賓賓賓大阪之旅(UPDATE 至 DAY 3.2.2)(已在 1# 加入索引功能，唔駛轆得咁辛苦啦)

benbenben4213

序言

因今次大阪之旅玩得極開心(30/05 - 04/06) ，所以一番黎要即刻同各位網友分享

係 TD 出玩具報告就出得多，反而寫遊記就第一次，希望大家唔好縑棄啦

黎啦，一齊出發嘞


正文

話說日本是小弟好恨去既地方，惟因老虎在早年東京之旅懷有不好印象(駛費貴及無野啱買)，所以並不熱衷再到日本旅行

是次能成行，多得老虎的 ASIA MILES(為佢公司簽帳既下蘭) 將在 6 月到期，因唔想重覆再去台灣(兩年內去了幾次了，雖然唔悶)，在無何選擇的情況下，最終半推半就，俾小弟說服去大阪，行程定為 6 日 6 夜。

當然訂左機票梗要訂埋酒店，酒店老虎就聽屋企人介紹，訂左在心齋橋附近既 「comfort hotel osaka shinsaibashi」

老虎講明：「我興趣真係不大，機票、酒店幫你攪掂，其他所有行程編排、交通安排你自己負責番嘞 !」

需知道每一隻老虎都係軍令如山，佢地話一，做老公既唔會咁話二

小弟當然唔例外啦，即刻努力咁去睇書、上網搵資料

但因第一次自由行到大阪，起初真係唔知點行點走

幸好小弟有一班 TD 好網友(Panzer 兄、常威兄、rthk 兄、bbf 兄、魔術師兄等)，出心、出力、出書、出卡，解答左小弟好多疑問同提供好多有用資料，小弟先至有方向完成以下行程安排：

---

day 1：1620 機，到機場乘巴士到難波，再轉地鐵到心齋橋，settle 好哂就去居酒居食飯

day2：環球影城

day3：買 2 天週遊卷，去大阪城公園，歷史博物館，今昔館，午餐（名戶宇奈饅魚飯 - 南森町站)，一個站到東梅田，先去阪神，阪急，大元，之後打橫殺過去 mandarake。睇完行番去hep five，世嘉 joypolis，yodobashi，之後晚飯後回心齋橋

day4：動物園，通天閣，黑門市場，午餐(自由軒)，難波 city，電電城，道頓堀，心齋橋筋，乘觀光船遊道頓堀河，晚餐(蟹)

day5：神戶，甲子園(影個相，感受下氣氛)，番美國村，mandarake，心齋橋大丸，晚餐

day6：outlet，機場 mall ，走人

---

索引

day1 - http://www.toysdaily.com/discuz/redirect.php?goto=findpost&ptid=208801&pid=6938477&fromuid=12938

day2 - http://www.toysdaily.com/discuz/redirect.php?goto=findpost&ptid=208801&pid=6938478&fromuid=12938

day3.1 - http://www.toysdaily.com/discuz/redirect.php?goto=findpost&ptid=208801&pid=6938479&fromuid=12938

day3.2.1 - http://www.toysdaily.com/discuz/redirect.php?goto=findpost&ptid=208801&pid=6938485&fromuid=12938

day3.2.2 - http://www.toysdaily.com/discuz/redirect.php?goto=findpost&ptid=208801&pid=6938487&fromuid=12938

---

加多張大阪地鐵圖，大家可以一路睇、一路做個參考

---

有用連結：

關於大阪名勝景點

http://www.osaka-info.jp/ch_t/

關於週遊卷購買方法及可用地方

http://www.osaka-info.jp/osp/cht/guide/guide.html

環球影城網址

http://www.usj.co.jp/ (可在裡面搵到你到訪當日的開門、關門時間及當日有無燈車巡遊)(7月到9月有ONE PIECE，FANS 未錯過嘞)

有關環球影城生日優惠

1) http://betablog.udn.com/lovefran101/7200322

2) http://oyummy.pixnet.net/blog/post/24568306-%5B%E6%97%85%E9%81%8A%5D%E5%8A%A0%E5%85%A5%E5%A4%A7%E9%98%AA%E7%92%B0%E7%90%83%E5%BD%B1%E5%9F%8E%E6%9C%83%E5%93%A1%E5%88%97%E5%8D%B0%E7%94%9F%E6%97%A5%E5%84%AA%E6%83%A0%E5%88%B8

