|
|
|
(麻帆良市心跳巴士迷俱樂部會長 Monika 報導)
"一切從新開始"、"每架舊巴 都夢想成為一架新巴"、"仲認唔認得我?"
仲記得呢啲宣傳口號嗎? 1998 年, 異軍突起嘅新世界第一巴士服務有限公司 ( 新巴)
奪得前中巴嘅巴士服務專營權, 並且進行一系列宣傳攻勢, 更喺多部巴士上貼上以上嘅宣傳標語,
為新巴建立新公司嘅新品牌、新形象, 亦充份表現出當時新巴積極革新嘅決心,
當中最為人津津樂道嘅, 莫過於佢地初期購入嘅全新雙層巴士, 車身配上以橙色為主調,
由公司英文名字嘅 New World 取其字首 "NW" 兩字構成搶眼嘅 "波浪色" 車身塗裝,
令新巴嘅新形象更加呼之欲出!
但係, 正如羅文都唱過: "知否世事常變 變幻原是永恆",
25 年後嘅今日, 香港嘅巴士服務, 特別係港島區嘅巴士服務,
將會喺今年 7 月 1 日再次出現大變天! 新巴將會由呢一日開始,
併入原本已經同一屋簷下嘅城巴, 同時亦意味住港島區嘅巴士服務,
將會回歸至中巴時代一家獨大嘅局面, 屆時 "一切將會再次從新開始",
"每架新巴, 都將會成為一架城巴"。無論遇去廿五年來新巴服務是好是壕,
新巴行將結束已經係不爭嘅事實, 為此新巴舉行左一連串嘅告別活動,
並且特別由旗下車隊, 選取其中四架每款唔同車款嘅巴士,
噴上復刻版嘅 "波浪色" 車身塗裝, 作為 "光榮告別新巴" 嘅其中一個宣傳動作,
本文主角, 車隊編號 5839 嘅 ADL Envito500 MMC Facelift 12m 雙層巴士就係其中之一,
Super Bus 話, 以呢款巴士作為復刻版車身塗裝感覺別有一番意義,
除左見證廿五年來島區巴士服務嘅變遷之外, 亦見證左呢款巴士由佢嘅前輩,
同時亦係新巴成立初期至 2010 代嘅主力車款 -- Dennis Trident, 由車款發展至後來嘅 Enviro500、
E500 MMC 演變至今日嘅 Facelift 版 E500 MMC 系列, 依然係目前新巴車隊嘅中流砥柱,
以至 Dennis 車廠本身喺呢段期間經歷過多番嘅改朝換代,
成為今日嘅 ADL, 亦切合左 "變幻才是永恆" 嘅現實。
隨住新巴併入城巴, 新巴旗下嘅巴士勢將被逐步重新披上城巴嘅企業色彩,
假如到時有一日大家坐到佢地, 你地仲會唔會認得佢地曾經係新巴嘅一份子呢?
證書編號 0791, 限量推出 800 架
正式落地!!
波浪色的新巴
Super Bus 後記 -- 新巴成立之時, 在下已經人在美國, 而且從未返過香港半次,
所以亦冇緣一嘗乘坐新巴巴士嘅滋味, 不過當時亦都係我啱啱識上網冇幾耐,
喺一番誤打亂撞之下, 終於去到新巴嘅官網,
仲記得當時佢地嘅首頁仲用左美國電視劇 MacGyver
(香港叫 "玉面飛龍", 無線翡翠台以前夜晚都有播過) 嘅主題曲做背景音樂襯底,
果陣經常上去睇, 特別係佢地會定期 Upload 當時新巴嘅員工刋物 "新一篇",
仲有一個遊戲廊, 要㩒 Keyboard 嘅箭咀控制巴士移動攞哂啲旗仔
(定站牌? 太耐唔記得...) 而唔碰到任何障礙物,
仲用左 Final Fantasy I 其中一首遊戲背景音樂做襯底, 整個網頁版面設計,
個人覺得比九巴嘅官網更有心思。
We'll remember you, farewell NWFB!
  Thanks for reading~ |
|
發表於 17-6-2023 11:13:27
