遷就的， 不一定是戶相關懷的。不過，若是太過單方面，那個附出得太多的會好辛苦，最終都可能沒朋友做。

這個世界你越遷就人，那個人就越會 take advantage of you。即使是好友，你不一定要無要求地陪他們看化妝品�衫。又可能你太過無所為，人地一樣會take advantage of you。

我覺得你今次冇做錯，你又不雖要唔開心。若對方都視你為好友佢一定會找你。當今次比佢反醒下有好，比你自己休適下又好。。。我個人覺得你自己都要諗下你自己的要求! 不要甚麼都無所謂。這樣做朋友才有meaning＆你的朋友才會專重你的意見�立場。有個朋友同我講過，每個人的朋友都只是人生的過客。無論能夠做到多久都是緣份，其他東東都無雖要太過強求，順其自然自己會舒服d吧！因為，人始終會變的。

Lady

...次次都係佢...令我經常都諗起eason果首講朋友果首歌..d歌詞中到應...
我自己朋友唔多..真心既朋友就真係得兩三個...
我曾經覺得佢係其中一個....一位共過患難既朋友
但係完全經唔起時間考驗..唔知到底係我變左定佢變左.....
連最好既朋友都要話我討厭話我唔用心聆聽
我都唔知嬲定係唔開心好......
:unhappy:

炎龍騎士

出泥做野
我而家淨係信我女朋友...

大姐姐

妳的朋友好有問題, 行為好像小朋友,以自我為中心,覺得她是很重要的。    其實佢地喜歡買乜買物的時候,應該搵男朋友陪, 一個女孩的裝扮主要是給男性看的。

朋友失去了, 可以找過, 家人就不能, 當然是陪家人重要。

「人會變,月會圓」, 只是變好定變壞, 與其沒有甚麼共同嗜好或話題, 應該減少見面,間中電話聯絡便算,以免浪費時間,令自己不開心。

黑

對朋友平常心,唔好太執著友誼呢兩個字,咁...個人就會舒服d

玩具

有時真係唔多d明女人點諗..睇中一件衫要問曬全部人好唔好睇...
skip

喂 ! 你都好似係女人來嘎 wo~
你唔明白我唔會明白...
:DD

可能男人同女人對於朋友呢一樣野睇法唔同...
我睇晒全文 , 講真我睇唔出有 d 咩問題出現左...
會唔會係你諗多左...

既然你一向都肯陪下佢行街睇女人野 , 咪繼續陪囉...
我唔知係唔係天下女人都係咁啦 ,
但我諗 , 你始終都係一個女人仔 , 總唔會話對女人野 100% 無興趣吧 ?
例如話去睇 " 爸爸 "... 你唔會話覺得悶吧 ? 除非你唔使用 ge je...
女人睇女人野 , 睇睇下 , 試試下自然會有 d 好感...

其實佢地同過你去睇玩具睇一次咁多未 ?
我諗佢地唔會連一次都唔肯去睇吧...
好啦... 唔理啦... 佢地唔肯去睇 , 咪唔一齊去睇囉 !
其實唔使咁擺o係心上面... 唔使咁在意 " 我陪左你你唔陪我你好衰呀 "...
自己心態上調整下囉...
朋友呢家野唔係講 " 你陪我一次 , 我又要陪你一次 " 計得咁清楚 ge !

msn 一事都係脾氣唔好先咁樣 je...
其實 , 佢肯搵你 sip 佢時間... 你應該開心啦 !
聽上去 sip 時間呢個 term 好似好差咁...
但你諗真 d , 佢肯搵得你...
je 係起碼佢同你一齊唔反感 , 甚至覺得同你一齊行街開心 ,
先搵你 sip 時間啦 ! 我覺得其實係一個正面 ge 信息...
唔通搵一個見佢前面憎佢後面 ge 人 sip 時間咩 !

樓上 d 回應... 其實我唔係好同意囉... 甚至覺得好似想離間你地咁...
我o係度諗樓上 d 人應該成世未試過有朋友...
話咩攞你著數話咩變差... 唔好見佢之類...
我建議你真係唔好理呢 d 野啦... 唔好諗呢 d 野啦 !
朋友唔係咁做嘎...
朋友唔係下下咁衡量法嘎...

