奔馳屯公的一代車皇 (長文, 多圖注意)
https://i.imgur.com/Whv6fb2.png(麻帆良市時報記者キズナアイ報導)
はい、ども! キズナアイです~♥
要大家數出喺九巴車隊中大家最熟悉嘅車廠名字,
一定會係 Daimler、Leyland、Dennis、Volvo、Scania、Mercedes-Benz,
你冇睇錯, 係平治! 一個被譽為尊貴嘅德國汽車品牌, 喺 1980 年代前,
九巴車隊清一色英國貨色掛帥嘅時代, 實在好難想像會有呢個德國品牌出現。
為左保障英國以及英聯邦國家嘅利益,
當時香港嘅港英政府一直以來只容許香港嘅專利巴士公司向該等國家購買巴士,
呢個限制直至 1983 年先至被解禁, 從此巴士公司購買新車時可以有更多選擇。
而當時九巴嘅車隊中, 主要由 AEC Regent V 34ft "大水牛"、
Daimler CVG6 (Daimler E "長牛")、Daimler Fleetline "珍寶"、
Leyland Victory MK2 勝利二型同 Dennis Jubilant 掛帥。珍寶巴士雖然貴為後置引擎設計,
但係其設計上嘅先天不足喺香港出現種種水土不服嘅現象,
令九巴大感頭痛; "大水牛"、 "長牛" 、Jubilant 同勝利二型呢啲前置引擎設計嘅車款,
喺當時後置引擎設計已成大趨勢嘅時代亦顯得不合時宜,
儘管勝利二型係當時九巴車隊內較新嘅車型, 爬坡性能較優秀,
但係前置引擎嘅設計, 其行車時發出嘅熱浪同聲浪亦令司機以至乘客都難以忍受,
當時九巴最需要嘅, 係一款新一代嘅後置引擎巴士,
當時平治嘅香港代理商仁孚行睇準時勢, 由當時西德嘅 Mercedes-Benz 車廠
引入一部 O305 型雙層巴士比九巴試用一年,
呢架巴士亦成為全港首款非英國同英聯邦國家製造嘅雙層巴士,
而且呢架巴士唔少設計喺當時嚟講亦係開創先河, 絕對係破天荒之作。
平治 O305 原本為一款單層巴士底盤, 係百份百平治出品,
佢使用德國巴士常用, 俗稱 "牙簽陣" 嘅無大樑車陣設計,
佢冇傳統巴士常見嘅兩條大陣, 而係由多支唔同形狀、大小嘅鋼通焊接組成,
好處在於可以將車重平均分散於底盤唔同部份, 減低因為部份位置長期受力而扭曲變形嘅機會。
引擎方面使用平治嘅 OM407h 卧置式六汽缸引擎, 呢台自然吸氣,
有 11413cc 嘅非渦輪增壓設計嘅柴油引擎, 可以迸發出高達 240hp 馬力,
亦令呢款 O305 成為當時全港馬力最大嘅巴士, 相比當時九巴普遍採用,
有 10600cc 嘅 Gardner 6LXB 引擎, 最高馬力只到 178 匹,
呢台平治出品嘅引擎無疑顯得更加強而有力, 成為當時無 Turbo 引擎嘅表表者。
引擎連接同廠出品嘅三前速自動波箱, 再加上前軸兩個、尾軸四個氣袋設計嘅全氣墊懸掛系統,
令乘客有更佳嘅乘坐感。制動方面除左一般嘅全風式制動之外,
仲有波箱嘅內置減速同平治標準配備嘅廢氣煞車系統,
提高行車安全之餘亦減輕司機對制動腳踏嘅依賴,
加上當時全港獨有嘅巴士停站手掣 (Bus Stop Brake, 九巴稱為 "短暫停車手掣"),
呢支裝設於巴士錶板側嘅小桿仔, 操作原理同手掣一樣,
但係只需使用少量壓縮氣, 司機停站時只需用手指拉下, 非常方便。