POCKRT WIFI

1) http://www.visondata.com/order.html?destination=10

有 3G 同 4G 選擇，4G - $80/DAY，速度真係無得頂，同香港用 4G 一樣快

2) http://esondata.com/pages/SIM%E5%8D%A1%E7%A7%9F%E9%87%91%E6%94%B6%E8%B2%BB.html

benbenben4213

Day 1

如期出發，上機


三個幾鐘頭好快就過

出到機場入境大堂已經係 2130 了

根據交通編排，我地選擇坐 2155 班次直通巴士到難波既 OCAT(11號站，一出 A 出口就見)



車票發售處在 A 出口的左手邊(自動售票機，9,10,11 號站公用，有英文)

買完車飛，見仲有時間，就入番大堂去個洗手間

同埋影個相留念


夠鐘上車， 車程大約 50 分鐘

去到 OCAT 一落車就會見到指示如何前往地鐵站及火車站


本來我地要坐御堂筋線去心齋橋站再去酒店的，但原來可以行地下通道過去(通道連接 OCAT 至難波地鐵站道頓堀出口)

一出轉左行兩個街口就已經係心齋橋筋，行多 5 分鍾就到酒店


臨到大阪前，曾經同日本通同事研究過呢間酒店，初頭仲以為好細，放唔到喼........

懷著戰戰兢兢既心情打開房門..........

幸好都唔細，起碼訓得落兩個豐滿人士:he:

因為之後一日要 0630 起身去環球影城，所以晚餐並沒有跟行程到居酒屋，而係係樓下便行店攪掂算數 LU

食飽飽，沖過靚涼就訓覺咯

DAY 1 完

benbenben4213

Day 2

陽光燦爛的日子

因環球影城 0930 就開，為免唔夠時間玩，所以 0630 就起身準備

0730 就到酒店小餐廳食早餐

雖然食物種類唔算多，只得麵包、栗米片、飯團、通粉、麵豉湯、腸仔、薯仔、蛋、鮮奶、COFFEE & TEA，不過味道唔差

食完早餐出發

我地在「心齋橋站」(N15) 上車，搭地鐵長堀綠地線地鐵到「大正」(N11)

之後再轉乘 JR 外環去 「JR 西九條站」 (跟指示，大正地鐵站一出就係火車站)

「西九條站」落車後，過對面月台就係去環球影城的 JR 夢咲線了

班次都好密，而且乘搭時間都只係 8 分鐘，話咁快就到「 JR UNIVERSAL CITY」站(搭 2 個站)

由出口沿住大路前進就係環球影城，而沿路就有酒店同大型商場 - Universal City Walk

商場內主要為服裝店同食肆，零售店舖大約 9:00 關門，食肆則閂 10:00 左右

其中有一間舖好啱漫畫迷行既，不過留番尾段再講

講番環球影城先


當日開放時間為 0930 - 2000，我地去到已經係 0900

本來環球影城是編排在 DAY 5 才去的，但在上網搜集資料時，知道原來只要符合以下條件，就可有入場優惠，每人可獲減 500 YEN

1) 要去環球影城(大阪)的網站登記成為會員(一定要去日文版網站先得，登記方法可參考網上資料 -
http://violet66.pixnet.net/blog/post/26044258-%e3%80%90%e6%97%a5%e6%9c%ac%e3%80%91-%e5%a4%a7%e9%98%aa%e7%92%b0%e7%90%83%e5%bd%b1%e5%9f%8e)

2) 會員在生日當月或下個月入場 (例子：7月10日生日，自己及最多同行 5 位親友便可在 7 及 8 月內以優惠價入場一次)

咁啱小弟在4 月生日，所以如要享受優惠，就一定要在 31/05 前往，亦因此要將行程調一調

行到購票處，出示預先打印的優惠卷同護照，好快就買到飛，生日會員仲有個貼紙表明身份，可獲星級禮遇添(可獲員工對你說：HAPPY BIRTHDAY:80: )


買完飛跟手去排隊，眼見有好多中、小學生哥黎旅行，心諗今次 PK 了，咁多人有玩，有排排

等左一陣，開始進場

見到兩隻吉祥物梗要影個相


第一個想玩既當然係蜘蛛俠，為免等得太耐，拖住老虎急急腳行過去

但沿途又唔係好多人咋喎


離遠已經見到大大隻蜘蛛俠

點解無乜人既?

