FT arcee簡評

lewisli

細路時睇變形金剛卡通，尤其G1，一直是很少女性變形金剛的。Arcee可説是萬綠叢中一點紅。（當然在IDW中則話佢原來是由男性變性過來）可以說她是一個頗特別的存在。過往也曾有不少G1形象的arcee玩具（但原來第一代玩具冇出過arcee，只有概念圖），變形套路都大約是：前車殼放背脊，後車殻不是放臀部就會索性沒有，而用人形大脾做車尾。結果就是始終和卡通造型有點距離。後來見到FT話出，外形不論人形車形都叫做最似嗰隻，有啲心郁郁。不過經過老兵的經驗，諗住都係睇完玩評再講，甚至睇完玩評video都仍然十五十六。可惜身為「外貌協會」忠實會員，始終難抵女神的誘惑，結果仍是乖乖獻上金錢。

1）外形：

最高分的一環。尤其當車形有完整的車殻，但人形背面卻收到只有G1形象嗰兩個算好大的噴射器中！即使明知車殻係收喺裏面，都會奇怪點樣收到。

車形冇官方咁流線型，但卻符合卡通設定。

穿崩位主要在坐位（我接受到）和車頭底正前方（其實幾離譜，但事實你又真係好少喺呢個角度去睇⋯⋯），嗰個車底藏半個人頭係恐怖片格局。

人形頗有女性高瘦形象（vs官方的大媽外形），最讚的是雙手腕和掌形可擺出不少女性感覺的pose。

唯一是雖然五個面相，但除了那惡趣味面相之外其他的都是木口木面，唯有用那個稍為大眼睛的吧！另外上身側望就像UT禁閉一樣是明顯空洞穿崩的，有點奇怪，因為覺得呢個位應該可以設計到有嘢遮住。

2）變形：
扣分的一環。要承認變形複雜但卻不是扣分原因，畢竟如果像我一樣先看video才變其實步驟唔算難理解，（不要企圖齋靠說明書，因為即使我睇完video後都仍然睇唔明本説明書嘅步驟）扣分在某幾個步驟係靠膠的彈性膠頂膠硬過，尤其背包翻出/收埋車殻時要硬過條連接條。另外上身和重重的下身只靠一小舊黑色連接位相連，

雖然FT已經刻意整鬆嗰個位減少玩爛風險，但除非物料上支撐到，否則玩爛風險唔敢樂觀（我暫時變形來回各三次仍未爛，菩薩保佑），更甚者是變人形時下身扣實上身的步驟中似乎呢個位都是受壓位（因為扣位攞到好盡），而變形時軚盤上下移動亦會和呢舊黑色連接位膠頂膠，可説是四面楚歌⋯⋯其實變得唔安心和唔流暢才是真正扣分理由。（不過即使不幸真的斷腰，人形車形仍然維持到，只是變形時多了一個合體步驟⋯⋯）

lewisli

3）可動：
冇腰！冇腰！冇腰！不過除此以外可動算高。跪地、W坐冇問題。





雖然冇腰轉但多了左右彎腰。




特別一讃係比想像中易企穏好多！呢個角色設定是外形上重下輕腳板細，要企穩理論上唔易。但因為FT用料下身重，即使合實雙腿也可以企穩是我始料不及。如果主力玩人型擺pose會玩得幾暢快！




遺憾是車形時，可能我變形未到位，即使已經將前輪拉出，仍然會因為車底人頭掂地，左前輪差少少著不了地以致推車不能. （更正：多謝師兄羅書硯的指點，原來是因為連接人頭的連接條錯誤擺放，更正後可以順利推車了，多謝師兄指點！）。

4）QC
塗裝不俗，關節鬆緊得宜，扣位尚算到位，雙手有扣位握槍穩陣，但始終下身較重又無格格關節，耐久度存疑。特別一提腰部黑色連接位置，我唔識分辨，但求神拜佛物質夠硬唔易爛。最後如果人形時背包有一個少少的扣位防止走位會更好。

總括的說，外形上人形車形都算滿意（我唔刻意望車底人頭的話），尤其車殼可以收埋哂我自己非常欣賞。喜歡玩人形擺pose的不會失望。不過如果喜歡變來變去的就未變啱你，唔係因為難變，係因為呢件玩具可能捱唔住陪唔到你一生一世。

leehow

呢隻其實已經出得唔錯,係腰轉唔到呢下真係敗北

純白騎士姬Saber

貌似FT出得不錯
感覺是逼使官方出Mp的技倆我會等