全港首架平治 O305 巴士配用由蘇格蘭 Alexander 提供嘅 R 型車身,
喺 Alexander 車廠裝嵌妥當後再運抵香港, 並且由仁孚行同九巴喺新世界中心舉行新車交接儀式,
正式宣佈平治巴士正式進駐九巴, 並且獲得車隊編號 ME1。
適值九巴五十週年, 九巴亦為呢架 ME1 配上獨特嘅車身色彩,
並且行走 101 同 105 等過海隧道線, 亦有安排行走來往佐敦道至元朗嘅 68 號線,
以測試車輛性能。隨後因為佢出色嘅性能令九巴感到非常滿意,
於是再加訂 40 架新車, 並且喺 1985 年間投入服務,
呢 40 架新車 (ME2-41) 同樣配上 ME1 獨有嘅車身塗裝, 車頭設計亦作出改良,
令外型顯得更為俊朗, 而呢批巴土更裝有車廂通風系統, 亦係九巴車隊中首次出現。
佢地初時被安排行走 105 同 68 號線,
但係後來因為隧道公司使用新式嘅拖車以搶救喺管道內死火嘅車輛,
而呢款拖車喺拖呢款巴士時, 有機會對底盤結構同引擎機件構成損壞,
所以全數 ME 被迫全數調離 105, 同紅磡海隧絕緣, 並且喺 68、68M 同當時新開辦嘅 68X 行走,
從此屯門公路就成為左呢批平治巴士表演嘅舞台, 憑住佢地擁有嘅超卓性能,
九巴 ME 可以輕易地去到 90km/h, 喺屯門公路一段更有記錄為 110km/h, 堪稱逢車過車,
甚至可以超越同線前兩班嘅勝利二型巴士, 因而得到 "車皇" 嘅美譽,
唔少乘客甚至専程揀車坐, 貪佢地可以係屯公逢車過車, 比前班車話咁快就到目的地!
但係亦因為佢地擁有如此強勁嘅加速本領, 甚至創下首次有公共巴士喺屯公被影快相嘅紀錄,
於是九巴為佢地稍為減低引擎嘅馬力輸出, 但係依然不減佢地強勁嘅起步同加速嘅威力,
甚至滿載 123 人上斜依然強而有力。除左佢地擁有卓越嘅性能之外,
平治廠方提供嘅售後服務更加完善到令九巴刮目相看,
平治對九巴呢批巴士喺香港嘅表現非常重視, 曾經每隔兩個禮拜都會派員到九巴車廠,
為巴士進行檢修, 有一次工程人員發現波箱零件出現問題,
除左立即安排維修之外, 更即時由西德空運零件到港為所有車輛更換。
而為左保持佢地嘅獨特形象, 九巴高層更曾經一度下逹指示,
唔比喺呢批巴士上上有任可車身廣告。
踏入九十年代, 雖然呢批九巴平治依然如舊喺屯公馳騁,
但係佢地獨有嘅車身塗裝喺呢個時候已經開始 "失色",
取而代之嘅係各款全車身廣告, 後來甚至披上九巴嘅標準熱狗車身色,
但係憑住佢地行車時獨有嘅引擎同轉波聲, 加上佢作為兩軸巴士獨特嘅車身外型同線條,
依然可以認出佢地就係曾經風光一時嘅九巴車皇,
但係隨住車齡增高, 佢地喺 1996 年開始陸續被調往北區嘅上水行走,
雖然間中亦會客串行走屯公路線, 但係呢個時候嘅九巴 ME,
已經唔再以屯門公路作為佢地嘅主戰舞台。隨住呢批九巴平治喺千禧年代慢慢踏入退役之年,
ME1 率先喺 2001 年退役, 其餘 40 架九巴 ME,
亦喺 2002 年 11 月下旬全數退役, 九巴甚至喺佢地嘅官方網頁發表新聞稿,
宣佈九巴首批德國平治製造嘅 O305 巴士正式光榮引退嘅消息,
作為對呢批九巴一代車皇嘅一個致敬。
有少數巴士退役後被私人購入收藏, 當中 ME37 被翻油上初出道時嘅 "車皇色",
而 ME30 更被運往澳洲, 喺當地安享晚年.