原來蜘蛛俠館由 5 月中已開始閉館改建直至 7 月中才重開，無得玩，好 L 慘 :79: (黎緊呢兩個月會去既師兄記住留意呀，係呀，同你講呀，齋)

無得玩，惟有過隔離回到未來啦


玩就幾好玩，不過套片太舊了，開始黃咁咁嘞

跟手我地仲玩左保侏羅紀公園、大白鯊同烈火雄心


玩完呢三個之後，基本上都玩左一半野，係時候行下 D SHOP 嘞(老虎唔玩過山車，所有撇取左)



蜘蛛俠店無乜野啱買，所以睇完即走

反而一路行一路見住個o靚仔攞住個蜘蛛俠頭，好有興趣喎
初頭搵左好耐都搵唔到邊間舖有得買，後尾先知佢係收起黎買，要問先有架:what: (一陣開估)

邊搵蜘蛛頭邊搵正經野食，搵左幾間餐廳都唔啱，反而係其中一間餐廳對面見到好靚既佢......


(呢張我唔係特登影架)


開開心心睇完姐姐睇完 Kitty 跳舞，繼續前進，終於都搵到啱大家心水既野食啪嘞
味道不過不失啦

食完飯，向兒童樂園進發

因唔係特別喜愛以上卡通人物，所以兜左個圈就走

之後睇睇個鐘，大約係 1600 左右，行番去睇兩個立體影院 - 未來戰士 3D 同史力加 4D

未正式介紹前，俾定個貼士大家，呢兩個真係可以玩哂其他野先睇都未遲:67:

點解

先講未來戰士
  
唔係話唔好睇既，只係全日文對白，又無字幕，完全無理外國遊客感受囉

整個故仔以真人演出同電影片段表演出來，前段真人表演，因聽唔明佢講乜，完全唔知佢想點，只係靠估估下大約知道同 T2 劇情有關

大約做左 15 分鐘，都仲係條架妹演員係度棟篤笑，我同老虎睇到呆左，企係度都訓得著咁滯(0630 起身{:1_201:}  )

再過多一陣，見到條架妹演員好禮貌咁又遞手又鞠躬，跟住就見到隔離 D 觀眾拎起哂 D 跟身野就行，我同老虎仲以為就咁散場添{:1_206:}

跟住其他人一齊行，原來唔係完場，係行入去另一個劇場至真{:1_197:}

當所有人都坐好，條架妹演員又出番黎，又 UP 一大段日文，攪乜呀??

突然，見到兩邊牆出現左六個機械人，又噴煙又發光咁

跟手又見幾個老外扮演 CONNER 母子 同 T100 出場

原來宜家先黎料 {:1_208:}

之後有關劇情留番大家親身感受嘞(提一提，儘量坐後 D，唔係睇得好暈)

只可話套片好好睇既，只可惜對白都係全日語，只能靠畫面估劇情

至於史力加，基本上都係一樣全日文，又係入劇場前企係度聽一輪野，之後再入場睇 4D 卡通片(因冷氣充足，張椅又震得舒服，小弟一坐低就訓著左直至散場 LU{:1_234:} )

所以小弟建議大家留番玩哂所有機動野再黎就係咁解嘞

睇完兩套立體電影，已經 1800，係時候加緊腳步，係燈車巡遊開始前搵到蜘蛛頭

我同老虎研究過，佢 SIZE 唔係好大，應該係裝野食既

所以我地專攻小食檔，行過幾個檔口，都只係見到 COOKIE MONSTER、 ELMO 等餐盒放出黎，唯獨唔見蜘蛛頭

之後再行多幾檔都係唔見

本來諗住放棄唔搵了，不過越諗越唔順氣，決定行埋去其中一檔，問一問佢邊到有得買至得

行埋去同檔口哥哥一輪「動作」溝通後，哥哥施施然係個櫃到攞左個蜘蛛頭出黎裝野食

裝乜野食?