你都講過 , 佢同你經歷過人生幾個好重要 ge 關口...
如果你真係用呢 d 野去衡量你朋友...
我就覺得你好差勁了... 你口講到你幾重視佢地...
你竟然用呢 d 價值觀去睇佢地 ? 有冇搞錯...
你連個信字都比唔到佢地... 仲講咩朋友 ?

從以前日見夜見到而家要約先見到 ,
呢個轉變係要適應下...
唔好比呢 d 芝麻綠豆 ge 小事影響到...
可能真係會 " 無以前咁 friend "... 但又唔使咁傷春悲秋丫...
呢 d 轉變係自然 ge...

最後 , 佢係唔係變左 , 再值唔值得再做朋友 ,
呢 d 真係得你先知...
但我就咁睇上文 , 我完全睇唔到有 d 咩 " 變左 "... " 變差 "... 咁大件事....

[ 本帖最後由 玩具 於 17-8-2008 04:16 PM 編輯 ]

Lady

玩具兄~ 我開頭都好似你講咁樣態度去面對件事
不過試多幾次之後我都灰左....如果你在場就會了解到行街果陣既情況:die:

佢會全副精神放左係d衫上面..企係隔黎既我..就只係係度企...
我試過對佢地買既衫俾意見..其實都唔影響佢買唔買既結果
我對佢睇果d衫鋪果d衫真係冇興趣..
結果我自己唔會睇d衫..俾意見佢又唔理..佢掛住睇衫又唔理我...:oh:
出街我地傾到計既時間..就只有係由鋪頭A行到鋪頭B路程時間

我唔係覺得佢地攞我著數，只係冇一次係考慮到我既感受:unhappy:
其實我唔係需要佢地陪我睇玩具..我識搵志同道合既人一齊睇
只係同佢地出親街可唔可以有邊次唔睇衫..
可以搵個公園坐下吹下水講下近況就已經好好
或者食飯食耐d食完坐低傾計傾到要返屋企為止..我就已經冇怨言啦..:$

所以佢地只有約去做特定事情..行街可能性較細..真正傾到計機會較大
我先會出現..如果唔係多數都作借口出黎推得就推..

另外我都唔係為一定要行女人野而令我唔開心
我都真係當偶然一次半次咪陪下佢地
而係無啦啦一句"我唔係約你你唔駛報定案"
又要話我唔用心聆聽..討厭呢種朋友
..我先會覺得咁唔開心.........
其實冇耐之前試過一次突然地...無啦啦地...鬧我做乜唔主動約佢地..而要佢地約我..

---------------------
題外話:
我對衫褲鞋襪唔係 100% 無興趣
因為我一樣要著衫出街..只係如果買新衫..舊果d冇位攞就要丟掉
舊果d衫未爛未穿...我唔捨得丟..呢個世界好多人冇衫著冇鞋著...
我唔明點解好多人可以季季買一大批新衫..舊衫冇可能著一季就爛曬掛
有幾多人會識得攞舊衫去捐?
即使會捐....有幾多真係去到有需要既人手上?
至於化妝品..我真的..不知為什麼..120%冇興趣.....................

[ 本帖最後由 Lady 於 17-8-2008 04:46 PM 編輯 ]

katoributa

玩具兄好有道理，但看來lady姐似乎還未明箇中所言。
如果你說其他人不明白你的情況，咁我相信實情並不如此，只要拍過拖既男性大大都明白我所指了。你說「我唔明點解好多人可以季季買一大批新衫....」，情況就如佢地都唔會明「點解你咁大個人仲去睇玩具」一樣，當中並不存在你對或者我對。
最後這位朋友值唔值得你珍惜，我認為作為外人的我們實在完全無資格過問，這只有你才會知道。

Lady

我明白玩具兄所言，都覺得所言不錯
我唔會因為大家興趣唔同而做唔到朋友
興趣唔同只係令我會多左推佢地少左同佢地去街
朋友仍然係朋友唔會因為唔行街而唔係朋友

我唔開心係因為琴日佢所講既說話:die:
我只係講左句我約左屋企人陪唔到佢
佢就一句 "我唔係約你你唔駛報定案，討厭"
再一句 "好不喜歡不用心聆聽的朋友"
冇諗過會俾最好既朋友咁樣話我....所以我先會唔開心.....