|
|
|
(麻帆良市時報記者鹿目まどか報導)
喺香港, 一提到 Guy 或者「佳牌」呢個巴士品牌, 年資較深嘅巴士迷或者巴士業者,
一定會即時聯想起當年中華汽車有限公司, 或者中巴喺港島區服務嘅日子,
事實上, 中巴亦係「佳牌」喺海外嘅重要客戶之一,
最高峰時期中巴共有多達數百部「佳牌」巴士喺路上行走。
喺中巴嘅「佳牌」巴士車隊之中, 最多資多采嘅,
要數 「佳牌」亞拉伯五型 (GUY Arab V) 呢款巴士啦,
佢除左係中巴嘅主力車款之外, 亦可以話係中巴嘅運財童子,
款式更加係千變萬化, 除左有長陣短陣之外, 亦有單層雙層,
而且仲有由單層改建成雙層添, 咁都仲未只呀,
當年一批為數四十部 36 呎長陣版本嘅「佳牌」亞拉伯五型單層巴士,
更喺中巴嘅親自操刀之下, 全數「劈」短成為 30 呎長嘅底盤,
再配上雙層巴士車身, 成為一架正正式式嘅雙層巴士喺路上接載乘客,
堪稱鬼斧神工。有唔少巴士後來再接受重建車身工程,
由原本樣子古老嘅英國 Metal Section, 來自英國嘅二手巴士車身,
以至中巴自家設計嘅黃洲車身, 脫胎換骨換上由蘇格蘭 Walter Alexander 提供嘅全新車身,
成為後來嘅 LX "假寶", 延續佢地嘅生命力, 並且一走就走到九十年代,
部份巴士服役左達三十年之長, 依然老當益壯。
但係隨住中巴嘅路線喺後期被削減, 中巴喺港島嘅版圖亦漸漸萎縮,
令中巴出現車隊過剩, 一D車齡較高嘅巴士亦因此而被淘汰,
連 "假寶" 亦不能倖免, 最後一部 "假寶" 巴士, 亦於 1997 年 3 月底退役。
今日到埗嘅呢架中巴「佳牌」亞拉伯五型 "假寶",
車隊編號 LX 231, 真車底盤係原裝地道嘅 30 呎標準長度版本,
而佢嘅雙層巴士車身就由英國 Metal Section 提供, 並且喺香港由中巴負責裝嵌,
喺 1966 年投入服務, 當時原本配上 Gardner 6LW 引擎,
所以原屬車隊編制嘅 LW 系 ("L"ong wheelbase Gardner 6L"W"),
到 1970 年被換上 Gardner 6LX 引擎, 並且被編為 LX1 ("L"ong wheelbase Gardner 6L"X") --
由於中巴一直到 1970 年代初至有車隊編號識別, 所以喺佢換引擎之前亦未有任何車隊編號。
LX1 喺經歷達十二年嘅服務生涯之後, 喺 1978 年接受重建車身嘅 "手術",
原本一身 Metal Section 車身嘅裝束, 搖身一變換上當時富有流線線條嘅 Walter Alexander 車身,
而且連車牌亦由原來首次登記嘅 AH4008 改為當時嘅新車牌 BV9863,
車隊編號亦由原來嘅 LX1 改為 LX231, 經過重建車身之後,
呢架 "假寶" LX 再次煥發青春, 延續佢嘅生命力,
一直再服役多長達十五年, 直至 1993 年年底退役,
前後一共喺中巴服役左達 27 個年頭。
今日, 麻帆良市正式歡迎中巴 "假寶" LX 231 到埗!
市長 Super Bus 話, 雖然佢本身係 "九龍人", 但係有時亦會過對面海,
佢話由於當時仲細個, 而且對巴士認識太淺, 當時見到呢D巴士,
仲以為係新車, 而且車身線條同同樣配上 Alexander 車身嘅勝利二型實在太相似,
混淆左以為係同一款車, 只係頭轆比勝利二型移前左,
後來大個左, 再睇D巴士書, 先至知原來呢批巴士其實係 1960 年代嘅產物,
由 Guy, 或者「佳牌」出品嘅亞拉伯五型, 而且當時由於佢地車頭嘅水箱位頂部,
有一個紅蕃頭像嘅標誌, 因而得名 "紅蕃頭", 而佢一身酷似勝利二型嘅車身,
其實係重建車身而成為呢個樣子, 但係感覺亦非常特別,
同對岸九巴嘅 Daimler E 長牛呢D車比較, 中巴嘅 "假寶" 尤其特別得多。
Super Bus 仲話, 呢D "假寶" 巴士佢當時都坐過好幾次,
由坐 47 號由西環入華富, 以至坐 14 號由赤柱出筲箕灣,
都可以睇得出呢D巴士嘅靈活性, 再加上當時中巴嘅司機大佬幾乎個個都係 "車神",
更令呢D "假寶" 嘅行車表現發揮得淋漓盡致。不過令 Super Bus 印象最深刻嘅,
要算係一次喺 1991 年搭 70 號坐中 "假寶", 由中環入香港仔,
以佢當時已經有廿多年車齡, 依然可以喺香港仔隧道健步如飛!