未爆谷囉

又唔係好名貴，都唔明點解要收埋 :38:  

搵左咁耐，離燈車巡遊開始大約淨番 20 分鐘，要嗱嗱聲搵個靚位影相先得

睇下張樂園圖，我地決定在燈車起步地方落腳，貪佢睇完可以即走，唔駛同人迫

尚幸一班學生哥早已離場及當日真係唔算好多人，所以好快搵到位
  
20分鐘後，燈車巡遊正式開始


巡遊時間大約 20 分鐘，見到演員們載歌載舞，情緒推到最高點，完滿完成環球影城之遊(仲有好多燈車架，大家自己親身去睇下有幾靚啦)

離開園區前，梗要留影一下啦


離開園區，我地去下一個景點


早在開始前已經提及過此商場包含購物店舖及食肆，所以不作逐一介紹了

只有一間店要同大家分享一下，佢就係....

少年 JUMP 官方商店

相信各位漫畫迷師兄都知少年JUMP 係乜啦，裡面有現役作品及歷代神級作品既海報、日用品、食物，總有一樣啱你既
   
睇完後，本來打算在樓上食肆醫肚，點知間間都排哂人，所以決定回心齋橋先食飯

沿原來路線回去，去左道頓堀既王將食飯，之後番回酒店，是日旅程完結

Day 2 完

benbenben4213

Day 3.1

呢日行程都幾緊湊，所以 0730 又要起身了

嘰嘰攪攪，食埋個早餐，0930 出發去難波遊客資訊服務中心購買「大阪兩天週遊卷」(週遊卷可免費乘搭地鐵及免費進入景點，分 1 天及 2 天兩種，各位可因應自己需求購買，購買方法及用法可看 1# 的連結)

購票後，出發到今日第一個境點 - 大阪城天守閣(週遊卷免費項目)

由御堂筋線「難波」站(M20)坐車至「本町」站(M18)，再轉乘中央線至「森之宮」站(C19)，在 3B 出口出

一上地面已是大阪城公園了


沿住指示，向前走二十分鐘就會到達天守閣



天守閣門口


全座天守閣分為 8 層，最上一層是360度觀境台


以下樓層則為天守閣主人 - 豐神秀吉的介紹及日本戰國時代的介紹


相信對日本戰國歷史有興趣既師兄會睇得好過癮，可以逗留好耐都唔捨得走既。而我同老虎則留了個多小時就行完了

臨走又影個相留念下啦

跟住要去下一個景點 - 大阪歷史博物館(週遊卷免費項目)

我地由天守閣向大手門步行前往，出了大手門口左行五分鐘路程就已經係「大阪歷史博物館」了

博物館與 NHK 電視台相鄰，門口也是共通的



博物館從十樓開始至七樓，由大阪難波宮年代介紹至上世紀40年代
      

8 樓有發掘、考古遊戲供遊客遊玩


大大阪時代


提一提，黎緊 7月至 9 月係 6 樓特別展覽廳會有日本刀展覽，有興趣既師兄又可以留意下啦


係展覽館又留左個零鐘，睇完後又去下一個境點 - 大阪生活今昔館(週遊卷免費項目)

今次要搭地鐵嘞，係後門出就已經係「谷町四丁目」站(T23)，坐谷町線到「第天神六丁目」站(T18)，3 號出口出(一出就係嘞)


去之前做資料搜集時，覺得佢同博物館睇既野會重疊，但原來又唔係架喎

佢都係分左古代同近代，但係古代介紹，是用真實街道形式呈現給遊客(會去既朋友既要留意下個天花板，有意外驚喜呀)


驟眼睇寅係幾可亂真架

每一樣展示品都做得好有心機


差 D 唔記得講，古代街有浴衣出租(男、女都有)，有興趣可試下

下層就係近代展區，雖然無1:1街道，但有好多當時生活情境模型及當年曾經用過既物品展覽，有 D 物品你都有可能曾經見過架




估下呢件野係咩?