亦令九巴一代車皇嘅輝煌傳說得以被保留下來。
隨住政府修訂車軸負重量條例, 將車軸承重量限制為 16 公噸,令兩軸巴士嘅載客量難以增加;
為應付日益增長嘅乘客, 加上九巴試用 12m 三軸巴士後, 對佢地嘅高載客量感到滿意,
於是九巴銳意大量引入三軸巴士以解決載客量增加嘅需求。
由於九巴嘅購買新車取向出現呢個改變, 雖然九巴亦曾經向平治要求提供呢類底盤,
但係平治並未能應九巴要求提供, 因此九巴就再無增購平治嘅巴士, 而呢 41 架平治 O305 巴士,
亦成為九巴唯一一批平治嘅出品。雖然依家嘅九巴車隊中,
再揾唔到平治出品嘅車款, 但係平治巴士嘅出現, 的確代表住九巴車隊款式邁向多元化,
唔再局限於英國製造嘅產品, 更曾經擁有豐田同三菱等日本品牌嘅巴士車款喺九巴服務,
令九巴嘅車隊款式更加多姿多采! 而呢款平治 O305 巴士嘅超卓性能,
甚至引來彼岸嘅新加坡垂青, 新加坡巴士 (現 SBS Transit 前身)
喺 1982 年引進全新加坡首架平治 O305 樣辦雙層巴士, 使用罕見嘅 Willowbrook 車身,
再喺 1983 年引入配 Alexander R 型車身嘅樣辦車,
外貌同九巴嘅 ME1 如出一轍, 憑住佢地喺獅城卓越嘅表現,
新加坡巴士亦喺 1984 - 1987 年間引入 200 架同款巴士, 數目比九巴仲要多,
全數 200 架巴士都係配用 Alexander R型車身, 外貌同九巴使用嘅 ME 幾乎完全一樣,
而新加坡亦係目前亞洲地區擁有平治巴士數目最多嘅國家。
平治 O305 巴士嘅超卓性能, 喺香港同新加坡都為車長同乘客留下美好嘅回憶,
佢地嘅退役亦令唔少人感到依依不捨。
本帖最後由 SuperBus 於 23-11-2018 04:11 AM 編輯
今日, 麻帆良市隆重歡迎九巴平治 O305 巴士登場!!
一提起九巴平治 O305 巴士, 相信好多巴士愛好者、車長或者坐過佢地嘅朋友,
都會非常回味坐佢地進出元朗嘅每一程, 特別對市長 Super Bus 嚟講,
呢款巴士絕對係佢嘅至愛! 佢憶述第一次認識呢一款巴士, 係佢當時啱啱小學一年級嘅時候,
喺某報嘅港聞版見到一幅九巴新巴士嘅相片,
佢車身上嘅塗裝, 比人一種飛翔嘅感覺, 簡單之餘亦令佢留下深刻嘅印象,
後來有一次亞嫲帶佢入元朗行, 喺佐敦道坐 68X 第一次坐到呢款巴士,
佢獨特嘅引擎聲令當時仲只係讀緊小學嘅佢已經為之陶醉同迷戀上呢款巴士,
之後每逢亞嫲有機會帶佢入元朗佢都好渴望坐到呢款巴士,
就連亞嫲都話佢識揀車坐! 到後來 Super Bus 有機會自己出街行,
一有機會坐 68X 入元朗, 或者去完屯門九巴車身裝嵌廠影相,
入完元朗行再返出九龍, 又或者去完荃灣出九龍,
如果唔趕時間, 佢都會専程等呢款巴士先至上車坐,
因為當時嘅 68 同 68X 都係以呢款平治巴士作主力, Super Bus 話坐呢啲 Benz 行呢兩條線,
喺屯公飛車堪稱爽爆! 坐喺近上車門嘅 "導航位", 沿途聽住佢高速行走時引擎發出嘅咆哮聲,
車長愜意地揸住軚盤, 同喺路上逢車過車嘅場面, 果種感覺真係冇一款巴士可以比得到,
有時坐啱一班滿載嘅 68X 巴士, 喺屯公上斜路段依然強勁有力,
遇到前車其他路線嘅巴士, 甚至係同線巴士依然喺左線慢線行走,
就算未有人企位巴士依然吃力地龜速上斜, 自己所坐嘅巴士一個閃出入中線,
輕而易舉爬過哂佢地頭, 眼見仲行緊慢線, 坐喺司機位嘅車長 O 嘴嘅表情,
心諗佢地一定會係諗緊: "鬼叫我唔係揸 Benz 咩, 頂硬上啦!"