中巴嘅 Keep 車技術有幾到家由此可見一班, 可惜呢D "假寶" 隨住中巴嘅路線被削減,
所引致嘅車隊過剩, 再加上車齡高而被淘汰, 最後亦一架不留,
到 1998 年中巴更喪失專營權, 亦為中巴服務港島區嘅日子劃上句號,
昔日中巴 "假寶" 喺路上飛馳嘅情景, 以至中巴當年喺港島區服務嘅日子,
今日只有喺一D巴士書嘅相片, 以前影低嘅巴士相片,
以至腦海中嘅回憶去懷愐啦...至於有人會問點解呢批車會叫做 "假寶" 呢?
Super Bus 話佢都無從考究, 第一次聽到呢個別名已經係 90 年代嘅事,
佢話大概係因為中巴嘅一批 Daimler / Leyland Fleetline, 或者 "珍寶" 巴士,
即係中巴車隊編號 LF 107 打後嘅一批, 同埋 SF1-30,
又係配上同樣車身線條嘅 Alexander 車身,
所以呢批巴士因為 "珍寶" ("真"寶) 而得到相對嘅名字而得名 "假寶" 啦~
無論如何, 中巴 "假寶" 當年與大家一起走過的日子,
至今都一樣係咁值得回味嘅~
隆重歡迎! 中巴 Guy Arab V "假寶", 見參!!
證書編號 0869, 限量 1000 台
正式落地!! 難得同鹿目まとか來個合照喔~
大家仲記得呢個藍方旗標誌嗎?
與中巴勝利二型合照
係咪有少少餅印 Feel~?
與中巴 "長龍" 合照, 1965 年開始投入服務嘅為數 40 部中巴 "長龍",
為左要達致中巴喺 1975 年前全車隊雙層化,
呢批巴士亦喺 1971 年被拆除原來嘅單層巴士車身,
並且由原來嘅 36 呎長底盤縮短至 30 呎,
再裝上雙層巴士車身, 並且多次重建車身,
最後裝上 Alexander 新車身並且一直沿用至九十年代
那些年, 我們一起坐過的中巴
攝於 1993 年尾中巴柴灣車廠外一處空地, 一批 "假寶已經退役並等候處置
LX345 攝於 1996 年巴士大集會
留意坐喺司機位揮手嘅係邊個~?
另加 LX231 真車相
http://www.chinamotorbus.com/bus ... 68&search=exact
呢架 "假寶" 巴士雖然有一D Detail 上嘅錯誤,
但係始終都係十多年前嘅產物, 佢肯喺今日重出,
而且仲取消左舊模常見嘅兩條連接內籠車頂同車底嘅金屬柱已經實屬難得,
加上依家中巴車款嘅模型亦唔及九巴以至新城嘅出得多,
鍾情玩中巴車已經冇得可以再挑剔,
學某人話齋: "中巴車仲要咁挑剔嘅話真係乜車都可以唔洗玩啦!"
同埋拎架假寶上手睇, 呢架假寶其實都唔係真係咁差, 反而仲好鍾意呢架車,
中巴車已經冇入一段時間, 對上一次入中巴模型已經係 2010 年出中巴 CX8 @ A20 樹脂膠車推出嘅時候,
今次中巴假寶 Retool 重出, 希望一D以前出過嘅中巴模型有機會重出,
亦希望一D中巴獨有而特別嘅車款有機會喺將來推出 / 重出~
長文一堆, 無論大家有冇心機睇到落嚟呢句服段落, 都係一句, Thanks for reading~ |
|
發表於 2-8-2013 15:58:58