  
答案在最後揭曉

模型入面 D 細節野都做到足，真係一絲不苟架
   
行下睇下又個幾鐘，望下手機個鐘，已經係 1410 了，再唔走，飯後之行程一定唔夠時間

所以要嗱嗱聲搭車去食午飯嘞

去邊食?聽晚再話俾你地知啦

迷底：

benbenben4213

未開始新一篇前，一定要向大家推介用 POCKET WIFI

在最初構思行程前，本來無打算用的，因為去旅行仲攞住部手機，日又WHATAPPS，夜又WE CHAT，仲要上TD 留言，肯定會俾老婆扭甩個頭{:2_319:}

後來得到高人 - 常總提醒：「未 KAI 啦，個 WIFI 攞黎搵路嗰時用架」

諗真又係喎，日文又唔識講，聽到英文架仔又耍手擰頭，有個 WIFI 傍身真係方便好多(後來發現除左搵路之外，仲可以打免費長途電話架，當然你要用智能手機啦)

賓賓賓是用呢間公司既租機服務既

http://www.visondata.com/order.html?destination=10

有 3G 同 4G 選擇，我地用左4G，$80/DAY 嗰隻，速度真係無得頂，同香港用 4G 一樣快

另外仲有一間是網友 RTHK 兄介紹的

http://esondata.com/pages/SIM%E5%8D%A1%E7%A7%9F%E9%87%91%E6%94%B6%E8%B2%BB.html

呢間除左有 POCKET WIFI 外，仲有 SIM CARD 選擇，價錢亦都較平，悉隨尊便(本來諗住用呢間的，不過呢間既 POCKET WIFI 較貴，所以無用到)(又，後尾番到香港後同老婆研究過，如果真係打算分開行街既，可以一個用 POCKET WIFI，一個用 SIM CARD 最平嗰個 PLAN，咁就唔怕途中有突發事件聯絡唔到對方嘞:36: )

---

Day 3.2.1

去完今昔館，已經1410，個肚已經「咕咕」聲，係時候去食飯嘞

事先已計劃左去食饅魚飯，所以諗都唔駛諗，搭地鐵過去

今次我地坐堺筋線，由「第天神橋筋六丁目」站(K11) 去「南森町」站 (K13)，3 號出口出

一上地面，有 D 唔對路，點解出發前準備定既地圖同真實地方有相差既

望下左、又望下右，攪左一大輪都唔可以定到位

為免行左方向，係 POCKET WIFI 出動既時候嘞

因為係行 4G，所以好快就定到位(其實個離線地圖無錯既，只係放得唔夠大，好多周邊地方都無 SHOW 出黎，以致搵極附近明顯地標都搵唔到囉)

跟番個方向，過左大馬路行多 3 分鐘就到飯店嘞

不過在飯店前幾個舖位，有好街坊打扮既人係度排隊買野食喎，八卦走埋去睇下，原來係賣薯餅既

見佢價錢唔貴之餘，又有咁多人排隊，心諗應該無死錯人，一於二仔底- 死跟

排到埋去，見到有原味及牛肉兩款口味，決定每款一件試下

(左牛肉 120 YEN，右原味 70 YEN)

我先食原味、再食牛肉(老婆就調番轉)

真係好食喎，原味夠哂薯味，而牛肉亦配合得啱啱好，既野味但又唔會搶哂主角味道，正呀{:1_221:} ，老麥嗰 D 唔該行埋一面啦(我兩款都覺得好食，老婆就嫌牛肉味「灟」D)

開左個胃，個肚更加餓，加緊腳步去飯店

行多幾個舖位就到


因為老婆好鍾意食饅魚，所有黎之前做定功課，在網上搵到呢間口評唔錯既饅魚飯專門店(有另外一間都好評既，不過價錢貴一半)



一坐低就已經有決定，我要 1000 YEN 嗰款，老婆要 1500 YEN 嗰款加多隻溫泉蛋

等左 10 分鐘到，有得食嘞(即叫即燒，抵我地等多一陣)

一上枱，嘩:no:
貨真價實，又香，又同 MENU 一樣大細(香港嗰 D ......)