果種感覺甚為有趣。對 Super Bus 嚟講, 坐九巴 Benz 行 68X,
由屯門市廣場開始上屯公不停站一直飛到荔枝角, 絕對係一種享受!
儘管後來引入空調巴士行走, 有冷氣嘆坐得更舒服,
佢依然鍾情坐 Benz (Super Bus 按: 果陣冷氣巴收費貴啲都係原因啦~)
Super Bus 話, 九巴平治嘅退役, 無疑大家都依依不捨, 包括佢自己都係,
始終坐九巴平治嘅每一程, 都帶比大家好多美好嘅回憶,
雖然轉眼間佢地已經退役左成十六年, 但係佢話只要合上眼睛,
就會回想起坐九巴平治喺屯公架飛馳嘅場面, 就好似啱啱尋日坐完返嚟一樣,
感受非常深刻, 果種坐九巴平治帶來嘅感覺真係甚至到依家坐任何一款巴士都比唔到。
喺 Super Bus 心目中, 九巴平治、68X 同屯門公路係完全劃上等號,
佢仲成日話: "唔係行屯公嘅九巴平治就唔係九巴平治, 冇左車皇色嘅九巴平治就唔係九巴平治!!"
2002 年 11 月九巴推出首架平治巴士模型, 作為呢款巴士嘅忠實粉絲, Super Bus 當然瞓身支持啦,
或者就係因為佢對呢款車嘅執著,Super Bus 一直期待會推出車皇色行 68X 嘅九巴平治巴士模型,
結果苦等左十六年, 今日佢終於得償所願啦! 今日呢架編號 ME14,
行走 68X 往元朗嘅九巴平治, 將佢地昔日九巴一代車皇嘅輝煌傳說,
喺今日再度重現大家眼前!!
隆重歡迎! 九巴平治 O305 巴士, 見參!!
https://i.imgur.com/2EJpOOX.jpg
https://i.imgur.com/gMYgStz.jpg
https://i.imgur.com/ACqAwUK.jpg
https://i.imgur.com/jpBGHW1.jpg
隨盒附有 68A 路線牌比玩家更換, 不過個人嘅執著, 始終都係 68X 至襯呢款車!
https://i.imgur.com/xWt3t5B.jpg
https://i.imgur.com/oV3IvOO.jpg
證書編號 0070, 限量推出 800 架
https://i.imgur.com/CyczJ4d.jpg
正式落地!! キズナアイ亦愛上車皇呢~~
https://i.imgur.com/0HvTqeI.jpg
https://i.imgur.com/PQ4LzYj.jpg
https://i.imgur.com/pW4vCNn.jpg
https://i.imgur.com/RzdTrjc.jpg
全長 11 米, 4.5 米高嘅車身, 加上其兩車軸設計,
同擁有較長嘅尾跨, 令平治 O305 巴士喺九巴車隊中別具一格,
再配上人稱 "車皇色" 嘅獨特車身塗裝, 令九巴平治嘅形象更加呼之欲出
https://i.imgur.com/r6Z1h25.jpg
車尾引擎以縱置臥式擺放, 令九巴 ME 能夠將下層尾排位真真正正擺到最車尾位置
https://i.imgur.com/umyDBNR.jpg
https://i.imgur.com/o4VuVOt.jpg
https://i.imgur.com/VhbgEZ6.jpg
https://i.imgur.com/b3cYDBC.jpg
當 ME14 遇 上ME3
https://i.imgur.com/PRkXV8M.jpg
https://i.imgur.com/gY9acn7.jpg
雖然係同一個模具, 但係相隔十六年, 呢個模具亦有一啲改動,
來一個對比, 睇下大家數到幾多出來?
