|
|
|
(麻帆良市時報記者鹿目まどか報導)
Iveco-Magirus 呢個名字, 喺消防界入面嘅人相信都唔會陌生,
香港消防處所使用嘅旋轉鋼梯車, 亦係採用左佢地旗下嘅出品,
(雖然消防處最新嘅雲梯車底盤已經轉用 Scania 為基礎,
唔再係由以前同集團嘅 Iveco 提供, 但係佢地所搭載嘅雲梯依然係由 Magirus 提供,
因為 Magirus 所出產嘅鋼梯產品可以裝配喺幾乎所有由其他車廠出品嘅底盤之上)
就連機場消防隊所使用嘅車輛, 喺 2012 年亦都出現左佢地旗下產品嘅蹤影,
由上世紀末開始使用奧地利 Rosenbauer 產品嘅香港機場消防隊,
於去年引入全港首架 Iveco-Magirus SuperDragon 2 X8 機場消防車,
亦為全球首個引入使用同款消防車嘅用家 / 機場,
佢使用四軸 8x8 全輪驅動設計, 並且配有 ABS 同全碟式煞車系統,
配備兩台符合 Euro 5 標準嘅 Iveco Cursor 13 引擎,
後置於車尾, 雙動力配搭令馬力高達 1,120 hp (每台 560hp),
連接內置液壓減速器嘅美國 Alllison 全自動變速系統,
喺負重狀態下, 由 0 - 80km/h 加速更只需 25 秒內完成,
最高時速可達 135 km/h, 引擎同時可以充當水泵,
配備容量達 17.000 公升嘅水缸同 2,100 公升泡缸,
可以透過車頂同車頭設置嘅水砲, 由車內人員控制即時向火源射水,
水砲最遠射程可達 90m, 同時可配備二氧化碳同乾粉滅火系統,
以撲救唔可以利用水同化學泡沫撲救嘅火警。
今日, 麻帆良市隆重歡迎 Iveco-Magirus SuperDragon 2 x8 登陸!
呢部香港機場消防隊首架 SuperDragon, 市長 Super Bus 話,
呢部飛龍雖然睇落同另一間廠 Rosenbauer 出品嘅 Panther 系列喺設計上外型有D相似,
但係佢較長嘅車身, 已經給予呢架車其中一個特色,
而且佢喺性能方面亦絕對唔會輸比 Panther, 咁到底 SuperDragon 同 Panther,
要兩款車之中只可以選其一, Super Bus 又會點揀呢?
佢話: "兩款車都咁型, 真係好難揀啵 ..."
的確, 兩款車車頭嘅流線型設計, 實在令人留下深刻嘅印象,
又難怪 Super Bus 會咁花心啦!
事實上, 呢架車上次市長 Super Bus 亦已經入左一架, 不過就係細細架嘅 1/87,
而今次呢架就係大版本嘅 1/43, 加上佢修長嘅車身,
令呢架 SuperDragon 成為真正嘅 "超級巨龍"!
Super Bus 話, 2013 年收到消息話會出 1/43 版嘅時候,
佢就已經非常期待啦, 結果等左超過一年半,
到今日終於等到佢正式推出, 真係等到頸都長!
而且當中更有一段小插曲, 話說 Super Bus 喺德國訂左呢架車,
而賣家亦喺上月 19 日用 DHL 將車寄出, 唔知乜野原因,
結果等左一個月以上嘅時間, 仲要到左美國之後轉比美國郵局接棒,
到今日架車先至到埗! Super Bus 話, 佢以往都有上網喺德國買野幾次,
最耐都係三個禮拜到到手, 但係今次係超耐,
"雖然已經知道時值聖誕新年, 郵寄 Delay 在所難免,
但係今次亦未免太過火啦, 更何況仲要係 DHL 添!"
就連德國嘅賣家都唔明白點解 DHL 竟然要咁耐至將郵件寄到佢手,
不過經過一番波折, 新車最終都喺今日平安到埗,
亦成為 2015 年麻帆良市首架新車,
依家就等我地一齊一睹呢架 "超級巨龍" 嘅風采啦!!
隆重歡迎! 香港國際機場 Iveco-Magirus SuperDragon 2 x8, 見參!!
正式落地!!
巨龍與小龍, 諷刺嘅係同一間廠出, 竟然都有輕微錯誤,
留意車頂嘅警號燈, 真車係紅色嘅, 亦係香港消防車常用嘅警號燈顏色
但係 1/43 大車竟然用錯左德國緊急車輛常用嘅藍色警號燈, 反而 1/87 細車就做啱左
香港機場消防嘅龍與豹, Dragon x Panther
呢架新模型比我有少少失望嘅地方, 就係一架 1/43 咁大架模型竟然冇雙前軸轉向,
一架咁貴嘅模型竟然連呢樣野都唔整, 比人感覺樣根本就係將架細車放大嚟出, 完全冇改動過,
而且香港消防車用藍燈呢樣亦總係覺得有尐格格不入,
但係 Overall 成架車嘅外觀其實都唔差, 同埋架車都真係好重手,
而且仲係香港機場消防嘅拉花,
如果唔係因為呢點再加上自己又鍾意呢款機場消防車嘅話真係都唔捨得咁入法~
加送短片:
Thanks for reading~ |
|
發表於 25-1-2015 13:35:28
樓主