食落口，魚皮煙煙靱靱，魚肉香香滑滑，斗膽講句，香港普通日本飯店所製作既望塵莫及

因實在太好食了，三扖兩撥食鬼哂，大滿足呀:51:

食飽哂，又係時候下一個境點

按照原定計劃，我地會坐地鐵過梅田開始行百貨公司既

但老婆一聽到就即刻耍手擰頭，話百貨公司都無野好行，對名店既衫褲鞋襪完全無興趣，有無第 D 選擇?

事出突然，好彩早有 PLAN B

即時改行程，改行號稱大阪最長商店街 - 第天神橋筋商店街

剛好饅魚飯店就在一丁目，我地就決定由一丁目開始行到落最尾

埋單，起行


行番回頭路，又經過薯餅舖，忍唔住要每樣 ENCORE 多一塊

可惜原味實在太受歡迎，已經全部售罄了，只好食牛肉味啦


食完繼續前行，一條街一條街咁行落去


每條街各有特色，各式各樣既店舖都有，好似我老婆呢 D 行街精黎到一定好開心






當然有波子機舖


同夾公仔機


仲有藥店
  
亦在無心插柳下，搵到舅仔要求的手信 - 木刀(起行前真係諗唔到會搵到架:$ )


行到去「第天神橋筋六丁目」站都已經行左 2 個半鐘，真係行到腳都軟

最後決定放棄最後一丁目，坐番谷町線，由「第天神橋筋六丁目」站(T18)去番「東梅田」站(T20)

未完，待續(期待已久既玩具第一站即將登場，敬請繼續留意)

benbenben4213

Day 3.2.2

梅田係大阪市內一個舉足輕重既地區，因往來神戶及京都的 JR 及私鐵(阪神線及阪急線)的總站都設在此地，再加上幾條地鐵線亦在此交匯(有御堂筋線既「梅田」站、四つ橋線既「西梅田」站、谷町線既「東梅田」站)，所以非常人來人往

當我同老婆一出地鐵站閘機，即時被眼前情景嚇窒

面前係一條四通八達既地下街，通向唔同既百貨公司及火車站，而每個方向都人頭湧湧，如果唔睇地圖，相信一定會盪失路

因 SKIP 左阪神、阪急百貨同大丸，所以我地直接向是次旅程首個玩具店 - 梅田 MANDARAKE 進發

跟據預先下載定既離線地圖，我地要向閘既右手邊地下街前行，大約行3-4分鐘就會見到一個圓型水池(泉之廣場)

請參考：http://www.umechikanavi.jp/pc/search/schTransfer.asp

而 MANDARAKE 就在這個廣場既上層地面附近

水池四面都有出口上地面既，因事先沒有攪清哪個出口，我就話由 M14 出口上左地面先再算啦(其實咁樣做好危險，一個攪不好，另一半實黑面，留意，留意)

好不幸，話口未完，我真係又瀨野

一上到去又出現剛才在「南森町」發生既問題，就係失去方向

今次就算出動到WIFI，ON LINE 去 SEARCH地圖，又因搵唔到明顯地標而企左係街到「頭岳岳」，完全無頭緒

四圍望都搵唔到啱既路，越搵越心驚，因背後又傳來一股熟悉既「氣」

試過無數次，如果感應到呢股「氣」，千祈唔好再認叻，一定要立即向老婆扮死狗，化解左佢，咁殺傷力就會減到最低嘞

此刻，老婆雖不發一言，但面容尚算和善，接過手機後，就重新再定位

唔知係我渣定我老婆真係勁(梗係老婆勁啦<-----------佢會睇我遊記架:ice: )，唔駛幾分鐘就搵到正確方向&#22046;

原來我地真係出錯左出口，正確出口應該係對面馬路既 M2或 M6(一出差唔多就係 MANDARAKE 所在既商店街街口)