https://i.imgur.com/JRxY6jA.jpg
車頭嘅平治人字標誌, 令九巴平治形象更加突出,
不過呢個標誌連同原本同樣喺車頭同軚盤嘅藍色平治標誌經常成為被偷竊嘅對象,
幾乎毎架巴士都被偷過三次以上, 為左保持九巴平治嘅高貴形象,
喺佢地投入服務初期, 代理商都會為佢地重新補回,
事實上個人亦覺得車皇色平治係要有個平治 Logo 先至似樣兼夠醒神
舊
https://i.imgur.com/SBMxAJV.jpg
新
https://i.imgur.com/W05M20T.jpg
新車出道時, 車尾引擎蓋並冇三排通風口,
通風口係後來先至加上, 呢樣亦係九巴 ME 獨有
https://i.imgur.com/ibiXmIM.jpg
https://i.imgur.com/932SyKo.jpg
https://i.imgur.com/ypFRiC0.jpg
最明顯嘅分別就係車頂嘅骨位
https://i.imgur.com/ChetQMx.jpg
舊
https://i.imgur.com/RUZpNjD.jpg
新
https://i.imgur.com/KbIHWsQ.jpg
作為九巴嘅線王之一, 自 68X 開線以來, 唔少新車都行過呢條線,
當中包括九巴首架三軸雙層空調巴士 MCW Metrobs 11m
https://i.imgur.com/ZbGuZZx.jpg
https://i.imgur.com/fCZOLXT.jpg
68 系, 可惜68 已經取消...
https://i.imgur.com/xeQgdiU.jpg
https://i.imgur.com/c3j0uGZ.jpg
https://i.imgur.com/hUhmMX8.jpg
https://i.imgur.com/KqWVAE6.jpg
https://i.imgur.com/hcbr3oU.jpg
Benz O305 除左締造左九巴一代車皇嘅輝煌傳說, 亦締造左九巴屯公嘅最速傳說!
https://i.imgur.com/9PHGMFK.jpg
https://i.imgur.com/FVWH3d3.jpg
本文主角
https://i.imgur.com/6T5duVQ.jpg
https://i.imgur.com/woDY7ZJ.jpg
坐過九巴平治上層車尾嘅朋友, 或者應該仲記得, 呢個位置係不設座位, 只有兩個木箱嘅物體,
查實係因為平治 O305 底盤嘅先天設計, 因為佢使用臥置式引擎設計並且收藏於下層車廂地台之下,
令地台由車尾向上傾斜, 為左通過運輸署規定下層車廂高度必須有最少 1.75m 嘅標準,
Alexander 喺為佢地建造車身時, 就利用上層車廂 "偷位",
但係如此一來亦令上層車尾車廂高度未能通過標準,
因此上層車尾唯有不設座位並且以 "大木箱" 填補留空位置以達致通過驗車嘅目的
(按: 在下自首, 我都曾經試過偷偷地喺呢兩個木箱位坐過, 失禮啦~)
https://i.imgur.com/vjoMpgr.jpg
姊妹車, ME?? 攝於 1994 年初九巴屯門車廠, 當時呢隻車身色已經買少見少...
https://i.imgur.com/n3x5iUG.jpg
https://i.imgur.com/2ibLmq7.jpg
姊妹車, ME?? 攝於 1994 年九巴屯門車廠, 已經改上九巴標準熱狗色塗裝
https://i.imgur.com/r0IMRF2.jpg
https://i.imgur.com/13CmUsL.jpg
另一架熱狗色塗裝嘅 ME13, 攝於 1994 年元朗 (東) 巴士總站
https://i.imgur.com/Ir1IpXK.jpg
https://i.imgur.com/HTDaUkm.jpg
那些年入元朗, 除左見到九巴平治, 仲有佢...
https://i.imgur.com/fm01n0H.jpg
And...
https://i.imgur.com/RfPxbx5.jpg
https://i.imgur.com/zrzF8Ub.jpg
想回味九巴平治嘅旅程, 依家已經冇可能啦,
但係以下呢段行車影片, 佢嘅行車聲又會唔會勾起大家以前坐九巴平治行屯公嘅點點回憶呢?
(按: 片中呢架係德國法蘭克福被保留嘅平治 O305,
配平治原廠車身, 正如前述, 呢款巴士原本係一款單層巴士)
XnqrjeQ5X98
Thanks for reading~
you should write a book on HK bus~
頁:
[1]