一路聽住老婆既「鼓勵」說話，一路死死地氣「騎騎騎」咁跟住佢過馬路，唔駛十分鐘就到 MANDARAKE門口
   

該店樓高兩層，2/F係買雜誌同漫畫的，而 3/F 則買同人誌、COSPLAY 用品同 中古玩具

每一層面積大約有二千呎左右啦，一條一條巷咁擺放書籍及商品

主力當然係睇玩具啦，所以一支箭直上3/F

玩具部在該樓層既角落位置，與樓梯口為對角，要經過好幾條巷先會見到

行到過去，頓時有點失望，點解會得咁小地方架

請參照核突平面圖



以肉眼所見，&#22000;一排玻璃櫃 DISPLAY左各種類、牌子既中古玩具，舊到 70年代既合金又有，新到近幾年既老變亦有(當然仲有膠達、星矢、勇者、MACROSS、戰隊、SHF、FIGMA………….等)

而玻璃櫃對出&#22000;幾行貨架呢，亦都分門別類咁擺放住以上產品，不過分別在於貨架上既玩具都係有盒裝既

雖然係地方細，但一場黎到，梗要慢慢睇真至走啦

老婆見 D 巷咁鬼窄，佢就話費事同人迫，係樓梯口&#22000;邊等我啦(請記住，呢個就係賓賓我以後兩日能獨自去偷歡既契機&#22046;)

睇完哂排櫃，又逐條逐條巷咁望下有無野&#21873;，唔覺唔覺又睇左大半個鐘

至於尋唔尋到寶呢?

賓賓就無&#22046;，因為一來好多貨都仲會係香港見到，而且價錢差唔多，無謂拎黎拎去啦；二來有 D 舊既戰隊超合金，係就係正呀，不過貴到飛天，唔捨得買囉

睇完走人，臨落樓&#22000;陣老婆就話&#22046;

「最衰呢到無其他野睇，唔係我就自己行，約番時間係樓下等好過啦」

聽到佢咁講，賓賓梗係打蛇隨棍上

「一陣夜 D 去&#22000;個 YODOBASHI 我主要都係睇玩具架，不過好在樓上有幾層好似賣衫褲鞋襪同袋，到時未各有各行囉」

老婆聽後不置可否，淨係講左句「到時先算啦」就行左落樓梯

跟住既行程就係去 Hep Five 度坐摩天輪(週遊卷免費項目)

因知道方向，所以今次條路易搵好多

沿住商店街一出轉右行多 100 米到，就已經見到個紅噹噹既摩天輪係我地既左手邊不遠既位置。

行多 5 分鐘就到 Hep Five

老婆話行到隻腳好「支力」，不如搵個地方坐低，食小小野先啦

我地去左 8/F 一間食 PANCAKE 既，價錢同香港差唔多，但好食好多囉

間 PANCAKE 小店座落於窗前，可以望到當時正值黃昏，係一個上摩天輪既好時間

但再諗諗，成日去旅行都特登睇黃昏，睇到有 D 悶，不如今次睇下夜景都好喎

見趁仲有一段時間，食完 PANCAKE 就先同老婆去隔離個商場，幫佢同事買左化妝品後再番轉頭

買好野，去埋洗手間，時間&#21873;&#21873;好，天又黑齊，係時候浪漫一下&#22046;

呢個摩天輪設於商場上，可 360度盡覽整個梅田商圈，景觀超正

     
另外，最窩心既設計係，每一個機倉入面都有一個連接 3.5MM插頭既小型音箱，可供搭客免費播放手機內之音樂。(諗下同條女上去，一路播情歌一路 KISS，浪漫到呢)

轉一個圈時間大約15分鐘，話多唔多，話小唔小，不過賓賓相信夠時間俾各位師兄做愛做既野，如到梅田記得帶條女去「疏芙」「SWEET SWEET」下&#22046;

落車後整理一下裝束，要到今日最後一個景點 – YODOBASHI

我地出左 Hep Five 大門，經路面走十分鐘左右就到&#22046;

去到門口水牌再確認一下，玩具部是在3 / 4階，而 5 – 7 階為服飾用品

&#22000;度真係好鬼大，一層樓既面積差唔多有成個旺角足球場咁犀利，如果層層都有&#21873;既野行既話，分分鐘行成日都得

上到去 3 階，望望鐘已經係 2030，離閂門只剩下個半鐘到，如果要同老婆一齊行既話，一定睇唔切。所以我就膽粗粗同老婆重提下午時在 MANDARAKE時講既說話：「時間真係唔夠，不如各有各行啦」

估唔到我老婆竟然話好喎，發達&#22046;

我地對一對時間，約實 2130 在玩具部對出條行人電梯等，之後就分開行動

目送老婆上電梯後，正式開波。入部前，影左張 3 階既門口既相俾大家做個記認


3 同 4 階既玩具部佔該層數既 1/3，3階賣模型用品、SR合金、ROBOT 魂、SHF、FIGMA等玩具，而 4 階則賣 LEGO，當季拉打及戰隊等少兒向玩具
(剩係模型用品都鬼死咁多款)

   

如果要搵最新、最齊既玩具，呢到可以話係首選(電電城既 SUPERKIDS LAND都唔係佢&#22000;皮)

當日仲見到有 ROBOT 魂既 TALLGEESE同 ULTRA ACT 既電光超人連甲做緊特價，每隻都係 980 YEN咋 (宜家好後悔無買多幾隻番黎香港做 D 生意仔添)

多謝神秘人師兄借出 YODOBASHI 折扣卡，賓賓可以慳番小小錢入左對 IRONMAN 孖寶(為保護神秘人師兄，不便公開其真身，請諒)


呢到地方實在寬敞，行得好鬼舒服，仲要咁鬼多野睇，眨下眼就夠2130，最後懷住依依不捨既心情去會合老婆

本來打算在 8/F 食埋飯至走既，不過我同老婆隻腳都已經行到起哂水泡，所以最後又係決定番到酒店放低哂 D 野先再搵野食&#22046;

搭番御堂筋線，由「梅田」(M16)番「心齋橋」(M19)

途中，老婆見到我拎住個膠袋就問：「無碌爆卡咩?」，我笑笑口答：「未&#22083;，留番聽日去電電城先&#21526;麻」

老婆做左個無你咁好氣既表情，之後就繼續睇佢既 ONE PIECE &#22046;

番到去心齋橋，又唔食番重覆既野，所有最後選擇左章魚丸加可樂又一餐

而 DAY 3 就咁就過左LU

benbenben4213

死 LINK

.........

常威

搞錯呀！得咁小！賓賓你快d得唔得呀！:63:

Garycharm

序言

因今次大阪之旅玩得極開心，所以要即刻同各位網友分享

係 TD 出玩具報告就出得多，反而寫遊記就 ...

...........................................
幸好小弟有一班 TD 好網友(Panzer 兄、常威兄、rthk 兄、bbf 兄、魔術師兄等)，出心、出力、出書、出卡、出SF、出__ ，解答左小弟好多疑問同提供好多有用資料，小弟先至有方向完成以下行程安排：

benbenben4213 發表於 5-6-2013 09:55 PM

小意思o者，我都冇乜點幫過你~~
Benbenben 大大唔駛咁客氣。:shy:

sundaydriver

你地邊夠我叻！！{:1_218:}
Day 1 未完賓賓已經提左我六次勒！！
我好開心呀！！

hompage

回復 2# benbenben4213

你唔係坐鐵人28頭隻火車回市區?
酒店幾企理喎.
    去日本好多餐都係去超市買壽司攪掂回酒店..夜D再特價又抵,又正過香港那些添...有時行開就廢事搵食..
如果有時間又見附近有野狹屋就魚行飯就算..

Panzer

好正，期待跟住來的精彩靚相同見聞！
正所謂獨L樂不如眾L樂，D魔術師唔駛理佢架！:DD

7月有得玩番豬豬俠，小P又可以溝日本妹！

timyin

最緊要亞嫂玩得開心，就有下次了:34:

Panzer

呢間D壽C ok喎！Family Mart D冇咁好樣！

常威

其實亞賓Ocat落車隔離座大廈就係超市，八點過後刺身特價！

我買過兩次，貨靚價平！

原來日本人會將養殖既三文魚賣好平！直頭平到你唔信！500yen一盒，有吉之島築地水差咁大，刺身喎！抵爆！